1000 مبروك عليك اللوءلوة
عرض للطباعة
1000 مبروك عليك اللوءلوة
مبروك وربنا يديك خيرها ويبعد عنك شرها
الف مبروك وربنا يديك خيرها ويكفيك شرها
الله يبارك فيك يا ا/ رامى
هو التوكيل مبعتش معايا حد والصراحة هو الامر مش مستاهل وبالنسبة لتفاصيل الترخيص انا ذكرتها فى الاول هو المبلغ الاجمالى 1215 جنيه عبارة عن 45 جنيه ورق ترخيص ل3 سنين وتأمين اجباري 320 جنيه وضريبه 850 جنيه الموضوع كله اخد منى ساعة وربع منهم وقت كبير على ما لقيت ركنة و حوالى ربع ساعة بتملا ورق الرخصة
بالنسبة للفرش اولا انا عاشق للون البنى فأكيد لما حبيت اختار لون العربيه اخترت اول رغبة موكا وتانى رغبة جراى وعلى فكرة انا اخترت الجراى من غير ما اشوفة لانه مكنش موجود فى التوكيل لما رحت احجز المهم رحت لجنز كار علشان افصل فرش جلد انا كنت ناوى بردة على درجة من درجات البنى والصراحة انا كان معايا مراتى ومكنتش مقتنعة بأختيارى المهم بردة اخترت درجة من درجات البنى بالنسبة للاسعار هو قالى فى نوعية ممتازة بتبتدى من 1200 جنية بس للاسف الشديد اللون اللى عجبنى مكنش في منه الا سعر واحد بس 2200 جنيه وبالنسبه لفرش الارضية قالى الخامة الصينى ب 300 والاوربى ب 400 وكان اتكلم فى موضوع العتب بتاع العربية اللى انا اتكلمت فيه قبل كدة
بالنسبه للدوسات انا كنت شارى من شارع دمشق دوسات حلوة جلد فى موكت ب 140 جنيه ارجو اكون افدتك
وانا اسف لو فى اخطاء لان انا بكتب من الموبايل
اشكرك علي ردك الكريم
بس عندي سؤال بالنسبة للترخيص , انت اشتريت طفاية مثلا ولا ايه ؟؟ كان ايه الورق الي معاك ؟؟ انت قولتلي انك روحت في مدينة نصر , لو تقولي روحت امتي ؟؟
انا كنت عايزك تقولي روحت شباك رقم كذا واشتريت كذا ودفعت كذا ورفعت رقم السيارة كده .. دي التفاصيل الي انا كنت عايزها ولو مفهاش تعب ليك
ومبروك علي السيارة والرخصة ويارب يحميك ويحفظك ويكفيك شرها وشر اعين الناس
تحياتي
ا/رامى انت شكلك عاوز تفاصيل التفاصيل بس مفيش مشكله وانا تحت امرك
بص ياسيدى انا كان معايا كيا ريو 2013 لما رحت ارخصها فى شهر 10-2012 مكنش معايا شنطة اسعافات ولا مثلث عاكس بس الاوراق والطفاية المهندس اللى فى المرور قالى مينفعش لازم الشنطه و المثلث واضطريت امشى واجى تانى يوم
انا استلمت البيجو يوم 8-1-2014 ورحت رخصتها تانى يوم علطول انت محتاج يكون معاك البطاقة الشخصيه وصوره ليها ويكون معاك طفاية حريق صالحة لو مش معاك هى بتتباع فى المرور ب 140 جنيه اللى هيا بفاريا احسن حاجة انا كنت بالصدفة فى وسط البلد من اسبوعين وجبتها من هناك ب 120 جنيه بفاريا بردو وكان فى نوع تانى تبع الانتاج الحربى ب 110 جنيه المهم انت بدخل العربية وحدة المرور على الباب واحد هيديك ورق الفحص من غير ولا مليم تخش بيها فى المكان المخصص للفحص هتلاقى عامل جة علشان يرفعلك رقم الموتور ورقم الشاسيه وهيحطهولك فى ورق الفحص وهتلاقى كذا مهندس واقف بتدى له ورق الفحص وهو بيملاه بس بيتأكد من لون العربيه واذا كان فيها فاميه وبعدين يمضى عالورق ويقولك طلع العربيه برة وحدة المرور وهنا تبدأ المعاناه فى البحث عن ركنه وخصوصا لما تكون العربيه جديدة وتكون خايف حد يظبطها المهم بترجع على شباك الخزينة بتطلب منه ورق رخصة على حسب سنه او اكتر انا اشتريت 3 سنين ب 45 جنيه وبعدين بتروح على الجهة المقابلة لشباك الخزينة بتلاقى كذا شباك لبتوع التأمين الاجبارى بتختار واحد بيديلك اصل وصورة من التأمين بتحتفظ بالصورة وتخلى الاصل مع ورق الرخصة وبعدين فى نفس المكان هتلاقى شباك للتصوير هات منه دوسيه ب جنيه وفى نفس المكان هتلاقى بتاع الطفايات هيشيك على الطفايه اللى معاك وبعدين يختملك ورقة مخصصة للطفايه دى كنت اخدتها مع ورق الفحص وبعدين تجمع ورق الفحص مع ورقة التأمين الاصلى مع صورة البطاقة مع ورق الرخصة بعد ما تملاه وتحطهم فى الدوسيه بعدين تروح للمكان المخصص لتقديم الورق وهما حوالى 5 او 6 شبابيك مش مترقمة هو بس مكتوب عليهم رخصة جديدة هم كل الشيابيك رجاله ما عدا شباك واحد عليه واحدة ست وهى محترمه جدا وبتنجز الصراحة هتشيك على الورق وبعدين تديك ورقة بمبلغ الضريبه تروح تدفعه بالخزنة هيديلك نسختين من الايصال ترجع واحد للشباك اللى قدمت عليه الورق والتانى تحتفظ بيه وبعدين تروح تستنى على شباك تسليم الرخص على ما يندهو اسمك وبعدين تروح تستلم اللوحات والف مبروك
بالنسبه لموضوع المثلث وشنطة الاسعافات اللى ذكرته فى الاول فى البيجو المهندس شاور لى بأيدة فى ما معناه مش مهم عالعموم خليهم معاك لان هما بحالات
كل اللى ان ذكرته مرور مدينة نصر اللى بتعامل معاه من فترة طويلة فأنا مش عارف لو هيكون فى اختلاف من مرور للتانى
ارجو اكون وضحت كل شئ ا/رامى ولو في اى استفسار انا تحت امرك
طبعا انت بيبقى معاك ورق العربيه اللى بتستلمه من الوكيل او المعرض