السلام عليكم ورحمة الله وبركاته .
انا معايا عربية هيونداي جيتز ومن فترة كبيرة وانا بحط زيت ليكوي مولي وبصراحة مرتاح معاه والعربية كأنها اتعودت عليه .
لكن من كام شهر كده بدأ الزيت ده يختفي وبتعب على ما بلاقي وكان لازم اغير لنوع تاني عشان مرجعش للشل تاني .
سمعت هنا عن الولف بس مش عارف ماتشجعتش ليه .
وروحت موزع ليكوي مولي قالي انهم غيروا النوع بنوع تاني اسمه ميجوين وده رقم واحد في العالم وافضل الزيوت وال وال وال وال ( بصراحة نفس الكلام اللى كان بيقوله على ليكوي مولي فحسيت اني بكلم بياع اهم حاجة عنده المكسب ومش مهم العميل) .
كنت بسمع عن الكاسترول والفالفولين بس كان واحد قايلي انهم بتوع العربيات اللى مواتيرها عالية شوية .
المهم في واحد صحبي معاه النترا كان زي حالاتي برضه وراح اشتري كاسترول العلبة الدهبي وقالي ان الموتور صوته بقى رائع والعربية ناعمة وشكري فيه اخر حاجة فقولت خلاص يبقى اذن هو الكاسترول.
وفعلا من اسبوع كده كنت بعمل شوية صيانة للعربية وقررت اغير الزيت بس للاسف ملقتش غير كاسترول 5000 كيلو ( العلبة البيضاء) وبصراحة ندمت ندم السنين. صوت الموتور اتلق كانها عربية جاز . وخشونة رهيبة مع الحرق وكنت مش عارف ده من الزيت ولا موتور العربية هو اللى راح في داهية .
كنت حاسس ان الموتور بيرزع وانا ماشي والصبح بدري اول لما ادور اسمع اصوات اعجب من العجب.
بالظبط اسبوع وربنا كرمني بمحل زيوت لقيت عنده ليكوي مولي ماترددتش ثانية روحت مغير الزيت وبصراحة العربية رجعت لطبيعتها تاني .
بس انا عايز افهم هل اللى حصل ده عشان الفرق بين الزيت المعدني والتخليقي ؟؟؟
ولا مش كل الزيوت تناسب كل المواتير ؟؟؟؟؟؟ يعني ممكن نوع زيت احطه في عربيتي يديني نتائج سيئة ونفس النوع في عربية تانية يبقى رائع ؟؟؟؟؟
واسف لو طولت عليكوا