تجربة سيئة مع كارفور المعادي

**mazen.com** · 13-01-2014 04:09 PM

نصيحه لكل الناس انتا اخرك تتفرج فى كارفور بس على الجهاز اللى هتشتريه وتجيبه من بره انا بعمل كده كنت عايز اشترى شاشه ثرى دى المكان الوحيد اللى كان عارضها هو كارفور رحت اتفرجت عليها واشترتها من بره من اى مراكز معتمده لنوع المنتج ملحوظه الشباب اللى بيقى واقف بيبيع ولا فاهم حاجه هو بيقرا امكانيات الجهاز من على الكرتونه من بره وشوية لباقه فى الكلام اسف على الاطاله دى كانت تجربتى وشكرا

**aminibrahim** · 13-01-2014 04:42 PM

انا روحت اشتري تلاجه من كارفور الشروق جنبي ما فيش 10 دقايق وقالولي ماعندناش عربيه وكان ومان ---
روحت طالع علي هايبر ون العاشر دفعت الفلوس تاني يوم باليل جابوها في الميعاد وفضلو متابعين يومين انها وصلت
وجه المندوب ومعاه شيال -- نا س محترمه وقعد يقولي خلي الكرتون عشان لو فيها حاجه نخدها تاني

**محمد يوسف** · 13-01-2014 04:59 PM

كارفور زبالة طول عمره..فى الأجهزة اتعامل مع "بى تك "أنضف وأضمن

**ashraf1212** · 13-01-2014 05:06 PM

أنا أشتريت من كارفور من كام سنة 2 تلفزيون بالفيزا وبعد يومين مكنش وصلهم
وحبيت أرجهم و أجيب ال جى ليد 3d
فرحت رجعتهم وعملى ريفند على الكرت
وقعدو أسبوعين علشان يظهرو فى الرصيد ورجعو بعد ما رحت البنك وظبط الكرت من عندة وقلت توبة. سبينيس ممتاز ومركاتو تخصص أجهزة و ش عبد العزيز فى تجار كتير كويسة بس مشوار وزحمة.

شكرا لنصيحة ألأخرين أدينا بنتعلم وبنعلم على الشركات اللى مابتحترمش الزبون.

**moody_687** · 13-01-2014 06:18 PM

كارفور غالي ف جميع الاجهزة الكهربائية حتى التلفزيونات
انا لسة فارش الشقة جديد تلفزيوني جايبه ب 5200 وعند كارفور ب 5499 ج والتلاجة كانت اغلى ب 300 ج ده فالايام العادية
لكن ساعة العروض معرفش بصراحة

**lonedoctor** · 13-01-2014 10:46 PM

ياباشا لو جات على كدة يبقى كويس ايه رايك انهم دبسونى فى شاشة مكسورة لتلفزيون ساسمسونج بلازما 50 بوصةوالشاب اللى بيبيع خبى مكان الكسر وهو بيفرجنى عليها وبعد لما وصلت البيت فوجئت بذلك برغم انه نبهته انها فيها شرخ فى الجنب قالى ده من الاستيكر اللى عليها وصدقته ومشيت ورجعت ليهم بعد نص ساعة رفضوا يغيروها لانى بسلامتى خلونى وقعت انى استلمتها سليمة وصاحية وبتلعب كمان
رميت لهم الفاتورة فى وش السيد مسئول خدمة العملا بعد لما كتبت عيها رقم تليفونى وقلت لهم حسبى الله ونعم الوكيل لما يصحى ضميركم ابقو اتصلوا على واذا فضل ميت حسابنا يوم القيامة فالحقوق لا تضيع عند الله ابدا
اتصلوا على بعد يومين او تلاتة واعطونى واحد جديد من سكات بدون اى نقاش

