الموضوع: تعالوا نتعلم English [حفظ كلمات] #1

السلام عليكم ورحمة الله وبركاته

هحاول أعمل سلسلة نستفيد منها كلنا ونشجع بعض على تعلم اللغة الإنجليزية الصحيحة واحدة واحدة وبالتدريج بس بأسلوب منظم بعض الشيء علشان منملش ومنزهقش ومحدش يتوه
هبدأ السلسلة بحفظ أهم 5000 كلمة متداولة يوميا في حياة الرجل الأمريكي العادي ، وهبدأ بالكلمات لأنها مفتاح الجمل ومفتاح اللغة عموما ، لو حفظت كلمات هتعرف تتكلم إنجليزي وتكون جملة حتى لو تركيبها غلط من ناحية الجرامر بس اللي قدامك هيفهم انت عايز تقول إيه
بعد ما نحفظ الكلمات دي هنبدأ نخش في تفاصيل تانية زي الجرامر وتكوين الجمل وما شابه بس مش هنستعجل عايزين نخلص حفظ الكلمات الأول
أنا قسمت ال5000 كلمة دول لـ100 جزء كل جزء فيه 50 كلمة وجمعت كل جزء في ملف وورد مقسم إلى عمودين كل عمود فيه 25 كلمة وأمام كل كلمة مساحة فاضية لترجمة الكلمة وكتابة معناها
حضرتك كل يوم هتفتح ملف من دول وهتطبعه إن أمكن وهتفتح ترجمة جوجل وهتبحث عن الكلمة دي وتكتب معناها بجوار الكلمة ولو في أكتر من معنى حاول تكتب أشهر 3 معاني للكلمة جنب بعض ، وحاول تضغط على علامة السماعة اللي في الصندوق تحت الكلمة اللي هتكتبها بالإنجليزي في ترجمة جوجل علشان تسمع نطقها الصحيح
مش عايزك تقلق وتستكتر موضوع حفظ 50 كلمة كل يوم لأن معظم الكلمات دي انت عارفها وحافظها وبتستخدمها لأني جمعت أكتر 5000 كلمة (متداولة) يعني أكيد مر عليك معظمهم قبل كده وهتلاقي كلمات هايفة جدا زي and أو like أو love أو what أو she وما شابه ، برده ترجمهم وبص على ترجمتهم متكسلش علشان ممكن يطلعلك معاني جديدة للكلمة مكنتش تعرفها وبرده تسمع النطق الصح بتاعها
بعد كده تطبق الورقة وتخفي الترجمة وتراجع على اللي حفظته واللي تلاقيك مش حافظه كويس هات قلم أصفر عريض وعلّم على الكلمات الصعبة في الورقة وسيب الورقة وخش في اللي بعدها لحد ما تخلص ال100 ملف وتجمع الكلمات الصعبة في ملف لوحده وتراجع عليهم تاني هتلاقيهم قلوا جامد من 5000 إلى 500 مثلا تحاول تحفظهم من جديد لحد ما تخلصهم يبقى انت كده حافظ أشهر كلمات في اللغة الإنجليزية وتقدر تخش بقلب جامد في الجرامر وما بعده علشان تقدر تركب الجمل تركيبة صحيحة بالكلمات اللي حفظتها
كل يوم هحاول أعمل موضوع فيه ملف ال50 كلمة بتاعة كل يوم
وأرجو اللي هيكمل معايا وهيحمل الملف يسجل حضور في الموضوع علشان نتابع بعض ونبقى عارفين مين اللي معانا ونقدر نفيد بعض

ده رابط ملف أول 50 كلمة
01

وده رابط ملف فاضي مقسم برده لعمودين يستوعبوا 50 كلمة لأي كلمات ممكن تقابلها في سكتك وعايز تسجلها وتترجمها علشان تحفظها
lines

أشوفكم في موضوع تحميل الملف التاني :)