الموضوع: عايز اتقدم لواحدة ومش عارف ازاي

المشاركة الأصلية كتبت بواسطة أبو آسر

أولا هما غالبا هيرفضوا مسألة الانتقال للعيش في الزقازيق لأن غالبية القاهريين بيبصوا للمحافظات على إنهم فلاحين وكده مع إنك لو دورت على أصل كل واحد فيهم هتلاقيه يا إما صعيدي يا إما فلاح (واقع)
:)
أنا معرفش انت ظروف شغلك إيه هل هتشتغل في القاهرة ولا هتفضل مستقر بالزقازيق وهتشتغل هناك
لو هتشتغل في القاهرة ومخطط لكده فالأمر سهل مش لازم شقة تمليك دلوقتي ممكن تتجوز في إيجار جديد لحد ما ربنا يكرمك وتجيب الشقة التمليك كل الناس بتبدأ كده لحد ما ربنا يكرمهم يبدأوا يجيبوا الشقة والعربية والكلام ده
لكن لو هتستقر في الزقازيق فنسبة كبيرة جدا إنهم يرفضوا كده ونصيحتي لك في الحالة دي تشوف واحدة كويسة من نفس المحافظة لأن حتى لو هما وافقوا إنكوا تعيشوا في الزقازيق هتحصل مشاكل من ناحية أنا عايزة أروح لأهلي طب أنا مش فاضي اليومين دول طب هروح لوحدي .. لأ مينفعش تسافري لوحدك .. طب وصلني .. لأ مش فاضي .. وتحصل مشكلة من مفيش ، وكذلك ممكن هي متتأقلمش على العيشة في الزقازيق فتحصل مشكلة برده فبلاش لو ناوي تستقر في بلدك شوف واحدة نفس المستوى الاجتماعي برده هتلاقي كتير جدا وأنا عارف كويس إن كثير من مدن المحافظات برقبة مناطق من مناطق القاهرة العشوائية والشعبية بس هي أصبحت عقدة وخلاص تلاقي واحد أنا آسف مقصدش إساءة لحد ولكنه جربوع قاعد في عشة بيتريق على واحد جاي من المنصورة مثلا وساكن جنب الجامعة في شقة تمنها 2 مليون جنيه ويقوله يا فلاح !!
بخصوص المهر والشبكة فبصراحة معنديش علم لأني اتجوزت من أكتر من 7 سنين وطبعا الدنيا اتغيرت جامد في الفترة دي لكن أعتقد برده ده متوقف على وضعهم الاجتماعي هو اللي هيحدد وحسب الاتفاق في النهاية
وكذلك موضوع التجهيز بيبقى بالاتفاق برده لكن طبعا الزوجين شركاء في مركب واحدة فتحاولوا تقسموا الحاجة عليكم بالنص بما يرضي الله انت الخشب مثلا وهي الرفايع (السجاد والأجهزة الكهربائية والستاير وأدوات المطبخ وما شابه) وبرده حسب الاتفاق مع العلم إن المفروض أساسا يعني انت اللي بتجهز كل حاجة لأنك انت الراجل فمفروض انت اللي بتتكفل بكل مصاريف الزواج لكن بسبب غلاء المعيشة وضخامة تكلفة التجهيز للزواج فالعرف بيقضي إن الزوجين يتعاونوا مع بعض
ونصيحة بلاش المنظرة واتقوا الله في اللي هتصرفوه وهات الأساسيات والحاجة المعقولة يعني مش لازم تتجوز بتليفزيون 50 بوصة ثري دي سمارت ب5000 جنيه مثلا ويمكن أكتر !! ياعم هات تليفزيون 32 بوصة عادي ب2500 جنيه زي الفل هيأدي الغرض لأن في أولويات تانية وصدقني اللي مش بييجي النهاردة بييجي بكرة وربنا بيكرم
وبلاش فرح ب100 ألف جنيه وفرقة مش عارف منين والفرح مش عارف في قاعة إيه حرام وتبذير وربنا هيسألك اعمل فرح بسيط وخفيف ومتعصيش ربنا فيه علشان ربنا يباركلك في حياتك وزوجتك
وألف مبروك مقدما ومتنساش الحاجة الساقعة :)

شكرا جزيلا لحضرتك وعلى اهتمامك
وحكاية الفرح : انا لو عليا معملش فرح خالص لاني بحس ان فلوسه حرام وان الواحد لازم يبدأحياته الزوجية بطاعة ربنا مش بمعصيته

وعلى فكرة الشقة بتاعتي لو هبيع تتباع ب نص مليون عشان موجودة في القومية لو تعرفها بس فعلا نظرة اهل القاهرة عمرها ما هتتغير

وشكرا لحضرتك مرة تانية