لما الدكتور يكون محتار في التشخيص أروح لمين؟؟
سلام عليكم ورحمة الله وبركاته
دلوقتي أنا عندي مشكلة ومش لاقية ليها أي حل ومش عارفة أتصرف إزاي
من فترة كنت بشتكي من ضغط منخفض بيوصل أحيانا لـ 100/59
لكن بصراحة ماتابعت مع أي دكتور لأني مكنتش منزعجة من الموضوع ده إلا فقط
من الدوخة والهبوط اللي أحيانا أحسه.
من أسبوع بقى حصل حاجة غريبة أقيس الضغط الصبح ألاقيه 160/83
وعلى بالليل ألاقيه 113/62 فقلت كدة لازم أشوف دكتور
لما روحت الدكتور سألني ضغطي العادي كام؟ قولتله 110/70
قال طيب مبدأياً ضغطك 137/81 وأنا شايفه كدة عادي !!!!!
فطبعاً سألته :ـ أنا دلوقتي عندي دوخة مستمرة وبنام أكتر من 13 ساعة ودايما مجهدة
ولما بقيس الضغط في البيت بلاقيه منخفض..ده سببه ايه؟
الدكتور طلب مني تخطيط قلب ,,,,,, عملته
رجع قاس الضغط وطلع آخر قراءة :ـ 109/65 وبيقول عادي وطبيعي
طلب تحليل سكر ,,,,, عملته
النتائج ألف حمد وشكر كله تمام فسألني عن الأنيميا وعايز كذا تحليل دم
الهيموجلوبين طلع عندي 7.5
رجعت طبعاً للدكتور بكل ده وقعدت قدام حضرته ومنتظرة أسمع أنا عندي ايه
أو أتصرف إزاي في الحالة اللي رايحة عشانها وده بقى كان رده:ـ
الضغط المنخفض دايما بيكون نتيجة لسبب وإحنا بندور على السبب دلوقتي
فممكن من الأنيميا برضه,,, هي اللي بتعمل دوخة كدة وصداع
كل ده وأنا قاعدة مستنية يقول حاجة افهمها او علاج يكتبه
آخر حاجة بقى طلبها مني إنه يطمن على صمامات القلب بالإيكو
لا الدوخة راحت ولا الضغط اتظبط وعمالة أخرج من حاجة أدخل في حاجة تانية
ومش عارفة اتصرف والله خالص هل أعمل الإيكو ده؟ ولا أشوف دكتور تاني؟
ولا أتعايش مع الدوخة والنوم ده ولا أسأل مين؟
من فضلكم أفيدوني
وشكراً
