الموضوع: دخنة بيضا بسيطة ومش عارف أبدأ منييييييييين

المشاركة الأصلية كتبت بواسطة menaraafat85

بعد صباح الخير وكل سنة وحضراتكم طيبيييييييييييييييين وبألف صحة وسلامة
الموضوع ومافيه...إنى الحمد لله ربنا وفقنى فى عربية أكسنت 2000 1300 كربراتير من حوالى شهر تقريبا...كشفت عليها عند ميكانيكى مش أكتر من كدا رغم نصايح كتييييرة من المنتدى إنى أرفعها فى بنزينة ولكن للأسف الظروف ما كانتش تسمح ... .ما أطولش عليكم روحت غسلتها الإسبوع اللى فات يوم الاثنين تحديدا فى بنزينة توتال وغسلت الموتور والعفشة وهنا كانت المفاجأة ...العامل بعد ما غسلها بيدور العربية عشان يطلعها من المغسلة وأنا واقف باصص عليها لقيت دخنة بيضة مدية على أزرق كدا متوسطة مش جامدة طالعة من الشكمان قولت يمكن ده علشان لسة الموتور مغسول بالجاز... المهم تانى يوم سافرت بيها من الهرم للفيوم (حوالى 100كم) وحسبت استهلاك البنزين لاقيته حوالى 240كم فى الصفيحة وحسيت إن صوت الموتور أعلى شوية...وتانى يوم كانت المطرة بتاعت يوم الخميس الصبح وكنت راجع بيها على الطريق وهوب وأنا ماشى على 120 مفيش دواسة بنزين والعربية نتشت أكتر من 4 أو 5 مرات وفى كل مرة أفصل وأدور وركنتها فى الجراج وروحت الشغل مواصلات قولت يمكن تكون مية المطرة دخلت على البوجيهات فسيبتها تنشف خميس وجمعة وخدتها يوم السبت على الشغل مفيش أى مشكلة رايح جاى زى الفل الحمد لله...المهم من ساعت ماشوفت الدخنة فى البنزينة وأنا مقلق فخدت واحد صاحبى فى الشغل النهاردة الصبح وقولتله يدور ويزود وأنا هابص على الشكمان مالقيتش حاجة قولتله انزل انت بص وانا هازود قالى مفيش حاجة قولنا طب نطلع برة الجراج فى الشمس برضه مفيش حاجة نزلنا تانى الجراج وجيت وانا باركن صاحبى كان واقف ورا العربية وقالى فى دخنة فعلا بس بسيطة لونها أبيض
عارف إنى طولت على حضراتكم بس فى واحد معايا فى الشغل قالى من كام يوم إنه كان معاه العربية ديه وركب عربيتى فقالى دى محتاجة تعلى الكهرباء بتاعتها علشان فى رجة فى المكنة وفى حد تانى نصحنى قبل كدا إنى أقيس كبس الموتور وحد تالت بسأله على موضوع الدخنة دى قالى تابع الزيت وشوف بينقص ولا لأ
أنا مش عارف بقى أبدأ بقياس كبس الموتور ولا الذهاب لميكانيكى علشان الدخنة ولا كهربائى
شكرا لتعبكم مقدما

بصديقي انا حاسس بشعورك لكن اول شيء تبدا منه قيس وتابع الزيت كل يوم ولو مظبوط يبقي الحمد لله ولو نقص يبقي محتاجه طقم شنبر والله اعلم

المشاركة الأصلية كتبت بواسطة كريم kok

بصديقي انا حاسس بشعورك لكن اول شيء تبدا منه قيس وتابع الزيت كل يوم ولو مظبوط يبقي الحمد لله ولو نقص يبقي محتاجه طقم شنبر والله اعلم

شكرا لردك واهتمامك ياباشا
أنا فعلا بتابع الزيت تقريبا يوميا ومش بينقص

المشاركة الأصلية كتبت بواسطة menaraafat85

شكرا لردك واهتمامك ياباشا
أنا فعلا بتابع الزيت تقريبا يوميا ومش بينقص

تمام ومن علامات تفويت الموتور
1_ تسيل زيت علي البوجيهات
2_خروج دخنه بيضاء مايل للزقان
3_ضعف نسبي في السحب
4_استهلاك بنزين بشراهه

وانشاء الله ميكونش عندك الاعراض دي

ونصيحه مني ليك خليك منتظم في تغير الزيت والفلتر في مواعيده

المشاركة الأصلية كتبت بواسطة كريم kok

تمام ومن علامات تفويت الموتور
1_ تسيل زيت علي البوجيهات ماشوفتهاش
2_خروج دخنه بيضاء مايل للزقان ماحصلتش غير لما غسلت الموتور بالجاز وماتكررتش
3_ضعف نسبي في السحب دى أنا بقول إن العربية ضعيفة شوية بس كل اللى ركبها قالى لأ السحب كويس
4_استهلاك بنزين بشراهه 240كم فى الصفيحة مش عارف كتير ولا قليل (1300 سىسى كاربراتير)

وإن شاء الله ميكونش عندك الاعراض دي

ونصيحه مني ليك خليك منتظم في تغير الزيت والفلتر في مواعيده لسة شارى العربية من شهر تقريبا ومغير الزيت موبيل 3000 ولسة ماكملتهمش وناوى أغيره على 2000 أو2500 عشان الزيت القديم كان نازل أسووووووود مهبب

شكرا لمتابعتك واهتمامك يا باشا

المشاركة الأصلية كتبت بواسطة samir elshahawy

الدخان الابيض دليل علي وجود مياه في العادم و ذلك يرجع الي سببين :
1- قد يكون البنزين فيه نسبة مياه و هذا هو الارجح لأنها تسبب برجلة للمحرك و عدم أنتظام لأحتراق الوقود و ظهور دخان أبيض مع العادم أنا شاكك فى بنزينة فولت منها قبل كدا وفعلا ماعجبتنيش العربية من بعدها بس دول كانوا يادوب 5 لتر مش كتير يعنى
2- تفويت من مياه تبريد المحرك بسبب جوانات وش السلندر و ذلك سيصاحبه نقص في مياه التبريد

لذا أنصحك بالاتي :
1- ملاحظة مستوي مياه التبريد في القربة هيا قلت فعلا فى حوالى 3 أسابيع
2- اعادة ملء خزان الوقود ببنزين من أحدي المحطات التي لايوجد بها غسيل سيارات و أرشح لك محطات شل أو أمارات مصر للأسف مفيش أيا منهم فى طريقى

جرب كده و قول لنا , لو الدخنة راحت يبقي كانت مياه في البنزين
لو الدخنة مستمرة يبقي نبدأ الخطوة اللي بعد كده

متشكر لتعبك يا باشا

من يومين كدا وديتها للميكانيكى اللى بص عليها قبل ما أشتريها وحكيتله اللى حصل ..... قعد يدور ويزود ويبص وما اقتنعش بكلامى وقالى الموتور زى الفل وبطل وسوسة... المهم النهاردة زمايلى فى الشغل بيتعاملوا مع ميكانيكى جنبنا وكانوا جيبينه يبصلهم على عربياتهم وقالولى لو عايز يبصلك على الموضوع بتاعك قولتلهم ماشى أهو برضه أكون خدت راى كذا واحد... بص على العربية قالى برضه مفيش حاجة والمكنة تمااام بس هى الظاهر ماكانتش بتحرق كتير ففى رواسب فى الشكمان هى اللى بتطلع وعاملة الدخنة دى