الموضوع: طريق واحة سيوة

انا لسه كنت هناك في العيد طلعت بعربيتي من اسكندية بعد الفجر وصلت الفندق الساعة ١٢

الطريق كويس مع عدا الحتة اللي بيصلحوها الكيلو ٣٠ زي ما قال الاخ الكريم

لازم تدخل مطروح علشان تمسك الطريق وكمان علشان تمون بنزين انا يا دوبك التنك كفاني لحد سيوة

الطريق في نهاية شارع سوق ليبيا الشارع اللي فيه عمر افندي اللي بيوازي الكورنيش وده اكبر شارع بعد شارع اسكندرية


في حاجة مهمة قوي الطريق ده بدايته هو نفسه طريق السلوم فلو ما اخدتش بالك من اللفة حطروح في خبر كان و حنجيبك من ليبيا :)

الفنادق المعقولة هناك

كليوباترا ٠١٠٣٣٤٠٧٨٤
الكيلاني ٠٤٦٤٦٠١٠٥٢ مكيف
نيو ستارز ٠١٠٢٩٥٧٩٢٦ هو مطعم و ملحق بيه شاليهات واكله ممتاز ممتاز ممتاز
عروس الواحة ٠٤٦٤٦٠٠٠٢٨

شبكة فودافون تعمل في كل مكان هناك ما واجهتش اي مشكلة حتي لما طلعت سفاري في الصحرا والله آعلم بالشبكات التانية لان كان كلنا فودافون

اخيرا الطريق من اسكندرية لمطروح ٢٨٠ كيلو ومن مطروح لسيوة ٣١٥ ومفهوش اي خدمات لا كاوتش و لا ميكانيكي ولا بنزين طبعا فمحدش يطلع بعربية نص نص

حد عاوز حاجة تانية ؟؟؟

المشاركة الأصلية كتبت بواسطة kero25

اه ياريت انا مسافر إن شاء الله كمان اسبوع ياريت اعرف اعدتوة اد اية هناك وهى محتاجة كام يوم عشان تستمتع هناك
وبعدين سفارى بتتكلف كام وفيها بيات ولا لأ ولو حد معاه نمرت حد هناك كويس ياريت عشان انا نفسى بجد اروح من زمان وبظبيط من بدرى عشان مش عايز يحصل حاجة هناك
انا من القاهرة وسمعت انك ممكن تروح عن طريق الفيوم اقرب من مطروح الكلام دة صح ولا لأ
وسمعت ان فى فندق هناك كويس اسمة يوسف ولا حضرتكوا يا ( ruqi) & ( karim ) اعتدوه فين هناك وأديتوة وقتكوا هناك ازاى واية اخبار الاكل هناك رخيص ومتوفر ولا ظروفة اية
والصبح اية ممكن يتعمل واية بليل ممكن يتعمل
اسف على الاطالة بس بجد عايز اعرف اكبر معلومات عشان بس تكون رحلة كويسة ومتظبطة صح

اه عارف فندق يوسف وهو نظام عمارة فيها غرف مش نظام شاليهات في جنينة نخيل زي نيو ستارز آو النخيل و آنا بافضل النوع التاني آكتر

آعتقد تلاتة آيام و ثلاثة ليالي معقول قوي للاقامة

اما موضوع البيات في الصحرا ، فالحكومة لغت الموضوع ده وهدمت الكامبات اللي كانت في بير واحد (يا خسارة كانت تجربة حلوة قوي وايام جميلة)

نسيت آقول لكم ان السواق اللي حيطلع بيكم سفاري (السفاري بيبدآ بعد العصر الي ما بعد العشا) حيلم البطاقات الشخصية من الصبح علشان يروح بيها لحرس الحدود و يطلع تصاريح دخول لصحرا والتصاريح دي معدش مسموح فيها بالبيات ولازم السواق يرجع للجيش بعد العشا و يدلهم تمام


آخيرا لا آعتقد ان في طريق متسفلت بيربط سيوة بآي محافظة في مصر غير طريق مطروح وعندكوا جوجل ايرث بصوا واتاكدوا


آهم حاجة في رحلة سيوة
١- البنزين
٢- آوف بتاع الناموس (علي فكرة علشان الدبان آكتر)
٣- تتصاحب علي سيويين لآنهم ناس زي العسل


لو حققت التلات حاجات دول حتقضي اجازة سعيدة

ها؟ آي آسئلة ؟