الموضوع: منين اجيب نظارة ريبان هاي كوبي

المشاركة الأصلية كتبت بواسطة eng.salama93

محطة محمد نجيب هتنزلها و تسأل علي منطقة النضارات
هي حاجة زي التوفيقية كدا مكان كبير و فيه بتاع 500 محل نضارات و دول اللي بيوزعوا علي مصر كلها
و أغلي و أنضف نضارة هناك ب 150 جنيه من غير العدسات و كل الماركات هناك
صدقني هتندهش لما تروح

بالضبط العنوان كده زي ما قلت
بس مسألة 500 محل دي مبالغ فيها أوي ده لو وصلوا 50 محل يبقى حلو أوي المنطقة أساسا عبارة عن حارة صغيرة فيها المحلات دي وشوية محلات قليلين على الشارع برة
وبرده النضارة الشمس فعلا من 90 : 150 جنيه حسب الموديل والماركة والجودة لكن ازاي من غير عدسات ؟! أي نضارة بتبقى بعدساتها طبعا وفي نضارات ريبان كمان بتيجي معاها حوالي 3 أو 4 عدسات spare بألوان مختلفة
بس على فكرة لو هتروح تشتري نضارة أو اتنين مش هيحسبهالك ب150 جنيه لأن كده انت هتشتري قطاعي لأن ال90 و 150 دول أسعار جملة لكن القطاعي بيختلف ممكن يزود عليك 100 جنيه كمان ولا حاجة وانت وشطارتك أما أسعار الجملة فمش أقل من إنك تشتري 10 قطع أو أكتر

المشاركة الأصلية كتبت بواسطة eng.salama93

لا يا باشا انا بقالي 3 سنين بعمل هناك و هما فعلا حوالي 500 محل لأنك محسبتش اللي جوا البيوت و الحارات التانيه انا لفيتهم كلهم
و النضارة لو بتعملها بتبقي ب 150 جنيه دا سعرها القطاعي مش الجمله الجملة ارخص من كدا بكتير جدا
و كل المحلات بتبيع جمله بس عامله ركن للناس العادية اللي بتاخد نضارة واحده
و سعر الشنبر مبيعديش 150 جنيه
الكلام دا أنا متأكد منه 100 ف الميه لأني عامل هناك بتاع 15 نظارة ليا و لأصحابي و ف محلات مختلفة كمان مش محل واحد

حضرتك كنت بتعمل نضارات هناك أنا كنت شغال في النضارات وبشتري جملة وببيع
ممكن المحلات تكون كتير علشان زي ما انت قلت جوة البيوت والكلام ده وأنا مرحتش طبعا المحلات اللي جوة البيوت دي - إن جاز وصفها محلات أساسا :) - لكن برده مستحيل توصل ل500 المنطقة كلها مفيهاش 500 شقة أساسا !
وسعر الجملة زي ما قلتلك مفيش نضارة شمس هتقل عن 90 جنيه جملة ودي لو حاجة مش أد كده لكن الحاجات المحترمة مش بتقل عن 120 جنيه جملة ولو قطاعي بتتباع من 200 وانت طالع حسب الفصال انت يمكن بس مرحتش بقالك فترة فمش مطلع على الأسعار بعد ارتفاع الدولار وغلو الأسعار عموما أو يمكن مش بتفرق بين الكوبي العادي وبين الفرست هاي كوبي كما يقال
ولاحظ إني بتكلم عن النضارات الشمس مش النظر لأن النظر ممكن تجيب النضارة ب30 جنيه ولو حاجة كويسة بتعمل من 60 وانت طالع أما الشمس فبيبقى دايما أغلى والحريمي بيبقى أغلى من الرجالي

المشاركة الأصلية كتبت بواسطة eng.salama93

الشمس هناك بدأ من 80 جنيه لحد 200 و 250 انا بعرف أفرق كويس بين الكوبي و الفيرست كوبي :d
انا خبره لبس نضارات اكتر من 10 سنين
انا اخر مره كنت هناك و سمعت سعر 200 جنيه كان من حوالي شهر تقريبا و نازل قريب جدا لأن نضارتي اتكسرت ممكن انزل ف خلال يومين او 3 ان شاء الله

طب ما هو ده اللي أنا بقوله