الموضوع: تجربة قياده غريبه ومبهره لسيراتو 2014

السلام عليكم ورحمة الله وبركاته
ندخل علي طول في الموضوع بس هاحكي بالتفصيل :
من تلات أيام روحت أنا وجاري وصديقي دكتور محمد الي معرض كيا لتجربة قيادة سيراتو 2014 علشان كنت بقارن بينها وبين الإلنترا الفيس لفت _بعد ماخرجت الكورولا والفليونس من حساباتي_
ولما دخلت عرفت ان التوكيل عامل عرض علي السياره لأخر الشهر ,اللي هو قسط تمن السياره بدون فوائد لمدة خمس سنوات (تمنها 5500 دينار كويتي- تقريبا 130 ألف جنيه)
المهم طلبت من المندوب اني أركب فئة الفولي لودد اللي بجنوط 17 وفعلا ركبتها وماكانش يهمني أوي اني أمشي بيها علي طريق نضيف لأن العربيه مش هاتظهر قسوة أو ليونة عفشتها أوي وأخدتها وطلعت بيها علي ناحية توكيل هوندا وبيجو ومازدا علشان الطريق مش مرصوف نهائيا يعني عباره عن تراب وفوقه حصي وأسفلت قديم جدا متأكل يمكن من عشرين سنه ماإترصفش وتعمدت اني أمشي براحتي في الأول وفعلا ماحسيتش بأي حاجه ولا دبدبه ولا أي شيء نهائيا وقاعد مستمع تماما بالعربيه فقولت خلاص نجري بالعربيه شويه ونشوف ايه اللي هايحصل وفعلا لم يختلف أداء عفشة العربيه تماما وماكنتش حاسس بأي شيء حتي لما كنت باخد بعض الحفر البسيطه وكنت كل شوية أتأكد من صديقي ان هو كمان مش حاسس بأي دبدبة أو رزع أو عدم راحه داخل العربيه وكان كله تمام.
خلصنا جزء القيادة العادي وسيراتو كسبت الرهان اللي أنا كنت متوقع انها هاتفشل فيه(_كنت ميال لسه للإلنترا_)
الجزء الأهم بقي لما قلبت الفتيس علي المانيوال وابتديت أسحب بالعربيه عشرين أربعين ستين تمانين وقلت لصديقي أنا هاجرب أخد الحفره الصغيره دي وهوب سمعت صوت زي الانفجار والعربيه اتهبدت بدون مانحس بحاجه نهائيا داخل العربيه فسئلت صديقي: هو في أيه؟ انت حسيت بحاجه؟ فرد وقالي مش عارف أنا ماحسيتش بحاجه, وفضلت مكمل بالعربيه عادي لكن لاحظت ان في اتنين من عمال البيجو عمالين يبصو علي العربيه فكملت سواقه وأنا ماشي عادي ومش حاسس ان في مشكله ولما جيت لفيت بالعربيه لقيت ان الدركسيون بدأ يحدف شمال علي خفيف فركنت وقولت أنزل أشوف في أيه في العربيه لقيت الكاوتش اليمين ناحية صديقي فيه جزء منه أتقطع ومهوي خاااااااااالص فركبت العربيه وجريت بيها لحد المعرض ووالله ماكنت حاسس ان الكاوتش مفرقع, والعربيه كانت ماشية طبيعي وماكانش في أي دبدبه نهائيا وركنت العربيه وقولت أخد عربيتي وأشوف الحفره اللي عملت كده في الكاوتش ,والاقي حتة الحفره دي عباره عن مصرف لمية المطر!!!!. وماحبتش أنزل التقرير الا لما رحت تاني امبارح وصورته علشان الناس تشوف مدي تطور العربيات الكوري أد ايه.( أنا كل عربياتي ياباني 100% وعمري ماسوقت كوري نهائيا)
ودي صور للمصرف:


وخدوا بالكم من الطريق اللي كنا ماشين عليه عامل ازاي مافيش رصف خالص:

بصراحه بعد التجربه دي عرفت ان مافيش حاجه خلاص اسمها كوري وياباني والكلام ده. دي الكورولا بتاعتي خدت حفره عاديه أصغر من دي بمرااااااحل والكوبلن عمال يطقطق وحاسس بأنه العفشه عماله تحشرج.
- من خلال التجربه دي أقدر أقول السيراتو تتفوق بجداره علي الألنترا اللي أنا برضو رحت جربتها إمبارح وعارف عفشتها الناعمه من زميلي. ومش التفوق في العفشه بس دي كمان من الاوبشنز اللي موجوده فيها منها التحكم في تقل أو خفة الدركسيون ودي من أهم الميزات اللي في السيراتو.