الموضوع: نظارات مغربى و نظارات المحلات الاخر

المشاركة الأصلية كتبت بواسطة أبو آسر

من الآخر وعن خبرة في موضوع النضارات
أكبر حاجة فيها لعب ومتعرفش تفرق الأصلي من الهاي كوبي هو النضارات
مغربي نفسه والمحلات الكبيرة أحيانا بيبيع حاجات هاي كوبي على إنها أورجينال وبيكسب مكاسب وهمية في النضارات ممكن تتعدى ال1000%
مش كل النضارات اللي مكتوب عليها صيني بتبقى مضروبة لأن في شركات نقلت خط إنتاجها للصين والنضارة بيبقى مكتوب عليها made in china لكن بالرغم من كده بتبقى أورجينال فعلا زي ray-ban
وفي المقابل مش كل النضارات اللي بيبقى مكتوب عليها made in italy بتبقى أصلية لأن كل الهاي كوبي بيبقى مكتوب عليه italy أو france أو germany أو australia وبيبقوا كلهم هاي كوبي صيني والنظر بتتباع جملة بحوالي 60 جنيه في وسط البلد والمحلات ممكن تبيعها من 150 - 500 حسب المحل والشمس جملتها في حدود 120 جنيه وبتتباع من 250 - 750 حسب المحل برده وفي ناس كويسة بتقولك دي هاي كوبي وفي ناس مش بيتقوا ربنا يقولك دي أورجينال وانت في النهاية مش هتقدر تفرق بين الأورجينال والهاي كوبي لأن الهاي كوبي بتبقى خامتها وجودتها عالية فعلا زي الأورجينال بالضبط
من الآخر عايز تجيب حاجة أورجينال بجد وتبقى ضامن 100% إن مفيهاش لعب يبقى تجيبها من التوكيل بتاعها رأسا زي توكيل ريبان "منير نصيف" واعمل حسابك أقل نضارة ب1500 جنيه أو تجيبها من برة من مصدرها ، أو تشتريها من برة أونلاين وتشحنها على البيت أو أي حد صاحبك يجيبهالك معاه وهو جاي
لكن الهاي كوبي برده مش وحش وسعره معقول ولو حسبتها لو غيرت كل سنة نضارة ب150 جنيه أحسن ما تجيب نضارة ب1500 جنيه أصلية هتقعد معاك 10 سنين أيوة بس موضتها هتكون قدمت وهتكون زهقت منها وبرده مفيش مانع إنها تقشر أو تبوظ مش معنى إنها أورجينال يعني مصنوعة من فولاذ
لو بتدور على نضارة شمس أصلية عشان تحميك من أشعة الشمس الضارة ومتضرش عينيك يبقى هات أورجينال زي ما قلتلك من 1500 جنيه وانت طالع والهاي كوبي برده أعتقد فيها طبقة حماية بس مش بنفس نسبة الأورجينال
أما الطبي فنصيحة هات هاي كوبي وغير النضارة مع المقاسات كل سنة أو اتنين وتقدر تجيب جملة من وسط البلد عند محطة مترو محمد نجيب انزل المحطة واسأل على بتوع النضارات مليون من هيدلك بس ميشتغلكش وتفاصل معاه على أد ما تقدر
أما العدسات فروح للمحلات الكبيرة زي جولي وجراند وبركة ومغربي واعمل العدسات هناك أينعم أسعارهم مبالغ فيها بس بتبقى كويسة ، في ياباني بس غالية أوي ممكن تعدي 600 جنيه وفي تقريبا سويسري أو فرنساوي وده ممكن يعمل في حدود 300 جنيه وفي برده ضد الكسر لكن العدسات متستخسرش فيها لأنها أهم شيء في النضارة سيبك من الشنبر أي حاجة بتؤدي الغرض

طيب الله يباركلك يا باشا قولنا فين بقى اللى بيبيع شنبر طبى هاى كوبى وسعره كويس....
اصل انا كونت ماشى بمبداء الاورجينال فى الطبى وكنت بغير النظارة كل سنتين تقريبا لانى بكون لابسها اغلب الوقت.
و جربت نظارة هاى كوبى قعدن معايا نفس القترة تقريبا بس كانت ب 250 مش ب 100 .

المشاركة الأصلية كتبت بواسطة أبو آسر

ما هي اللي انت اشتريتها ب250 جنيه دي جملتها من 60 - 90 جنيه :)
انت ممكن تنزل بنفسك محطة مترو محمد نجيب وسط البلد هتلاقي المحلات هناك كتير والنضارات أشكال وألوان لكن طبعا مش هتشتري نضارة أو اتنين بسعر الجملة لكن أقصى حاجة قطاعي ممكن تلاقيها ب120 جنيه مثلا بعد الفصال
وبرده في موقع إنترنت بيبيع أونلاين بتاع ناس محترمة أعرفهم وأحدهم عضو معانا في المنتدى ممكن تتابعهم بس هما لسة منزلوش العروض الجديدة بتاعتهم فممكن تتابعهم بعد فترة لو حبيت
half price نظارات شمس وطبية ماركات عالمية بنصف الثمن !

تسلم يا باشا على التوضيح....
بس محطة محمد نجيب دى اللى عند باب اللوق وقصر عابدين؟
اصل بشوف فعلا محلات نظارات كتير هناك....

طيب بما أنى بسافر كتير فبشوف الاسواق الحرة نضارات شمس وجميع الماركات العالمية
مثلا السوق الحرة فى مطار دبى اكيد طبعا النضارات هناك اوريجينال
هل سعرها بيبقى غالى عن برة وعموما هل يفضل الشراء من الاسواق الحرة ولا تكون اغلى من برة

المشاركة الأصلية كتبت بواسطة أبو آسر

أنا عن نفسي متعاملتش مع الأسواق الحرة قبل كده لذلك مش هقدر أفتي فيها هل اللي بيتباع فيها لازم يكون أورجينال أو لأ
بس اللي أعرفه كويس إن دبي مستنقع النضارات الهاي كوبي !

عموما انا فى اعتقادى ان مطار دبى من المطارات اللى بتنافس على احسن مطارات العالم وبشوف اجانب كتير بتشترى نضارات هناك فمعتقدش ان حكومة دبى هتخاطر بسمعتها وتبيع نضارات كوبى على انها اورجينال انا متأكد بما لايدعو للشك انها اصلية 100% بس استفسارى هل منتجات السوق الحرة عموما اغلى عن مثيلاتها من برة؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟

اية اخبار الشراء من النت ؟؟ حد جرب قبل كدة ؟؟