للمقبلين على شراء ميجان2 , تقرير بالصور ... اتأخر كتير جدا

**تامر.محمد** · 08-01-2014 03:26 PM

تقرير اتأخر أوي في انه يبقى مع بعضه
و رغم ان العربية داخلة في 10 سنين في الشارع اهي لكن ناس كتير ناقصها معلومات عنها و بيسألوا عليها
هاحاول اسرد في التقرير ده معلومات على قد ما اقدر

اللي كمان للأسف فايت ناس كتير هو مدى جمال العربية دي اللي للأسف بيضيع بسبب الظروف الجوية و اهمال الناس انها تعمل للعربية شوية كار كير سواء خارجيا او داخليا

للتوثيق
بالنسبة للشكل الخارجي , فكل الناس عارفة العربية
المعلومة اللي ممكن تبقى ناقصة عند الناس هي انهي شكل بتاع انهي سنة , و ايه الفرق بين موديل الفيس ليفت و الموديل اللي قبله

ده شكل phase I --- 2005-2006

من الداخل

و ده شكل phaseII --- 2007 - 2010

هنلاحظ ان التغيير الاساسي خارجيا ان الفوانيس الامامية و الشبكتين اللي في وسطهم اتسحبوا على تحت و بقى فيهم عدسات للنور الواطي , و الشبكة السفلية بقت اعرض كتير و واخدة استدارة من تحت و الباكتات بقى حجمها اكبر

و من الخلف رسمة الفانوس اختلفت شوية

اما داخليا , فنور شاشات العرض بقى ابيض بدل برتقالي , و اتضافت حلية ستانلس مدورة للدركسيون

يتبع , و رجاء عدم الرد الا لما اخلص

**تامر.محمد** · 08-01-2014 03:51 PM

في 2009 غيرو شكل الشبكتين اللي حوالين العلامة الامامية و الشبكة اللي بين الفوجات في اسفل الاكصدام , و بقى شكل العربية كده

و في 2010 خلوا الفوانيس الامامية سموك من جوة و بقى شكل العربية كده

نيجي للموتور ,

موتور الميجان اللي بتنزل مصر موتور 1600 اسمه K4M , قدرته 115 حصان , بس بعد الفيس ليفت اتعمل له tuning عشان يتناسب مع ستاندارد الانبعاثات الاوروبي و بقى قوته 110 حصان
فتيس العربية اسمه dpo+ , ستيبترونيك , 4 سرعات
انا عن نفسي مش معتبره فتيس محترم يعني
مشهور بنتشة بين الاولاني و التاني زي عادة الفرنساوي كله
كان فيه شوية مشاكل سوفت وير في Phase 1 جابت سمعة العربية الارض , و المفروض انها اتصلحت مع الفيس ليفت في كل العربيات اللي نازلة و اللي موجودة اتعمل لها software update

بالنسبة للتسارع العربية مشهورة ان طلعتها تقيلة شوية و تسارعها ما يتقارنش بالعربيات ذوات المواتير الحامية زي السيراتو و الالنترا و السيفيك , و بالنسبة للسرعة القصوى الناس عدت بيها ال200 عادي , انا عن نفسي وصلت بيها 190 قبل كده و ما زودتش
و فيه كلام ان سبب ضعف تسارعها الفتيس الاتوماتيك و انها في المانيوال تسارعها حلو

بالنسبة للثبات فالعربية مشهورة ان ثباتها كويس اوي رغم انها عالية عن الارض , و ان عفشتها تورشن بيم

**J A G U A R** · 08-01-2014 03:59 PM

شكرا على المجهود

**تامر.محمد** · 08-01-2014 05:17 PM

دي صورة الفتيس

الكماليات

كاسيت phase 1 , اسمه tuner list , بيشغل CD Audio بس , مع 4 سماعات و تويترين اماميين و مش عارف فيه خلفيين ولا لأ , مع امكانية التحكم في نسب توزيع الصوت بين سماعات الامام و الخلف و اليمين و الشمال , مع امكانية التحكم في مستوى الbass و الtreble , و خاصية ارتفاع و انخفاض درجة الصوت تبعا لسرعة السيارة , و خاصية RDS في الراديو (بيكتب اسامي المحطات)
شاشة معلومات الكاسيت مش في كاسيت نفسه لكنها في التابلوه من فوق منفصلة عن الكاسيت

الكاسيت فيه حماية ضد السرقة , مجرد ما اتفصل عن الكهربا لازم يدخل له الPIN Code الخاص بيه عشان يشتغل تاني , طبعا الكود ده موجود في التوكيل برقم شاسيه العربية

كاسيت phase2 اسمه Update list , نفس الامكانيات السابقة بالظبط , بالاضافة لأمكانية تركيب وصلة AUX له , و من اول الفئة التانية بيشغل CD MP3 كمان

multi function , امكانية التحكم في الكاسيت من الطارة

نيجي للتكييف , ما نقدرش نقول انه التكييف القوي , هو معقول اوي لو العربية ماشية حتى لو الجو حر اوي , انما لو العربية واقفة في الحر و الشمس و شغلته بيبقى اداؤه دون المستوى
ناس بتحل ده بانها تلغي السخن و ناس بتركب عازل حراري و ناس ركبت مروحة اضافية قدام سربنتينة التكييف و كل الحاجات دي بيها مواضيع هنا في القسم