**ehabouf** · 14-01-2014 06:16 AM

انا مش حاتكلم على كارفور او غيره - بس اللي يشتري اهم حاجة يكون معاك فاتورة بجد مش بيان اسعار زي بتاع شارع عبد العزيز لأن يوم ما الضمان يعمل الدنيئة معاك وتحب تشتكي لحقوق المستهلك لو مامعكش فاتورة رسمية والا يعرفك
انا كنت مشتري مايكروويف من كارفور وباظ بعد 4 شهور وفضل يمطوح فيا لأني عرفت بطريقتي الخاصة انه واخده بدون ضمان وبيبيعه بضمان سنة
عن طريق الفاتورة وحقوق المستهلك جبت المستورد لغاية البيت عندي غيره بواحد جديد (بدون ماخليه حتى يكشف على القديم) واداني شهادة ضمان لمدة سنة - لو ماكنش معايا فاتورة بجد كان زماني عامله قفص عصافير

**mesaharaty** · 14-01-2014 10:19 AM

فى الأجهزة الكهربائية كارفور للفرجة وبس مش للشراء .
أنا متعود عند شرائى أى جهاز جديد أولا أتفرج عند كارفور وبعد كده أستقر على جهاز معين بعد عدة مقارنات فى الإمكانيات والأسعار من كارفور ومن غيره ثم آخر حاجة أتصل ببى تك لشراء الجهاز فإذا لم أجده عندهم توكلت على الله ونزلت شارع عبد العزيز وخلاص .

**أبو آسر** · 14-01-2014 12:55 PM

المشاركة الأصلية كتبت بواسطة marsguy

السلام عليكم ورحمة الله وبركاته،،،

انا عاوز أقول نصيحه عامه عشان أنا إتعلمتها بعد كتير

طبعاً المنطقي إن الواحد يشوف كذا محل لحد ما يلاقي مكان أسعاره كويسه

بس المشكله إن في أماكن زي كارفور وغيره ممكن ينزل عروض كويسه جداً على كام حاجه فقط. النتيجه إننا بنتخدع ونفتكر إن طالما الكام حاجه دول أرخص من بره يبقى أكيد المحل ده كل أسعاره رخيصه.

الواقع بقى إن المحلات دي بتلعب على النقطه دي: الواحد مننا يروح كارفور يشتري كام حاجه عليها عرض ويشتري برضه بالمره كل مشترياته من عنده وكتير من المنتجات دي بتكون أغلى من بره أصلاً. وطبعاً المحصله النهائيه إنك بتكون دفعت أكتر أو يساوي من لما تشتري من محل عادي جنب البيت مش عامل أي عروض.

على فكره الموضوع ده بيتعمل في مصر وبره مصر كمان وأكبر محل شفته بيعمل كده بره مصر هو bestbuy

شكراً

كلام صحيح تماما وده من أساليب التسويق الخادعة
أنا بالرغم من إني لسة شاري تليفزيون من كارفور خلال عيده السنوي من كام يوم بأقل من سعره برة حوالي 300 جنيه إلا إني انخدعت في شراء تابلت لصديق ظنيت إن سعره أرخص من برة برده لأنه نازل في العروض ولما سألت البائع قالي ده تمنه برة 2000 جنيه وفي العرض ب1700 واشتريته وأنا فاكره صفقة رابحة وبعد ما روحت بدور على النت لقيته على موقع سوق دوت كوم اللي يفترض إن أسعاره غالية ب1600 جنيه
فهما بيتبعوا مبدأ اعمل عرض وخصم حقيقي على 10 سلع ونزل معاهم 100 سلعة تانية بأسعار زي برة أو أغلى وهيجيبوا اللي نزلوه من ال10 سلع أضعاف مضاعفة هما ينهبوا واحنا ناخد على دماغنا بسبب الغش والخداع وقلة الضمير

-

الموضوع: تجربة سيئة مع كارفور المعادي

LinkBack

أدوات الموضوع

عرض

-

-

-

-

-

المواضيع المتشابهه

كارفور المعادي لميدان المحطة - المعادي رايح جاي

من كارفور المعادي للنادي الاهلي (الجزيره)

من المهندسين الي كارفور المعادي

كارفور المعادي مواصلات

عايز اروح كارفور المعادي من المنيل

الكلمات الدلالية لهذا الموضوع

المفضلات

المفضلات

ضوابط المشاركة