سلام عليكم
مبدأيا أنا معايا فانتازيا 2013 عاملة 42 ألف كم
يعني العربية جابت طنابير وهي مكملتش 15 ألف كم وقولتولي عيب مستهلك وملناش فيه وقلنا ماشي
الفتيس فضل فترة يرزع في النقلات من نr ل d وهي لسه مكملتش 10 آلاف كم وقولتوليه مفيهوش حاجة وسليم وقلنا ماشي
والأوتوماتيك بتاع الإزاز جمب السائق على طول بيعلق وتدحكوا عليا وتقولولي مش موجود قطعة الغيارعندنا وقلنا ماشي
وتيل الفرامل إللي غيرته أنا بره التوكيل عند 27 ألف وأنا بعمل صيانة ال 30 ألف كنتوا عايزين تقرطسوني وتغيروا التيل تاني لولا إني رفضت وقلنا ماشي
لكن إن ولاعة السجاير تبوظ لوحدها من ساعات مكانت العربية عاملة 5 آلالف وأطلب إنكوا تغيروها على حساب الضمان تقولولي كمان عيب مستهلك لأ بجد كده كتير,لأ وإيه الصنايعي بتاعهم (توكيل القطامية) حشر ولاعة السجاير في السوكت وبعدين معرفش يطلعها وياريته سابها مكانها لأ ده كمان جرحلي السوكت بتاع الولاعة جامد
وده تقيمي ل الأربع توكيلات إللي جربتهم من ساعت ماجبت العربية
1- مركز الشرقاوي إللي عند السندباد : زفت وقلالاة الأدب كمان وبجحين
2- مركز الأقصى : سمكرلي خبطة في الرفرف زي الزفت وخد باكو على خبطة تافهة
3- مركز غمرة : هو صحيح قفل دلوقتي بس برضه زفت عربيتي كانت خلصانة ومعرفتش غير بعد أما خلصت 3 ساعات
4- مركز القطامية وده حدوته لوحده :
وأنا واقف إنهارده بغير زيت العربية (إللي خد 7 ساعات بالمناسبة) قدام باب الصيانة في توكيل القطامية كل إللي خارج وإللي داخل عمال يسب ويلعن في اليوم إللي جاب العربية دي بسبب توكيلها
منهم واحد كان جاي بيتخانق معاه فانتازيا عاملة 8 آلاف كم فبيحكيلي بعد الخناقة إن فتيسها كان بايظ قالوله بعد تعب قلب هاتها وحنغيرلك الفتيس
وتخيلوا عملوا إيه دحكوا عليه وغيرلوله الصواميل وحساس وقالوله غيرنالك الفتيس كامل وطبعا هو استلم العربية إسبوع وكان الفتيس رجع ينتش تاني ولقيته راجع إنهارده وماسك في خناقهم وبيسرقهم وبشد في شعره من العربية وتوكيلها
وحكاوي من ده كتييير طول منا واقف
بجد حرام عربية محترمة زي دي ياخدها توكيل زي ده
ونصيحة للي عايز يجيب سكودا هاتها خليجي أحسن لإ الضمان زي قلته ملوش أي لازمة
توكيل آرتوك شوية حرامية وعايزين يطلعوا مصلحة من أي حاجة وخلاص وسواء العميل رضي أو مرضيش ولاتفرق معاهم