الموضوع: نظارات مغربى و نظارات المحلات الاخر

وجولي نفس النظام بس صراحه عذساتهم نضيفه اوي انا النظاره اللي فاتت كنت جايبها من عندهم وعملت العدسلت كانت ب٥٠٠ المره الكبلم ده من ٣ سنين المره دي جبت النظاره وقالي العدسات ٨٠٠ قلت له شكرا اخدت النظاره وعملتها بره في محل عادي ب ١٠٠ جنيه بس الحق يتقال عدساتهم نضيفه اويييي وفي فرق كبير جدا لصالح عساتهم بس اسعارهم مبالغ فيها

من الآخر وعن خبرة في موضوع النضارات
أكبر حاجة فيها لعب ومتعرفش تفرق الأصلي من الهاي كوبي هو النضارات
مغربي نفسه والمحلات الكبيرة أحيانا بيبيع حاجات هاي كوبي على إنها أورجينال وبيكسب مكاسب وهمية في النضارات ممكن تتعدى ال1000%
مش كل النضارات اللي مكتوب عليها صيني بتبقى مضروبة لأن في شركات نقلت خط إنتاجها للصين والنضارة بيبقى مكتوب عليها Made In China لكن بالرغم من كده بتبقى أورجينال فعلا زي Ray-Ban
وفي المقابل مش كل النضارات اللي بيبقى مكتوب عليها Made In Italy بتبقى أصلية لأن كل الهاي كوبي بيبقى مكتوب عليه Italy أو France أو Germany أو Australia وبيبقوا كلهم هاي كوبي صيني والنظر بتتباع جملة بحوالي 60 جنيه في وسط البلد والمحلات ممكن تبيعها من 150 - 500 حسب المحل والشمس جملتها في حدود 120 جنيه وبتتباع من 250 - 750 حسب المحل برده وفي ناس كويسة بتقولك دي هاي كوبي وفي ناس مش بيتقوا ربنا يقولك دي أورجينال وانت في النهاية مش هتقدر تفرق بين الأورجينال والهاي كوبي لأن الهاي كوبي بتبقى خامتها وجودتها عالية فعلا زي الأورجينال بالضبط
من الآخر عايز تجيب حاجة أورجينال بجد وتبقى ضامن 100% إن مفيهاش لعب يبقى تجيبها من التوكيل بتاعها رأسا زي توكيل ريبان "منير نصيف" واعمل حسابك أقل نضارة ب1500 جنيه أو تجيبها من برة من مصدرها ، أو تشتريها من برة أونلاين وتشحنها على البيت أو أي حد صاحبك يجيبهالك معاه وهو جاي
لكن الهاي كوبي برده مش وحش وسعره معقول ولو حسبتها لو غيرت كل سنة نضارة ب150 جنيه أحسن ما تجيب نضارة ب1500 جنيه أصلية هتقعد معاك 10 سنين أيوة بس موضتها هتكون قدمت وهتكون زهقت منها وبرده مفيش مانع إنها تقشر أو تبوظ مش معنى إنها أورجينال يعني مصنوعة من فولاذ
لو بتدور على نضارة شمس أصلية عشان تحميك من أشعة الشمس الضارة ومتضرش عينيك يبقى هات أورجينال زي ما قلتلك من 1500 جنيه وانت طالع والهاي كوبي برده أعتقد فيها طبقة حماية بس مش بنفس نسبة الأورجينال
أما الطبي فنصيحة هات هاي كوبي وغير النضارة مع المقاسات كل سنة أو اتنين وتقدر تجيب جملة من وسط البلد عند محطة مترو محمد نجيب انزل المحطة واسأل على بتوع النضارات مليون من هيدلك بس ميشتغلكش وتفاصل معاه على أد ما تقدر
أما العدسات فروح للمحلات الكبيرة زي جولي وجراند وبركة ومغربي واعمل العدسات هناك أينعم أسعارهم مبالغ فيها بس بتبقى كويسة ، في ياباني بس غالية أوي ممكن تعدي 600 جنيه وفي تقريبا سويسري أو فرنساوي وده ممكن يعمل في حدود 300 جنيه وفي برده ضد الكسر لكن العدسات متستخسرش فيها لأنها أهم شيء في النضارة سيبك من الشنبر أي حاجة بتؤدي الغرض