الف مبروك ياباشا على العربيه الجديده فعلا اللانوس مفهاش صيانة 1000 ولا حتى تغيير زيت اهم حاجه تخليك حنين عليها طول ماهيا تحت الالف يعنى ماتزودش عن 80 كم/ساعه..
صيانة الـ 5000 مجانيه بدون زيت وانصحك تغير الزيت بره وبعدين تروح.. صيانة ال 5000 الاف هيربطولك العفشه ويجرلش على فرامل اليد والمفروض انه بيفحص كل حته فى العربيه ميكانيكا وكهربا بس ده مبيحصلش ومش هيحصل فى اى صيانه غير لو انتا اشتكيت من حاجه معينه..
عيوب اللانوس الواضحه لكل الناس اربعه:-
اولهم واهمهم ان العربيه واطيه جدا ولو راكب معاك حد ورا العربيه هتحك فى المطبات العاليه والموضوع ده ملوش حل فى ناس بتعلى العربيه بس ده بيأثر على ثابت واتزان العربيه.
ثانيهم واخطرهم ضعف الفرامل خلى بالك وخلى دايما مسافه بينك وبين اللى ادامك عشان الفرامل بتبطأ العربيه لكن مش بتكلبشها حتى لو دوست للاخر.
ثالثهم علو صوت الموتور فوق الـ 100 كم/ساعه
رابعهم التقفيل السئ جدا للعربيه.. ضفيرة الكهربا والخراطيم والتابلوه والكاوتش بتاع الببان (تقفيل بلدك وانتا عارف)
خلى بالك عشان المشاكل اللى جايه دى هتحصل معاك بنسبة 80% (والله اعلم):-
- بعد فتره من الوقت ممكن تلاقى الـ RPM عالى وانتا ممور العربيه - الطبيعى انه بيكون 900 لكن هتلاقيه احيانا كتير بيعلق ويطلع لحد 1500 و 2000 ساعات وصوت العربيه بيبقى عالى وهيا واقفه ده عيب موجود كتير جدا فى اللانوس سببه حساس الايدل لو روحت التوكيل هينضفوه ويبرمجوه كمبيوتر تانى ولو متصلحش هيغيرهولك ضمان.
- ممكن تيجى فجاه تلاقى العربيه بتطلع دخان اسود وفى رجه ورعشه فى الموتور والعربيه كلها وهيا واقفه ده ولمبة الـ check منوره .. ده بيكون سببه ان فى خرطوم اسود رفيع كده المفروض بيكون راكب فى المانيفولد بتاع الموتور.. الخرطوم ده مش متثبت بحاجه عشان كده مع الاهتزاز الكتير ممكن يفك ويسببلك اللى انا قولت عليه ده..
ملحوظه: ركز اوى مع بتوع التوكيل لانهم مبيعملوش اى حاجه مكتوبه فى جدول الصيانه غير ربط العفشه وفرامل اليد فقط! انا بروح الصيانات لما بيكون فى مشكله و كمان عشان اخد ختم الصيانه.
الف مبروك تانى وربنا يكفيك شرها ان شاء الله :)
المفضلات