الموضوع: استلام كيا سبورتاج 2014 هاى لاين مخبوطة ومرشوشة من eit روكسى

استلام كيا سبورتاج 2014 هاى لاين مخبوطة ومرشوشة من eit روكسى

الاخوة الافاضل اعضاء وزوار نايل موتورز ,,, بعد التحية

اسمحولى اعرض عليكم الى حصلى وانا بستلم عربتى الجديدة وهى كيا سبورتاج 2014 هاى لاين.

للاسف العربية كانت مخبوطة ومرشوش الباب الخلفى يمين , ومحدش كان يعرف الموضوع دة , ومحدش قالاى لكلام عن الخبطة دة قبل ما استلم.

اسمحولى اوضحلكم الموضوع بالتفصيل فى خطوات كما يلى :

• العبد لله حاجز العربية من 31 اكتوبر 2013 طبعا بعد ما وصلت لاقل اوفر بريس 8 الاف جنية وكان بيترواح ما بين 8 الى 22 الف جنية بعد لف ومعارف لمدة شهر تقريبا.
• شهرين بسئل التوكيل المحترم كل اسبوع فى جديد يرد عليك معنديش فكرة ومعرفش
• 31 ديسمبر مكالمة من التوكيل المحترم العربية وصلت , وعايز اقول انى كنت عندهم من يومين قبل المكالمة ومكنش حد يعرف حاجة.
• خت 7 ايام عشان اجهز الفلوس والباقى كان بشيك وخد 3 ايام عشان واجراءات البنك والكلام الى انتو فهمينو
• رحت امبارح استلم وكان معايا اخويا الله يبارك فية , وهو سمكرى بس مكنتش عايز اقول عشان ميبقاش دعاية لية او المعرض يعرف كدة.
• الموضوع ابتدا ان االعربية نظيفة اوى ومهتمين بيها وزى ما بيقولو بتبرق ماعدا فردة الكوتش الخلفية يمين.
• المهم سبتو ورحت الحسابات عشان كنت زهقت وعايز اخلص زى اى حد بيزهق من اجراءات البنك والمكالمات ووجع القلب.
• نرجع لفردة الكوتش الى ورا يمين, لقينها عليها بقع زى بودرة كدة او بوية , بس مكنتش باينة طلعت بوية فى الاخر , اول ما لفينا حولين العربية لقينا كل الكوتش نظيف ما عدا الفردة دة.
• ابتداينا نركز بقى وبندور حوليها . عرفنا ان الباب مرشوش بيسموها بطريقة مسروقة , وبتاع البوية عامل حاجة اسمها مسيح ورنيش , وبكدة مفيش قطع او حرف فى البوية , اسف بس مش اى حد هيفهم الكلام دة.
• المهم لقيا فى اخر الباب تسيل ورنيش , كمان البوية من الكبينة عملة 3 حفر صغيرة , بجد مش اى حد هايشفهم , الله يبارك فية شفهم.
• طبعا العيلين الى كانو بيسلمونا العربية بلمو, والى كانو بيسلمو العربية هربو , كان فى اتنين بيسلمونا العربية , ومش عايز اغلط فى واحد منهم فكرنى كاورك , بيقلى الماتور متفتحوش حط مياة زجاج المسحات بس , والباقى يا باشا فى الصيانة ... مردتش علية وسبتة ومشيت عشام مشتمهوش.
• جارى جابو البياع , وهو محترم وقال انة ميعرفش , وميفهمش فى الفنيات دة , (رحم نفسة) وقلى برحتك متستلمش العربية وهنغيرها لك بس ادينى فرصة يومين
• الحمد لله , اول ما عرفت ان العربية مش من نصيبى فرحت عشان دة ربنا مش عايز ليا غير الخير فكنت مروح مبسوط ونفسيتى مرتاحة جدا وبكتب لكم وانا مش مضايق خالص الحمد لله

الخلاصة :

اى حد هيستلم عربية جديدة ياخد معاه حد بيفهم , بلاش نقول فى سؤا نية , خلينا نقول عشان ميضحكش عليك وحسبنا الله فى اى حد ممكن يكون بيغش.

طبعا انا مستلمتش بس فى واحد صحبى قال لى لازم تقول عشان الناس تاخد حرصها وهى بتستلم , وتعم الفائدة وربنا يكرمنا جميع ويسترها معانا جميعا.

مش هقدر اقول غير ان العربية فضى هاى لاين بصمة , عشان اى حد بيستلم فضى هاى لاين ياخد بالة.

فى اى مكان محترم لازم يقلك ويخيرك ما بيت تستلم على كدة ويخفضلك فى سعرها او يديك خصم , او يغير العربية , وعلى فكرة اكيد ممكن يحصل حاجة زى كدة وان العربيات تتخبط او تتحك وهى جاية فى الطريق , معظمنا عارف السوقين دول مش فارق معاهم حاجة , وبنشفهم بيجرو بالعربيات ازاى على الطريق.

تحية خاصة لاخويا الذى كشف الموضوع دة وصحبى الى نصحنى اكتب كل دة.