تجربتى لقياده صنى سوبر صالون الشكل الجديد ومقارنتها مع الاوبترا
حبيت اعملكم مقارنه بسيطه كده بين صنى سوبر صالون 2012 واوبترا 2010 وايه اللى لاحظته بين العربيتين ..
صوت الماتور على السلانسيه فى الصنى كان هادى جدا وناعم .. فى الاوبترا عالى شويه .
الفرامل فى الصنى حسيتها وحشه وعاوزه ادوس جامد شويه علشان تقف .. فى الاوبترا احسن .
فى النعومه الصنى انعم حاجه بسيطه .. بس اكيد علشان فرق الموديل .
حسيت دوسه البنزين فى الصنى بتخلى العربيه تنط من الارض وعايزه رجل حساسه .
طبعا فى الوسع الداخلى العربيتين واسعين بس الصنى كانت اوسع حاجه بسيطه .
الباور الكهربا فى الصنى خفيف جدا جدا بس اكيد بيتقل على السرعات العاليه .. فى الاوبترا الباور زيت وخفيف بردو بس بعد ما جربت الصنى حسيته تقيل .
خامات التابلوه والابواب فى الصنى كانت زباله .. فى الاوبترا احسن .
كرسى السواق فى الصنى عالى وابعاد العربيه سهله .. فى الاوبترا كرسى السواق واطى وبحس انى قاعد على الارض وابعاد العربيه اصعب من الصنى .
العدادت فى الصنى بتنور بالنهار وشكلها جميل .
المرايات الجانبيه فى الصنى كانت موضحه جنب العربيه كويس .. فى الاوبترا مبتكونش موضحه الجنب كله .