تقرير ريو 2014 بعد اول 1000 كم ..
بـــســــم الله الــرحــــمـــن الـــرحـــيــــم
التقرير والتقييم ده من وجهة نظري واحتمال اغلط في تقييم ولا اتنين لكن هحاول على اد ما اقدر اوضح كل اللي شوفته وحسيته في العربية
مبدأيا العربية اللي معايا كاملة خليجي لكن ناقصها الليدات والسنسور بارك فقط والتكييف بكر بدل التاتش ..
أولا : الراحة الداخلية :
القاعدة جوا العربية ما شاء الله جميلة ومريحة وبتديك احساس جميل ومختلف عن اي عربية تانية وانت سايق وماسك الدركسيون
لكن مش هتبقى شايف الكبوت ولو واحد لسه بيتعلم سواقة او متعلم جديد هتاقبله مشكلة انه هيحتاج وقت على ما يحفظ ابعاد العربية
لما تبص في المراية الازاز الخلفي هتحس انه بعيد عنك شوية و ده اكيد لان الازاز الخلفي صغير والرؤية يدوب للي وراك بس
لما تيجي تركن العربية لو لسة بردو واحد متعلم سواقة جديد هتاقبله مشكلة الركن لانك مش شايف الكبوت والرؤية الخلفية محدودة ( عشان كده انا شايف ان السنسور بارك في الريو مهم ومش مجرد اوبشن للرفاهية ) لكن انا الحمدلله اتأقلمت مع العربية الى حد ما وكله تمام
العربية من جوا مش زي ما ناس ممكن تتوقع انها ضيقة بالعكس العربية وسعها معقول ومتوسط
قدام واسعة جدا والسواق والراكب الامامي مش هيحس بأي ضيق
الكنبة الخلفية معقولة وممكن شخصين احجامهم كبيرة يقعدوا مرتاحين او 3 اشخاص عاديين وكلامي هنا عن الهاتشباك
اما السيدان فأنا فاكر لما كنت بتفرج على العربية ركبت السيدان كمان كنوع من المقارنة وحسيت السيدان اوسع شوية بسيطة من ورا
ملحوظة بردو الكراسي هتحس انها محتوياك كده وماسكاك مش عاوزاك تقوم وتسيبها هههههه
ودي صورة للكنبة الخلفية بزاوية بتوضح المسافة بينها وبين الكرسي الامامي في حالة رجوع الكرسي الامامي لورا مسافة كبيرة شوية
http://nileup.com/up/uploads/nilemotors_13897978181.jpg
ثانيا : الخامات الداخلية :
التابلوه شكله جميل وانيق ومميز وخاماته مرضية الى حد ما الحمدلله لكن كان ممكن يتعمل بخامات احسن من كده ( زي مثلا تابلوه لانسر بومة تحس انه مكسي جلد وده بيدي شكل شيك جدا ولما تلمعه بملمعات التابلوه بيدي لمعة جميلة ) لكن التابلوه بشكل عام جيد جدا
معلش الصور دي للعربية بعد ما استلمت على طول مكنتش لسه حطيت دواسات ولا نضفت التابلوه ولا اي حاجة
دي صورة للتابلوه منظر امامي
http://nileup.com/up/uploads/nilemotors_13897978711.jpg
ودي صورة للتابلوه منظر جانبي
http://nileup.com/up/uploads/nilemotors_13897979481.jpg
صورة لباب السائق
http://nileup.com/up/uploads/nilemotors_13897980231.jpg
صورة للباب الخلفي
http://nileup.com/up/uploads/nilemotors_13897980621.jpg
ثالثا : الخامات الخارجية :
الدهان انا شايف انه كويس واحسن من عربيات تانية تحس ان دهانها ضعيف على عكس الريو الحمدلله دهان كويس جدا
رابعا : العفشة :
الريو عفشتها ناشفة حبتين خصوصا اول ما استلمت العربية كانت ناشفة بمعنى ناشفة يعني مش اي كلام بس خلال فترة التليين حسيت العفشة اتظبطت شوية ونشوفيتها خفت كتير عن الاول واعتقد دلوقتي نشوفية العفشة بقت معقولة مش متعبة وهتفيد العربية في الثبات على الطريق
خامسا : الفرامل :
الفرامل الحمدلله ممتازة جدا واستجابتها سريعة
سادسا : الثبات :
سافرت بالعربية من المنصورة للقاهرة ورجعت في نفس اليوم وكنت متوقع ان العربية ثباتها هيكون مش أد كده بس الحمدلله العربية خيبت ظني الوحش فيها والثبات كان معقول جدا ومش عايز اول ممتاز لاني مجربتهاش الا مرة على الطريق لكن وصلت بيها ل 120 و 130 والثبات ما اتأثرت بالسرعة الحمدلله واعتقد ممكن يكون ثباتها كويس لحد 150 كمان
سابعا : العزل :
العزل ما شاء الله من مميزات العربية بمجرد ما تقفل الازاز هتبقى في عالم لوحدك بعيد عن الازعاج بتوع سواقين الميكروباصات والتاكسيات بالكلاكسات العجيبة بتاعتهم
لكن بردو ماهواش العزل اللي يخليك ما تنتبهش لو في كلاكس من عربية لو لا قدر الله في موقف خطر لو هتخبط حد او حد هيخبطك لا قدر الله ربنا يسترها معانا كلنا
ثامنا : سحب الموتور :
بوجه عام العربية سحبها وادائها على الطريق متوسط او اعلى من المتوسط شوية
وده طول ما انت ماشي اوتوماتيك لان عداد التاكوميتر ( RPM ) بينقل على 2 او 2وشوية اخره 3 مابيزيدش عن كده
لكن ... لو مشيت ستيب ترونيك سحب العربية بيعلى وبيكون معقول جدا جدا وهتحس ان العربية اكتر من 1400
و دي حاجة ممكن تعتبرها اوبشن في اسلوب القيادة
لو عاوز توفير بنزين وقيادة هادية .. هتمشي اوتو
ولو عاوز قيادة سريعة شوية او رياضية وحرق ... هتمشي ستيب ترونيك
واكيد حضراتكوا عارفين ده كويس
ياريت اكون جبت كل حاجة واتكلمت عنها ومنسيتش حاجة وان شاء الله اكون قولت كل الشرح بوضوح
