سكودا فليشيا تقرير عمل صيانة لكربراتير الموتور بنفسى
تم بحمد الله وعونه وبعد تردد كبير وتحذير اكبر من الميكانيكى فك الكربراتير بغرض تنظيفه بعدما تلاحظ خنقه السياره وتهبيب البوجيهات المتكرر كمان الدخنه السودا عند بدايه الدواره والاستهلاك الغير عادى للبنزين .. جيت الدرس بتاع عم صبحى الله يكرمه بخصوص الكربراتير كمان راعيت ملاحظات جميع الاصدقاء الكرام .. وتم فك الكربراتير بمفتاح الانكيه وفصل جميع الخراطيم والسلوك (كنت واخد معايا ورقه وقلم وبكتب فيها مكان الحاجه لعل وعسى اكون نسيت حاجه) وطلعت بالكربراتير للبيت وتم فصل جزئيه العلوى عن السفلى وتم التنظيف بالبنزين وكمان بال dw40 للمناظق اللى كان عليها كربون لازق ومش عايز يطلع بالبنزين وفوجئت بكميه الوساخه اللى ماليه الكربراتير ... المهم تم التنظيف على قد ماقدرت كمان البوابه كانت بتعلق ورشيت عليها dw40 اشتغلت تمام .. ورحت جبت قاعده جديده بعد مالقيت القاعده القديمه مشنشه (جبت قاعده حديد) وسالت على جوان لحوض الكربراتير ملقتش رحت مفصل واحد جديد كمان غيرت منقى البنزين ... وتم التركيب عكس الفك ... ودور ياباشا تمااااااااااااااااااااااا اام اسيب رجلى العربيه تبرجل وتبطل ..مره والتانيه مفيش فايده ؟؟؟؟؟؟ وبعدين ؟؟؟؟ طبعا ماكنش ينفع اروح للميكانيكى ..قفلت العربيه وطلعت بصيت على الدرس مره تانيه وتالته ..ايه اللى ناقص ؟؟؟اه طبعا ده اللى ناقص ظبط كهربا ياباشا .. نزلت تانى فكيت مسمار الاسبراتير ورحت مقدم شويه ..تمام بس فيه دخنه سوده رحت ماخر شويه لحد ماحسيت انها هاتبطل رحت رايح على مسمار السلانسيه وعليت شويه لحد ما الاربى ام بقى على 7 والعربيه صوتها هدى ومفيش تقطيع ..ربطت مسمار الاسبراتير وبطلت ودورت ورحت طالع ( اه نسيت اقول انى كمان غيرت البوجيهات) ايه ده دى مش عربيتى ..مفيش تقطيع ولا كركره والسحب بقى زى الفل ..الحمد لله عدت على خير .. طبعا قعدت فى العمليه دى بتاع نص يوم لكن احساسك وانت بتعمل عربيتك فعلا احساس مميز ... فاضل حاجه واحده بس هيه اللى مضيقانى انى لما اجى ادور العربيه بعد ركنه يوم مش بتدور من الكونتاكت فقط لازم اكون ساند بنزين علشان تلقط ولو ماسندش بنزين مش بتدور من اول مره (انا عندى طرمبه بنزين ميكانيكيه مش كهربا ) كمان السينسور شك مش شغال فهل ممكن اغير جوان الرداخ بتاع الكربراتير ولا اغير الرداخ كله ؟؟؟ وطبعا اغيره ازاى ؟؟؟ .. وبالنسبه لطرمبه البنزين اخليها ولا اركب واحده كهربا؟؟؟؟؟