اخيييييرا ... تم الاتفاق على فيرنا ... !!!!

بسم الله الرحمن الرحيم

لو تفتكرو انا بقالى شهور بدور على عربية وفيرنا تحديدا وكنت روحت معارض كتير وشوفت عربيات كتير ولو تفتكرو كمان كنت عامل الموضوع دة

http://www.nilemotors.net/Nile/397842-a.html

الحمد لله تم الاتفاق على شراء فيرنا وبعد كل اللف دة هجيبها بتاعة زميلى فى الشغل هو اول مالك وفيها رخصة سنتين وكانت استعمال بيتى .. العربية موديل 2007 كاملة مانيوال عاملة 100000 كيلو والحمد لله حالتها كويسة جدا هى بس مغيرة كبوت ... وخلصت على 46000 . بس انا كنت محتاج نصايحكو فى شوية حاجات كدة ...

أولا : العربية كانت مغيرة جزء فى وصلة البنزين وبيسرب ( بيعمل ريحة ) واللى كان بيتفرج معايا على العربية قالى ان دة مياثرش وعادى هنبقى نغير شجرة البنزين كلها اضمن ودة مش غالى وبيتعمل كتير ... فايه رايكو ؟؟

ثانيا : العربية لسة مغيرة زيت ... فطبعا الناس قالتلى اغير السيور ... فايه هى السيور اللى تتغير وهتتكلف كام واعملها فين وكدة لان صاحبكو ميح ... وربنا يستر ..

ثالثا : ايه هى الحاجات اللى اعملها عموما فى العربية اول ما تيجى ان شاء الله ...


رابعا : دعواتكو باة اتعلم السواقة بسرعة ويكفينى شرها ويدينى خيرها ان شاء الله ...

وشكرا لكل واحد ساعدنى قبل كدة وهيساعدنى ان شاء الله ... او قرا الموضوع بس ودعالى بقلبة :E_braces[1]:

ماشاء الله تبارك الله
ربنا يعطيك خيرها ويكفيك شرها وشر الطريق اللهم امين
بالنسبة لموضوع شجرة البنزين هيكون احسن واضمن ليك
لأن السيارة عاملة 100000 كيلو وموديل 2007 فالأفضل تغير الشجرة بالخراطيم كله كله يكون جديد أفضل
وموضوع السيور أهم سير هو سير الكاتينة والفابريكة بتاع العربية بيتغير علي 60 ألف ، وبعد كدا تغير علي 40 الف العربية اصلا عاملة 100000 ، فأول شئ هتغير السير دا ، وبالمرة سير الدينامو ، والباور ، والتكييف
وتغير فلتر البنزين وفلتر الهواء ، وتروح لميكانيكي تنظف رشاشات والبوابة ، وآخر حاجة ترفع العربية وتكشف علي العفشة ( كبالن ، مقصات ، تيل فرامل وطنابير ، بلي عجل ) وتشوف النقشة بتاعت الكاوتش
وتظبط زوايا وترصص ، وهتبقي معاك بأذن الله زي الفل
وربنا يملهالك بركة يااااااااااااااارب

تمام ومبروك وعلى موضوع شجرة البنزين هتتغير فى التوكيل ب 550 انا لسة مغيرها هناك وبتاخد حوالى ساعتين والتانك بيتفك وبتنزل الشجرة بالانابيب الحديد كلها لحد الكبوت وتترمى وتتركب جديد كلها ودا احسن بتقعد معاك 3 سنوات او 4 ان شاء الله
نصيحة متسمعش كلام حد يقولك هنغير الخرطوم اللى مقطوع دا بس صدقنى هتصرف على الفاضى غيرها كلها احسن واستمتع بالعربية واهم نقطة قالولى عليها وهما بيغيروا الشجرة انى اجى والناتك اقل من النص عشان يقدروا يفكوة ومبيقاش تقيل على المسامير.. دا اللى قالوة ..
بعدها ياريت تعمل صيانة شاملة وكاملة فى التوكيل مع تغيير السيور وقولهم يكشفوا على الشكمان جزء مهم اوى وبيخلى العربية فايقة ومظبوطة وطبعا عشان تكون عارف الشجرة والشكمان فى اى حتة سواء توكيل او خارج التوكيل هتبقى مصرى الصنع ودا اللى راكب فى كل الفيرنا والفبريقة والجديدة
هتعمل حاجة كمان لو فاضى ... شيك على الطنابير للفرامل لانها سريعة البوظان فى الفيرنا وبتعمل تعرجات عشان لو هتركب تيل جديد يبقى على نظافة ولو سمحت ركب التيل الاصلى هو تمنة 380 جنية صدقنى مفيش احسن منة وانت هتجرب ومع الخبرة والسنين هتعرف كل حاجة ... بس ياريت صيانة شاملة فى التوكيل زى ما قلتلك ...
وحاجة اخيرة اتمنى قبل ما تشترى تروح التوكيل تعمل فحص وهما هيرفعوها ويشفوها كويس ويديك تقرير ليها صدقنى كدا اضمن ... التكلفة حوالى 250 جنية بس هترتاح وتبقى مطمن .. والف مبروك

مغيرة كبوت ليه حط علامات استفهام وحاول تتاكدكويس اتغير ليه فيه اي كلام في حوض العربية ؟؟؟؟؟؟؟؟

مبرووك مقدما

شجرة البنزين ب 200 جنيه من عند نافع فى شارع دمشق , و انصحك بمركز سبيد سيرفيس فى الصيانات عن تجربة , و الف مبروك و اطمن العربية ديه اعتمادية و بتستحمل بجد بقالها معاية 5 سنين مغريرتش حاجة فيها ما عدا الصيانات الدورية المعروفة , الزيادة بس كانت شجرة البنزين.

الف مبروك

اختيار موفق ان شاء الله

مبرووووووووووك ..حافظ عليها وعلى صيانتها . وزي ما الاخوة الاعضاء قالوا .. اعمل ليها صيانة شاملة في التوكيل او في مركز صيانة نضيف .. وبيس يا مان
ربنا يباركلك فيها ويكفيك شرها

الف مبروك
السعر كويس جدا
تانى حاجة بالنسبة لموضوع السيور وكده اسئل المالك السابق هل غيرها ولا لاء
الفيرما عربية كويسة تتعلم عليها السواقة
غير شجرة البنزين ضرورى جدا ومتطنشهاش
ورجاء من حضرتك بما ان سيادتك لسة جديد خالص فى موضوع العربيات ياريت مترميش ودانك للصناعية وتمشى وراهم عميانى وحاول على قد ماتقدر ماتغوطش فى كلام كتير عشان ميفهموش انك جديد ويشتغلوك
ممكن تاخد معاك حد ثقة وفاهم بس تبقى مركز عشان تتعلم
او لو فى اى حاجة تسئلنا هنا فى المنتدى واحنا نفيدك باذن الله قبل ماتنفذ
و1000000000000000 مبروك مرة تانية
ايدك ع الحلاوة بقى

ربنا يجعله اختيار خير

الف مبروك وربنا يكفيك شرها ويرزقك خيرها
ممكن تعرفنا الحاله العامه لصاج العربيه رشه ايه وايه الفبريكا اللي فيها لاني بدور علي فيرنا زيك