أخيرا استلمت النيو واجا الأوتوماتيك الحمد لله من 4 أيام ورخصتها من يومين ومشيت بيها 300 كم تقريبا أغلبهم علي كوبري اكتوبر في رحلة العذاب اليوميه بين مدينة نصر والمهندسين وبالعكس .
الحمد لله العربيه رائعه وانا مبسوط بيها جدا وأحب أشكر كل أعضاء المنتدي اللي أفادوني جدا بخيراتهم وأرائهم وساعدوني في اختيار وشراء العربية الجميلة دى.
ملاحظاتي الأوليه عن العربيه هي:-
n الصالون وتقفيله أنا شايفه جيد و يمكن أفضل بكتير من صالون عربيتي السابقه الدايو نوبيرا. وبصراحة أنا مستغرب من الأنتقادات اللي بتتقال عن تقفيل وخامات الصالون ......يمكن أنا مش خبير وفاهم أوي أو ان الملاحظات دي تم تلافيها في النيو واجا 2008.
n السحب هايل والعفشة ناعمه وجيدة في المطبات العاديه اللي ماليه شوارعنا لكن في صوت مضايقني من تيل الفرامل يمكن يروح لما التيل يطبع مع مرور الوقت وان ماراحش حابقي اكلمهم عنه في صيانة ال 1000 ان شاء الله.
n العربية واسعه ماشاء الله ودا من أهم أسباب اختياري ليها لأني من طوال القامه ( 195 سم ). لكن لون الفرش فاتح ومش ممكن يستحمل التراب اللي عندنا علشان كده بدور علي حد يفصل لها فرش جلد كويس لو تعرفوا حد كويس في مدينة نصر ياريت تدلوني عليه.
n الراديو والسي دي ممتاز لكن السماعات مش قد كده فيهم صوت زنه تظهر مع تعليه الصوت.
n لكن بصفه عامه الحمد لله العربيه مريحه جدا وانا سعيد بيها وأدعو الله انها تفضل كويسه أطول مدة ممكنه وماتشمتش فيا أصحابي اللي نصحوني اني لازم أشتري عربيه تكون منتشرة وبلاش البروتون لأنها لسه مش منتشرة كفايه ...أنا نفسي أفهم حاتنتشر ازاي لما كل الناس حتستني .
n أكرر شكري لكل أعضاء المنتدي وأعدكم بتقرير مفصل مع صيانة ال 5000كم ان شاء الله وكل سنة وانتم طيبين جميعا.