انا معايا nissan sunny 2010 EX Full option (ABS+EBD+BA و كان نفسي اجيب عربية اعلي في الفئة و عجبتني ال fluence 2014 E3 بس متردد بس ثقافة الشعب المصري جهة السيارات الفرنسية. بصراحة عايز حد يقنعني عشان اشتري و انا مغمض.
عرض للطباعة
انا معايا nissan sunny 2010 EX Full option (ABS+EBD+BA و كان نفسي اجيب عربية اعلي في الفئة و عجبتني ال fluence 2014 E3 بس متردد بس ثقافة الشعب المصري جهة السيارات الفرنسية. بصراحة عايز حد يقنعني عشان اشتري و انا مغمض.
الفلوانس مش محتاجة تردد
عربية شيك و محترمة و اﻷفضل في الفئة السعرية دي
توكل على الله
السلام عليكم
حضرتك متردد من اية واحنا نساعدك ؟
الى اقدر اقولهولك انها عربيه محترمه وركوبة وتوكيل محترم وقطع غيار متوفرة وموفرة فى البنزين
بس شوف حضرتك خايف من اية بالظبط واحنا نجاوبك
وبالتوفيق
العربيه بتتكلم عن نفسها شياكه و فخامه و امان و جوده تقفيل و اوبشنز و العربيات الاوروبى حاليا بدات تبقى صاحبه السوق و بدات فى سحب البساط من تحت الكورى و اليابانى
لو عاوز تعرف ثقافة الشعب نحو العربيات الفرنسية شوف اللوجان اللى الناس بتبيعها اغلى ما اشتريتها او اقف كدة فى اى جراج وعد كام عربية رينو موجودة جواليك انا لما جبت الفلوانس خدت بالى اد ايه هى منتشرة ... عموما شوف كدة فى سعرها ايه الاختيارات وقارن هتلاقى نفسك بتجيبها وانت مغمض
واحب اضيف كمان ..... ان سعر اعادة البيع للفلوانس اصبح عالي ..... غير زمان خالص
من افضل العربيات فى الفئات الصغيره ........... لوجان و بيجو 301
من افضل العربيات فى الفئات المتوسطه........ فلوانس
من افضل العربيات فى الفئات الكبيره............. بيجو 508
اقصد بكلمة "افضل" ........... امكانيات وسعه مقابل سعر
لو حضرتك لاحظت ....حتلاقي ان الكل فرنساوي
انا كنت داخل اكتب لحضرتك عده نقط مش عشان العربيه معايا ..
بس أصدقائي الأعزاء ردوا عليك بما يكفي ..
و الناس مش هتركب معاك ع فكره ..
انا الناس عملت معايا زيك كده .. قمت لبست في عربيه زباله .. و بعتها بخساره و هي عامله 1800 كيلو تقريبا عشان اشتري الفلوينس و عامله الوقتي معايا 3500 الحمد لله ..
و ربنا يكرمك لحل كويس ليك
لو على ثقافة الشعب يبقى متخافش من الفلوانس... الناس بقت تشكر وتمجد فيها من غير ما تجربها دلوقتي... طبعا هي عربية ممتازة وفيها كمية أوبشنز مهولة... فلو شكلها عاجبك من برة وجوة توكل على الله... انا اللي قافلني منها اني مش مقتنع بشكلها وخصوصا من الداخل (وطبعا دي اذواق) فلازم لازم تروح تتفرج عليها وتقعد جواها وان شاء الله ربنا يوفقك للخير!! وعموما الفيس ليفت اشيك الى حد ما من الشكل اللي قبليه...
هو ده وقت الفلوانس توكل على الله
العربيه ممتازه و فعلا الرينو و البيجو بدت تتنتشر جامد بفضل اللوجان و الفلوانس و ال301
وبعدين خاللي بالك ارتفاع اسعار الكوري زود مبيعات الفرنساوي ودا انعكس علي انتشار قطع الغيار وتحسين سعر البيع
العربيه ممتازه خصوصا بعد الماتور والفتيس اليابانى و تقريبا كمان التكييف يابانى ودا لغى المشاكل الكتيره بتاعة الميجان من العربيه دى
بس الحاجه الوحيده الى مقلقانى شخصيا هى اعاده البيع لان انا مش مقتنع ان العربيه اعاده بيعها بعد 3 سنين هتبقى قريبه حتى من الالنترا مثلا
وكمان قطع الغيار ومدى توافرها خارج الوكيل لان انت بتحتاج مثلا لا قدر الله فانوس او اكصدام او قربه او خرطوم ,, اى حاجه من المستهلكات زى التيل و الفلاتر ومش ضرورى تجبها بسعر الوكيل
توكل علي الله العربية تحفة
واسعة وشيك واوبشن وعائلية وبتاعة سفر من الاخر فيها كل حاجة الواحد ممكن يعوزها
وربنا يوفقك
كلمنى عن سوق النيسان صنى من 5 سنين ... اما اشتريت الصنى فى 2009 الناس قالولى حرام انت جايب عربية متتباعش وجبتها واما جيت ابيعها والله ما عملت اعلان واتباعت وهى واقفة تحت البيت وكنت بتأمر كمان وهى راشة 4 ابواب وعاوز اكصدامين .. السوق بيتغير اركب اللى يبسطك وسيبك من الكلام دة
كلام جميل
العملية دى تتوقف عليك.. انت مرتاح لااية
انا كنت ف نفس الحيرة وركبت الفلوانس والكورولا
بس ارتحت للكورولا وجبتها
فالاول والاخر ارتياح نفسى مش اكتر
بما انك معاك صنى ex ... فالفلوانس e3/2014 تغيير موفق و حتشعر بفارق مرضى جدا ...
تحياتى ...
بصراحة أجد الفلوانس صفقة رابحة مقابل الفلوس المدفوعة فيها وخصوصا بعد الموتور والفتيس اليابانى والتكييف وهما نيسان يعنى فخامة الأوروبى وأعتمادية اليابانى
اولا: الي كل الاعضاء الذين شاركوا برأيهم، شكرا جزيلا لان مشاركتكم كانت مثمرة و موفقة.
ثانيا: الحمد لله جبت الFluence E3 عن اقتناع تام وكامل الرضا نحوها....العربية فعلا رائعة ...عندي مشاكل شوية في التعامل مع ابعاد العربية (طبعا لانها اضخم من الصني بمراحل) و ما زلت منتظر اجراءات الترخيص
شكرا لكم جميعا و لي الشرف ان انضم الي عائلة رينو عامة و الفلوانس خاصة
الف مليون مبروك يا باشا وعقبال صيانة ال 200 ألف على خير ان شاء الله .. العربية فعلا تحس انها مركب انا اما بركن بفتكر انى ريحت على اللى ورايا وبنزل الاقى فاضل نص متر لحد دلوقتى .. عشان كدة ركبت كاميرا بسنسور بارك .. بس منصحكش تركبه دلوقتى لحد مانشوف فى صيانة ال 10 آلاف هيعملوا ايه فى موضوع الضمان دة