سكودا فليشيا تقرير عن تغيير فتيس موتور 1300 الى فتيس موتور 1600

**adhmmaamon** · 16-01-2014 04:54 PM

بسم الله الرحمن الرحيم
كنت من كام يوم عملت الموضوع ده
http://www.nilemotors.net/Nile/400452-a.html
والحمد لله تم تغيير الفتيس وهاكم ما حدث.
فى البدايه سألت على الفتيس ال1600 وشوفت كذا فتيس وكلهم شبه بعض وماكانش قدامى غير الاعتماد على كلام التاجر وبعدين روحت لواحد صاحبى كان شغال فى توكيل سكودا من فتره .. قالى ان فى واحد معرفه عنده الفتيس اللى بدور عليه وقال كمان ان الاتنين تقريبا واحد هوه الفرق ان الفتيس ال1600 بيوصل ل100كيلو من الثبات فى مده اقل من ال1300 .. المهم روحت معاه شوفت الفتيس واخذته من الراجل على التجربه وللامانه مرضيش ياخد اى مليم الا لما اركبه الاول واجربه .. بس طبعا اتفقنا على السعر والراجل على سعر السوق وحسب ماسألت كان مكارمنى جدا فى السعر (600جنيه) اخدت الفتيس وروحت للميكانيكى بتاعى وفك وركب .. وبالمره خليته بص على الديسك والاسطوانه وتم تغيير الاسطوانه لآن القديمه كانت بتودع والكحت اللى كان قرب يوصل للبرشام بتاعها (100جنيه) كمان تم تغيير البليه من باب النزاهه رغم ان اللى راكبه كانت معقوله بس انا قلت بالمره (55جنيه المانى) والميكانيكى طلع الديسك شيك عليه وراح غاسله بالجاز وراجع كمان على الكوبلن الشمال الداخلى (كنت من قريب غيرت اليمين علشان كان مبوش ) المهم لقاه شغال معقول ... شيكنا كمان على اولسيه المدفع تمام وعلى كاوتشات الكبالن وتم التركيب ومن ثم التجربه .......

اولا العربيه بسم الله سحبها بقى غير عادى ..الاول بيفرك فى الارض والتانى بيوصل ل60 والتالت لحد ال90وكمان 100 كيلو شغال ومفيش نعره من الموتور الرابع جاب لحد ال120 وبعد كده نقلت على الخامس لحد ال 150 والار بى ام من 3 الى 3.5 والعربيه لسه ممكن تديها اكتر من كده ولكن ظروف الدائرى ماسعدتش اكتر من كده بصراحه .. كمان الواحد قلق يجيب اكتر من كده خصوصا ان الوقت كان بدأ يليل .. رروحت بعد كده لصاحب الفتيس واديته فلوسه والراجل راح مدى الفلوس لصاحبى وقاله خليها معاك لحد ما تجيبلى التمام ؟؟؟ قلتله يعنى ايه ؟؟ قالى الراجل مش عايز ياخد تمن الفتيس الا بعد اسبوع من التجربه .. ده اللى حصل لغايه دلوقتى .

انا كمان خدت الفتيس القديم معايا وشايله لآى ظرف طارىء ممكن الواحد يحتاج منه حاجه او شىء من هذا القبيل .

شكرا لكل الساده الزملاء اللذين ساهموا بالرد والنصيحه .

**sakr_skoda** · 16-01-2014 05:20 PM

برافوا عليك يبدو ان التاجر كان سامع كلامى معاك لما قلت خده اسبوع على تجربة وبصراحة الراجل دا محترم واكيد انتا كمان راجل محترم علشان منسيتش التقرير**

ربنا يباركلك وانا سعيد جدا انى او مشارك فى موضوعك الذى اعتبرة فعلا نقلة الى الامام للفليشيا واخوتها**

**sakr_skoda** · 16-01-2014 06:33 PM

المشاركة الأصلية كتبت بواسطة adhmmaamon

ربنا يكرمك ياعم صبحى ويبارك فيك وبصراحه الواحد كل يوم بيستفيد منك ومن زمايلنا اللى معانا اكتر من اى حد ..كفايه انكم مابتبخلوش على حد بالنصيحه .. على فكره انا نسيت اقولك ان كمان الميكانيكى اخد مصنعيه 120 جنيه ..اعتقد كده المبلغ كويس وغير مبالغ قيه...

120 المصنعية كويس جدا جدا ودا راجع برضو اكيد انك راجل محترم وربنا بيوقفلك دايما الناس المحترمين**

**zxcv38** · 17-01-2014 04:25 AM

ماشاء الله شكرا علي التقرير

**Ahm662** · 18-01-2014 06:56 PM

الف مبروك يا فندم على الفتيس وربنا يحفظك من شر الطريق ........

**J A G U A R** · 18-01-2014 09:51 PM

الف مبرووك وتقرير جميل

**aw2100** · 19-01-2014 12:13 AM

1000 مبروك على الفتيس ال1600 وهل اشتريتة متقفل بالكبالن والزيت فيه ؟وانصحك بلاش الجرى انا عارف انه مغرى للجرى وبيوصل سرعة العربية ل 170ك بس فى التأنى السلامة !!!