التكييف بينزل بكر في اول فئة

و من تاني فئة بينزل تاتش و اظنه dual zone

و درج تابلوه مبرد مع التكييف

- فوج لايت أمامى و خلفى تقريبا في كل الفئات ماعدا المانيوال
الامامي في الاكصدام و الخلفي في الفانوس

- ٦ أيرباجز في كل الفئات

- مثبت و محدد سرعة (مش في كل الفئات)
تشغيلهم من الزراير اللي عند الركبة الشمال

و التحكم في السرعة و التفعيل و التوقيف من عجلة القيادة

, و عموما مثبت السرعة بيفصل مع الضغط على البنزين او الفرامل كمان و شغال على ميموري فممكن استرجاع نفس السرعة

- التحكم في شدة اضاءة التابلوه من الزراير اللي عند الركبة الشمال
- التحكم في ارتفاع و انخفاض اضاءة الفوانيس الامامية من الزراير اللي عند الركبة الشمال

- حساس مطر , تشغيله من تاني تكة في دراع المساحات على اليمين

- حساس أضاءة
تشغيله بضغطة طويلة على الزرار اللي في طرف الزراع الشمال
- follow me home

- ٣ ستائر خلفية و جانبية

- مراية صالون مع امكانية التعتيم

- مرايات ظبط و ضم كهرباء , التحكم فيها من الزرار اللي في اعلى الدراع اللي على الباب (مش في كل الفئات)

- اربع زجاج كهربا one touch مع anti pinch و مكن رفع مع الريموت

- نظام Start/ Stop
- كارت رينو الذكى للفتح و الغلق و التشغيل
العربية مالهاش مفتاح , الكارت هو الريموت , و بتشتغل start-stop

- مسند يد امامي
و اخر خلفى مع حامل أكواب في الخلفي (مش في كل الفئات)
و حامل اكواب امامي (عقيم)

- كنبة خلفية تطوى ٦٠/٤٠

- انوار فى اعتاب الاربع بيبان (مش في كل الفئات)

- اضواء قراءة امامية و خلفية

- عتب داخلي ستانلس (مش في كل الفئات)

- كومبيوتر رحلات بيعرض استهلاك البنزين اللحظي و المتوسط و العربية استهلكت كام لتر بنزين من اخر reset و مشيت مسافة قد ايه و البنزين اللي فيها يمشيها قد ايه و ايه في ابواب العربية و الشنطة مفتوح

فرش جلد (مش في كل الفئات)

كرسي السائق يتحرك للأمام و الخلف و لأعلى و اسفل و ظهره يتحرك للأمام و الخلف , و كرسي الراكب يتحرك للأمام و الخلف و ظهره كذلك

عجلة قيادة تليسكوبية تتحرك في اربع اتجاهات

استعنت هنا بالسرد الرائع اللي في الموضوع ده , و لسه التقرير ما خلصش , بس هاخد هدنة لأني تعبت :)
http://www.nilemotors.net/Nile/398440-a.html

**saddam** · 08-01-2014 06:30 PM

صديقي المواطن
جهود مشكورة ومصروف عليها وتقرير متعوب عليه لعربية أراها ظلمت في مصر وتقرير نفعت به من المهتمين من زملائك أعضاء المنتدى الكرام ولا تحرمنا وتحرمهم من كل جديد لك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

**تامر.محمد** · 08-01-2014 09:48 PM

استكمالا للكماليات
كل شوية افتكر حاجة :D

- سينسور حرارة الجو و بيعرض درجة الحرارة على يمين شاشة الكاسيت

- دعم لفقرات الضهر في كرسي السائق (مش في كل الفئات)

- مسند رأس امامي متحرك في 4 اتجاهات (مش في كل الفئات)

- child lock في باب السائق بيمنع فتح الابواب او النوافذ الخلفية ( في اول فئة بيمنع فتح النوافذ بس اما منع فتح الابواب فبيبقى يدوي من الباب الخلفي نفسه زي اي عربية)

- جنوط سبور متعددة الاشكال في الاغلب مقاس 16 و احيان قليلة مقاس 17 بس ده ما نزلش مصر , و اول فئة و الفئة المانيوال بتنزل بجنوط حديد 15 ولها طاسات من كذا شكل
رأيي الشخصي ان اللي بيمشي على ارض مكسرة او مليانة مطلبات و حفر كتير يخليه في ال15 , لا 16 ولا 17 , مش بتوع مصر دول

- اماكن تخزين كتير

كان حقي قلت انظمة الامان قبل الكماليات , قلنا ال6 ايرباج , نكمل

- ABS - EBD

- احزمة امان امامية مزودة بخاصية الشد المسبق و متحركة لأعلى و اسفل

- احزمة امان خلفية

- تصفيح اسفل موتور السيارة

- نظام تثبيت كراسي الاطفال ISOFIX , اللي للأسف مالوش لازمة في بلدنا لأن كراسي الاطفال اللي فيها النظام ده غالية بغباء :(

