الموضوع: جاز مع البنزين؟؟؟..الى اخى mohsen128

يا عمنا: اذا كنت لسه ما فكتش التانك معلش اتعب شويه وحط فرشه تحت العربيه و نزل ام التانك وفضيه من الهبل اللى فيه و زوده ببنزين ثافى الله لا يسيئك ماتخلليش الناس تجيب فى سيره العربيه ماهياش ناقصه ورجاء تبعت سلام حار جداً ملهلب وملسوع للباشا اللى بيفهم وقالك حط بنزين على جاز وياسلام بقى لو ماكانش جاو بقى وكان سولار....صباح الخير
عشان تبقى عارف حاجه : انضغاط الجاز اعلى من انضغاط البنزين بمعنى ان حرق واحد سنتي مكعب من الجاز ( الكيروسين ) بيدى كمية غازات ناتجه عن الاحتراق اعلى من اللى بيديه واحد سنتى من البنزين .ده اولا
ثانياً: وده الاهم بقى ان درجه الحراره التى يشتعل عندها الكيروسين اعلى من اللى بيشتعل عندها البنزين وياترى علرف ليه السبب؟ اقولك انا ايه السبب : البنزين بيتبخر عند درجات حراره قليله اى بيتفكك من بعضه وبيصبح جزيئاته حره عند درجة حراره قليله مما يعطى لهذه الجزيئات الفرصه الاكبر للاتحاد مع جزيئات الاكسجين فى وجود محفز حرارى بسيط للاتحاد لينحل جزيئ البنزين الى ماء و ثانى اكسيد الكربون اللى هيه الفرقعه اللى بتحصل مع الشراره وبيكون الناتج الحرارى عن الاشتعال اقل فى الكم....
نيجى بقى للباشا الكيروسين ( الجاز) ده بقى حماده تانى ازاى؟ الباشا تقيل ورزين وهادى ومبيتأثرش بالحراره العاديه بتاعة الجو وجزيئاته بتحب الترابط الاسرى بينها وبين بعضها ومافيش حد يقدر يفرقهم عن بعضهم الا اذا بحركه بسيطه قللت التوتر السطحى بتاعهم وفردتهم على سطح وخليت ترابط جزيئاتهم اقل( زى مابتعمل فى البابور بتاع الجاز لما تيجى تولعه بتحط شوية جاز على الكوبشه وبتولع الكبريت فى طرف الكوبشه وتلاقى الكبريت انطفى لو اتغرق من الجاز...صح؟) او عملت حاجه تانيه : سخنت الكيروسين وهنا بقى مصيبه بتحصل الا وهى ان الجاز جزيئاته ببتحفز وتبدأ فى التبخر وبتصبح فى حالة اصاره ومستعده للاتحاد بالاكسجين كالبنزين لان جزيئاتها اصبحت شبه حره ولكن مع الفرق الشديد لان جزئى الكيروسين بيعطى كميه اكبر من بخار الماء وغاز ثانى اكسيد الكربون عند احتراقه مع ناتج حرارى اعلى من حرق جزئى البنزين لعظم كسر الرابطه الجزيئيه للكيروسين اثناء اتحاده مع الاكسجين .
وهنا تأتى الفكرة الالمعيه وتقول لى : الله طب ما ده يعنى لو انا استخدمت البنزين كمحفز اشتعال للكيروسين بخلطهم زى ما الباشا الميكانيكى عمل معايا واستخدمتهم كوقود سأحصل على قدره هائله من المحرك وهاأقولك دى قكرة عظيمه جداُ وفعلاً ستحصل على القدر الهائل من الطاقه داخل المحرك ولكن الخواجه مصمم المحرك على قدر معين من القدره الانفجاريه للبنزين وحاسب مقدار ما سيوصله اذرع المكابس للمرفق او الكرنك وحاسب قدر الاحتكاك الحادث نتيجه العزم على ركب المرفق عند وصول عزم الدوران لركب عمود المرفق وصولا الى الدوران الناتج عن دفع ازرع المكابس له كنتيجه لاحتراق وقود البنزين دى من ناحيه .
من ناحيه تانيه توقيت اشتعال البنزين اقل من توقيت اشتعال الكيروسين بمعنى ان البنزين بيفرقع بسرعه اعلى من الكيروسين وتقولى اعرفها ازاى ؟ اقولك انت عمرك ولو حتى بالغلط جبت نار ناحية بنزين ؟لاقيت ايه؟ هاتقولى انفجر بفرقعه. جميل خالص طيب انت بقى لما البابور بتولعه لما ينطفى وبيطلع دخان ابيض (لاحظ انه شبه الدخان اللى كان طالع من العربيه عند خلط البنزين على الجاز فى عربيتك) ايه اللى بيحصل هاتقولى بيوج او بيهب اقولك هل بيحصل فرقعه بنفس الصوره بتاعة البنزين هاتقولى لا بيحصل انفجار بصورة اهدى ... هنا اقولك بالظبط ... افترض انك حرقت الاتنين مع بعص فى نفس اللحظه ايه اللى هايحصل ؟ هاتقولى ان البنزين هاينفجر بسرعه وهايتسبب فى اشتعال الكيروسين بعد ذلك ولكن بقدر حرارى اعلى ووقت اطول ...الله ينور عليك .. وده بالظبط اللى بيحصل فى غرفة الاحتراق عند ضرب الشراره على الخليط من البنزين والكيروسين والهواء بيشتعل البنزين متسبباً فى تحفيز الكيروسين الى تفكك جزيئاته واتحاده بالمتبقى من الاكسوجين(هههههه) يعنى الاكسوجين اللى ماتحدش مع البنزين الموجود فى الخليط متحولا الى ايه تفتكر؟ الى اول اكسيد الكربون وجزء بسيط من يخار الماء والباقى بخار كيروسين ابيض اللون شبيه للدخان الابيض المنصاعد من وابور الجاز المنطفئ يبقى اللى فاضل ان سعادة الباشا الميكانيكى يرمى عود كبريت فى الشكمان ويكمل ولعة بابور الجاز اللى عمله من محرك عربيتك...
ولكن فيه محركات كيروسين؟ اه فيه ولكن لايحدث الخلط المهبب اللى عمله الباشا معاك ... اللى حاصل انهم بيشغلوا المحرك اولا على البنزين لرفع درجه حرارته الى درجة حراره تطاير الكيروسين وتحويله لصورة قابله للاتحاد بسهوله مع اكسجين الهواء الجوى ثم يتم تحويل المحرك للعمل بصورة كامله على الكيروسين الساخن فيتم الحصول على قدر عالى جداُ من الطاقه وعزم هائل فى دوران المحرك وساعتها سيتم الاستفاده الكامله بكل جزئي من الوقود وبالمناسبه عادمه عباره عن ماء صافى و ثانى اكسيد الكربون ...( وده عن تجربه شخصيه فى متوسيكل عندى و جربت الحكايه دى فيه وانا ساعتها كان عندى 16 سنه ) وموجود فى مولدات الكوبوتا .
معلش على الاطاله ولكن لزم التوضيح .

يعني ممكن الواحد يحسن الجاز بكمية بنزين قليله علي التنك