عندي اعتراض علي اسعار المستعمل

**SAMEH_FOUAD** · 14-01-2014 10:18 AM

هية الحسبة بتتعمل كالاتى فى تحديد سعر السيارة المستعملة

1- سعر سوق السيارات الزيرو وصل لاية , يعنى مثلا لو الجديد غلى وزاد طبيعى تلاقى المستعمل زاد , لان انا مش هبييع عربيتى بنفس سعرها القديم , واجى ازود اكتر من تمن عربيتى مرتين عشان اشترى الموديل الجديد , فلازم انا كمان ازود عشان مادفعش الفرق من جيبى

2- مدى الرغبة الشرائية لهذة السيارة , يعنى لو عربيتى ناس كتير عايزها ومطلوبة , وسوقها ماشى زى الفل يبقى انا كدة احط السعر اللى يعجبنى على حسب حالة العربية , عكس لو عربية اصلا محدش بيفكر فيها او قطع غيارها قليلة , كل دة بينزل فى سعرها

3- دية بقى حاجة مهمة جدااا, وهية ان لو مثلا واحد بيبيع سيارة ونزل بعديها موديل بس مش بنفس كفاءة الموديل الاقدم , فدية بتخلى اولوية للناس انها تفضلها عن الموديل الاحدث , فمحدش يستغرب لما يلاقى عربية موديل مثلا 2010 بتتباع بنفس سعر 2013 او فى بعض الاحيان تقارب تمن الزيرو منها

4- التجار , التجار فى اتفاق مع بعضهم متعرفش بيتم ازاى , ممكن يتحكموا فى السوق كلة , فممكن ينزلوا سعر عربية وممكن يرفعوا سعر عربية , على حسب الطلب عليها او المطلوب منهم

**ashrafwolf** · 14-01-2014 03:31 PM

طول ما فيه اللي بيدفع هاتستمر مافيا الاسعار

**Anxs111** · 15-01-2014 06:24 AM

الموضوع فيه جزئين ...
الجشع المصري ...
العملة اللي بتفقد قيمتها .....
عموما نظريت تسعير المستعمل بتوحي بخلل فظيع ...
أي حاجة مستعملة المفروض سعرها ينزل ٣٠٪ في أول سنه وبعد كدا زود ١٠% كل سنه ...
في مصر لو فرضنا إن العمله ثابتة هتلقي في خلال سنة العربية سعرها ينزل بكتيره ١٠ ٪ ....
يعني اللي ب-٢٠٠ عايز يبيع في خلال سنه علي ١٩٠ بكتيرة ....
دة غير إن علي الأقل ٥٠ ٪ من سعر العربية عبارة عن جمرك ودة ما بيفضل في قمة العربيه مهما قدمت ...
ولذلك صعب جدا تلقي عربيه متباعة بأكتر من نص تمنها ألا لو عاملة حادثة أو عداد الخيال العلمي ...

**mrghost** · 15-01-2014 03:45 PM

طبعا الواحد بيشوف العجب فى اسعار المستعمل
بس برضه اسعار الجديد تهبل الواحد مش عارف لو باع هيشترى ايه؟

**EngAhmedSayed** · 15-01-2014 09:23 PM

طيب دة انتا موضوعك كويس نوعا ما
اما لما تنزل السوق مدينة نصر
علشان تجيب مثلا لحد حبيبك دايو لانوس او حتة هيونداى
و العربية اللى مغيره ربع و اللى فيها برومة و اللى فيها مصيبة و تيجى تكلم صاحبها يقولك سعر خرافى
يخليك تتنح
و ممكن يجيبلك الضغط و انتا واقف
ياراجل انا قعد انزل السوق 4 مرات شوفت العجب

**ahmad--ezzat** · 16-01-2014 09:30 AM

المشاركة الأصلية كتبت بواسطة metal_slime

كما قال احد الزملاء الفكرة كلها فى قيمة الجنيه اللى بتنخفض دايما امام الدولار وبنسبة كبيرة ...وده بيبان فى مختلف السلع مش العربيات وبس.... الحل الوحيد ان العملة المصرية تعاود الإرتفاع من جديد وبنسبة كبيرة وكله فى علم الغيب

انا معاك ان الجنيه سعره نزل....بس كلامك معناه ان مفيش استهبال فى اسعار المستعمل...وان المشكلها كلها فى قيمه الجنيه

انا فاكر من 8 شهور مثلا او سنه كانت الاسعار عاديه جدا
صنى ب 87 الشكل القديم اللى كانت احسن من بتاع دلوقتى المبعكك
اوبترا نفس رينج السعر
بيكانتو 68 او 70...دلوقتى 85
مره واحده وبدون اى سابق انذار هوجت ارتفاع اسعااااااار ...الاسعار بقت استهبال رسمي وسرقه ونصب واستخفاف بعقول الناس

وبرضه الناس بتشترى وتجيب

الموضوع برضه فى الزيرو....افيو 2014 عربيه متسواش بصله سعرها 100 الف جنيه اتوماتيك !!!!!!!!!!!!!!!!!!!!!!!!!!!!!!

عجبت لك يا زمن....انا هتكلم عن نفسى انا مش عارف لما هغير عربيتى النوبيرا اجيب ايه طالاما النظام بالشكل دة...وبالنسبالى 100 الف جنيه مهواش مبلغ سهل نهائي ومش هو اللى يتدفع فى العربيات ال بلاستيك دى

اتمنى انها تكون فتره وتنتهى...لان غير كده الموضوع بقى فى الحماده