ناقصها كماليات ايه ؟
بالنسبة لي ناقصها الDRL و البلوتوث و الGPS
و من انظمة الامان ناقصها الESP

**تامر.محمد** · 08-01-2014 10:28 PM

دلوقت انا مالك للعربية دي لمدة سنتين , و 48 الف كيلو
غيرت فيهم بطاحة و قاعدتين موتور و مكنة حزام امان السائق و مفروض هاغير مقصات لأن الجلب باظت
و ماكينة رفع زجاج باب السائق , و دليل زجاج باب الراكب الامامي (حتة بلاستيك) , و طرمبة مياه مع صيانة ال60 , و مفروض اغير قاعدة شكمان وسطى
و عندي فيها تسريب زيت من جوان الكرنك الخلفي مفروض اعمله برده

و العربية في المجمل عمرها دلوقت 4 سنين و 68 الف كيلو

- اجمالا و كحديث عن الاعتمادية , العربية كما هو واضح مش ملكة الاعتمادية خصوصا من ناحية العفشة و الاجزاء البلاستيكية و الكهربية

هاحاول اتكلم عن ملاحظاتي فيما يخص العربية

- اجزاء الصالون البلاستيكية نفسها جيدة جدا كشكل و نضافة لكن في المقابل قوة احتمالها ضعيفة جدا و سهل كسرها او كسر الpins اللي مثبتاها , و دي نقطة سخيفة

- العربية مش بتاعة شد و حرق و تجميع و تسارع , و ان كنت لما بتقول لها اجري ما بتقولش لأ

- الفتيس زي ما ذكرت ما نالش احترامي

- الموتور انا حاسه قوي و اللي مكتفه الفتيس الاتوماتيك , في نفس الوقت حاسسه خشن مش ناعم

- على سيرة الخشونة , الموتور جوة العربية هادي جدا و هي واقفة , و هادي و هي متحركة بسرعة ثابتة على RPM لحد 3 مثلا , و صوته بيعلى في التسارع و بيبقى مسموع و واضح

- الرؤية من الامام كويسة جدا و من ورا معقولة اوي , لكن ساعة الركنة بتبقى شنطة العربية بالنسبة لي كأنها في عربية تانية , حل النقطة دي كان تركيب باركينج سينسورز , و انتهت للأبد

- ثبات العربية كويس جدا و ان كان اوقات باحس بقلق بسبب ارتفاع العربية و سريان الهوا تحتها

- بس لما باسوق بعنف شوية الbody roll ورا بيبقى عالي و محسوس

- كل الناس قالت لي ان العربية حساسة لصياناتها و لازم تتعمل في مواعيدها و ما تتفوتش

لو هانتكلم على المميزات فهي كتير

- العربية مبدئيا و الواحد راكبها و التابلوه بتاعها قدامه حاسس انه راكب عربية محترمة , و من ساعة ما الواحد ركبها و الستاندارد بتاعه ارتفع بخصوص الinterior بتاع العربيات و عربيات كتير كان بيعتبرها معقولة من جوة بقى بيعتبرها فقيرة

- الباور بتاعها كهربا , مريح جدا على السرعات البطيئة و بيتقل شوية على السرعات , مش مقلق خالص و العربية سريعة

- الاتساع الداخلي رائع سواء في الطول او العرض

- الخامات الداخلية سواء في التابلوه او الابواب محترمة جدا

- العفشة ناعمة و مريحة بنسبة كبيرة , خصوصا في الجنوط ال15

- العزل الداخلي للصوت ممتاز , اجمالا تصميم العربية مركز على راحة الركاب بنسبة كبيرة

- الكاسيت مش عدة صوت واو يعني بس صوته حلو جدا

- تكنولوجيا تعامل العربية مع اللي سايفها سواء في الرسايل على الشاشة لما الواحد يركب و قبل ما يدور و في انها بتفكره بقرب موعد الصيانة و في اضواء الصالون اللي بتنور لما الواحد يركب و لما يفتح الباب و هو نازل بتحسس الواحد ان العربية بتحترمه , طبعا الحتة دي بقت عادية في فئتها دلوقت

لسه ما خلصناش

-

الموضوع: للمقبلين على شراء ميجان2 , تقرير بالصور ... اتأخر كتير جدا

LinkBack

أدوات الموضوع

عرض

للمقبلين على شراء ميجان2 , تقرير بالصور ... اتأخر كتير جدا - انشر الموضوع فى :

-

-

-

-

المواضيع المتشابهه

عزيزي المقبل على شراء ميجان2 - او راكبها و مش واخد باله - قطع الغيار

تقرير بالصور عن شراء قطع غيار للاكسيل والاسعار

ألوان الفلوانس الفيس ليفت المتاحة بالصور...للمقبلين على الشراء

موضوع يمكن ما يهمش ناس كتير , نواكل تابلوه ميجان2 !

(هام للمقبلين على شراء سياره مستعمله او جديده) هساعدك فى الاختيار

الكلمات الدلالية لهذا الموضوع

المفضلات

المفضلات

ضوابط المشاركة