الموضوع: اشتريت موتور لانوس واليكم التقرير

السلام عليكم ورحمة الله وبركاته

انا كنت عملت عمرة للموتور من كام شهر وللاسف نسيت اغير سير الكاتينة فى ميعاده واتقطع من ثلاث ايام، روحت للميكانيكى وطبعا فى صبابات باظت،الزملاء هنا قالولى ان الموضوع هايكلف من ٦٠٠ الى ٧٠٠ جنيه.
لما فكينا الوش عمود الكامه ماشاء الله تمام بس لقيت سميز فى تسلخ بسيط.
بصراحة انا بضايق جدا من عطلة العربية فقلت كبر دماغك من الموتور ده وكفاية عليه كده،وانا كنت فى الاسماعيلية من اسبوع وسالت على الموتور وكانت الاسعار فى متوسط ٢٦٠٠ جنيه.
توكلت على الله ونويت اشترى شورت بلوك لان كل حاجة شغالة عاندى بدون اى مشاكل.
ابن خالى ميكانيكى اتصلت عليه وقولت ليه قابلنى فى الاسماعيلية علشان نجيب موتور.
وبالفعل قابلنى وقبل مانتحرك قلته انا بغير الموتور علشان اريح دماغى فمش عايز غير موتور حالته ميه ميه ويكون على نص مس على الارض،واذا مش لقينا حاجة على مزاجنا نروح بكرة بورسعيد،قالى ماتقلقش.
توكلنا على وبدئنا نلف شوفنا تقريبا اكتر من عشر ماكينات كان يبص على عمود الكامه يعرف ان الماكينة مش تمام.
روحنا على نص شكله من برا ماشاء الله زيرو،قلت فى نفسى يارب يكون الموتور ده حلو.
فتحنا الكبوت ماشاء الله العربية كلها جديدة لانج،الميكانيكى بص على عمود الكامه قال بسم الله ماشاء الله احنا هاناخد الماكينة دى انا انبسطت جدا،بس يافرحة ماتمت
قولتله بس الماكينة دى لانوس ١ مش ٢
قالى ولا تشغل بالك المكن ١ احسن من ٢ ،قولتله ماشى
بصيت ع العداد لقيته عامل ١٠٥ الف كيلو،قولتله ياعم كده كتير،قالى مش كتير المهم حالة الموتور
بصراحة من كتر م انا مبسوط من حالة النص قلتلهم انا ها اخد الموتور كامل وبالفتيس والحاجة ال عاندى ها اخليها قطع غيار ليا قالوا ع البركة.
قلنا للراجل عايز كام قال ٤٢٠٠ جنيه
بصراحة احنا قبل مانروح له اقل سعر اتقال لنا ٤٥٠٠ جنيه وماكانش نفس الحالة كمان
حاولنا نفاصل معاه اقسم بالله انه ماعارف قال الرقم ده ازاى وان الموضوع كده فيه ٥٠ جنيه مش اكتر.
بصراحة انا كنت نفسى اشترى النص كله
صعب عليا انى اجيب الموتور من غير اللردياتير ال هوه كمان شكله بيضحك
اشتريت اللردياتير بالمراوح مع ان اللردياتير بتاعى سليم _ ٤٠٠ جنيه بالقواعد والخراطيم وكل حاجة
دفعت الفلوس والراجل قال جرب ومعاك اسبوع اى حاجة فيها مشكلة بتاعتى،قلت توكلنا على. الله
رجعنا فى نفس اليوم سقطنا الماكينة وكل حاجة تماااااام،وان شاء الله ناوى كمان يومين اروح احيب جانبين العفشة بتوع نفس النص.
قبل مانسقط قلنا نبص على طقم الدبرياج لقيناه ما شاء الله زيرو
قفلنا وبقالى يومين بجرب العربية، بصراحة فرق السما من الارض،التجميع والسحب ماشاء الله حاسس انى بجرب عربية واحد صاحبى

انا بقا عاوز انصح كل واحد من حبايبى بنصيحتين
الاولى: اياك ثم اياك ثم اياك انك تعمل عمرة للموتور،لاتتردد انك تسقط موتور اذا دعت الحاجة الى ذلك.
التانية: لا تغفل ابدا واهتم بتغيير سير الكاتينه والكاوتش فور انتهاء العمر الافتراضى

ومحتاج رايكم فى كام حاجه:
١_ هل فعلا مكن لانوس ١ تمام وان المهم الحالة؟
٢_ انا شيلت الرشاشات ال جاية مع الماكينة وركب الرشاشات بتاعتى علشان الفيش وعلشان كمان حالتهم تمام،كده كويس ولا ايه رايكم
٣_ ايه اهم الحاجات ال اعملها خلال فترى الاختبار؟
٤_ ايه رايكم فى السعر؟
٥_ ايه افضل نوع زيت استخدمه علما بان السعر مش فارق معايا.
٦_ الحاجات ال انا طلعتها من العربية ابيعها ولا اخليها كقطع غيار ؟

ولكم جزيل الشكر

المشاركة الأصلية كتبت بواسطة -=.ahmed.=-

الف مبروك الموتور الجديد
و الحاجات اللى طلعت من العربيه لو مش محتاج فلوس خليها احسن هتنفعك قدام اكيد
و الزيوت خليك مع النص تخليقى عشان انت كده معدى ال 100 الف انما لو الموتور حالته تمام و فوق 85 فى الميه خليك مع التخليقى الكامل و ابعد عن المحلى زى الموبيل و الشل ( رأى اعضاء )
و السعر على كلامك اعتقد حلو ما شاء الله و بيتهيقلى فى العموم ان لو الحاجه اللى بتشتريها تمام يبقى متركزش على السعر قوى فى مقابل الحاله
و ظبط العربيه ترصيص و ضبط زوايا و خدها على طريق و اسحب بيها و شوف

و ربنا يديك خيره و يكفيك شره

جزاك الله خيرا
انا سافرت بيها النهار ده وماشاء الله ال ١٦٠ بييجو بسهولة جدا
طب ايه افضل انواع الزيوت ال ممكن اجيبها؟
انا ها ارصص دلوقتى ومش ها اظبط زوايا لانى ها استخير ربنا ويمكن احيب حانبين العفشة بكرة

المشاركة الأصلية كتبت بواسطة casper9114

مبروك إن شاء الله ربنا يديك خيره و يكفيك شرة

اللهم امين واياكم