الموضوع: ايهما احسن في كل شيء هيونداي النترا ٢٠١٤ ولا رينو فلوانس ٢٠١٤

- رغم اني مش بحب شكل الفلوانس من جوة ابدا... بس برضه اشيك من صالون الالنترا باضاءاته الزرقا المستفزة جدا خصوصا لو سايق بالليل!!
- ورغم اني برضه مش من محبي الالنترا عموما، بس برضه ارفض المبالغة في تعظيم وتبجيل الفلوانس بشكل زائد عن الحد بصراحة... مش عارف ليه بعض الناس مصممة تدي العربية اكتر من حقها؟؟ هي عربية ممتازة ولا غبار عليها واحترمها وكنت بفكر اشتريها في 2012 وكل حاجة، بس بعض الناس بقى يختارها قصاد اي عربية تانية بدون تفكير وبدون يمكن تجربتها... العربية يا جماعة تعليقها الخلفي تورشن بيم زي الالنترا، ومفيهاش esp مثلا زي الالنترا برضه، وابعادها مقاربة جدا للالنترا من قاعدة عجلات وعرض وغيره... يعني الاتنين متقاربين المفروض واللي هيفرق الشكل وده اذواق ثم وسائل الأمان ثم الكماليات...
- وفي النهاية انا بميل للفلوانس، ولو دخلت حاجة زي السيراتو الجديدة كنت هختارها هي!!

المشاركة الأصلية كتبت بواسطة Meggieboy

متفق مع حضرتك فى كل كلمة قلتها و الفلوانس عربية عادية جدا متوسطة الجوده و في عربيات فى نفس الفئة تتفوق عليها فى أشياء و تقل عنها فى أشياء أخرى و فى الاخر كل واحد بيشوف ذوقه و اسلوب سواقته و امان العربية و كمالياتها و توكيلها و سعر اعادة بيعها و مدى اهمية كل نقطة من هذه النقط بالنسبة له و بيختار على هذا الأساس
أختلف مع كلام حضرتك إذا سمحتلى فى نقطة واحدة فقط و هى نقطة العفشة التورشن بيم فى الاتنين اذا الاتنين متقاربين
طبعا الاتنين مفهمش esp و ده اكيد و مش هما اعلى مقياس ثبات فى هذه الفئة و لكن مش معنى ان عربيتين نازلين بتورشين بيم يبقى ثباتهم واحد.....
نوع المساعدين بيفرق جدا و ظبطة الاتزان او ال tuning بتاع العفشة بيأثر جامد فى الأتزان
طول عمر الالنترا و حتى وقتنا هذا تتميز بمساعدين طرية زيادة عن اللزوم....هذه الطراوة الزيادة رائعة فى امتصاص مطبات الطرق داخل البلد و لكنها على الطريق السريع و مع مطبات الهوا و فواصل الكبارى و خلافه العربية بتنطط فوق و تحت و بتعوم جامد من الخلف...هذا الموضوع مشهور جدا جدا لكل واحد ساق الالنترا قبل كده و انا واحد منهم و على طول تاريخها و موديلاتها.....
هذه الليونة مش موجوده فى الفلوانس و ثباتها هقول معقول جدا بالنسبة للسواقة العادية و مش هقول الرياضية....و انا مش بقول انها رمز الثبات و لا اى شئ..لأ فيه عربيات أثبت منها و لكن الفلوانس مش بليونة و ميوعة الالنترا على السرعات...ده بس اللى حبيت أوضحه

شكرا على الرد... واحب اقول اني متفق مع حضرتك في موضوع العفشة... انا كان قصدي ان الأساسيات على الورق متقاربة جدا... يعني مهما كان الاختلاف في المساعدين ونوع الـStabilizer ان وجد وووو فبرضه الموضوع لن يكون مكلف زي الـMultiLink أو الـDoubleWishbone ثم طبعا مش هيبقى زي الدفع الرباعي مثلا في سوبارو... انا قصدت بس اني اعتقد ان العربيتين متكلفين قريب قوي من بعض كأساسيات، فلا داعي للمبالغة في اي منهم علشان الواحد ما ينخدعش ويبقى منتظر اداء اعلى من المفروض العربية تقدر عليه...
وبرضه عن تجربة، الفلوانس (الشكل اللي فات) انا ركبتها وهي بالفعل اثبت من الالنترا...