الموضوع: تجربة قيادتي لهوندا اكورد 2013 + مواصفات + صور

السلام عليكم

هوندا الكويت كانت عاملة عروض تصفية على موديلات 2013 شهر 12 اللي فات

قولت اروح اتفرج على الأكورد الجديدة لأني بقالي فترة بفكر اغير عربيتي

العربية بتنزل ب 4 فئات للموتور ال 2.5 ليتر

وفئتين للموتور ال 3.5 ليتر : واحدة سبورت و التانية كلاسيك

انا كنت مهتم بالفئة الكلاسيك اللي بموتور 3.5 ليتر .. لأن السبورت بتيجي بمقصورة سوداء و انا بشوفها فقيرة اوي

المهم انا صورت الفئة الكلاسيك .. ودي الصور مع المواصفات

المواصفات الخارجية



مصابيح امامية LED تشغيل - ايقاف اوتوماتيكي

---الفوانيس دي انا كنت بحسبها زينون .. بس قالولي انها LED .. انا مش فاهم يعني ايه بصراحة بس هي نورها ابيض ثلجي---

مصابيح DLR

مرايا جانبية قابلة للطي كهربائيا مع اشارات للانعطاف

كاميرا مدمجة بالمراة اليمنى

--- الكاميرا دي بتظهر مكان Navigation لما تدي اشارة يمين علشان تجيبلك المنطقة اللي مش ظاهرة بالمراية العادية ---

مصابيح ضباب هالوجين

عجلات من الألمنيوم مقاس 17 بوصة



نظام الدخول الذكي



مصابيح خلفية LED

حساسات للركن مع كاميرا خلفية

مخرج عادم مزدوج

----------------

المواصفات الداخلية



عجلة قيادة مغلفة بالجلد مع حليات خشبية متعددة الوظائف

--- تحفة بمعنى الكلمة ---

عجلة قيادة كهربائية

مثبت سرعة

Smart Start - Stop

العدادت لونها اخضر مع القيادة المتوسطة و لونها احمر مع القيادة الرياضية



تحكم اوتوماتيكي بال 4 نوافذ





مقاعد من الجلد حاضنة للركاب

--- الكرسي فعلا تحس انه بيمسكك من الجانبين ---

التحكم في كرسي السائق كهربائيا في 8 مواضع مختلفة مع دعم لأسفل الظهر

التحكم في كرسي الراكب كهربائيا في 4 مواضع مختلفة

امكانية طي الكنبة الخلفية

تشطيبات داخلية من الجلد و الخشب

---العربية كلها تقريبا متغطية بالجلد و الخشب ما عدا مناطق بسيطة اوي فيها Soft Plastic---



نطام ECON
--- حاجة متعلقة بالبيئة :) ---

زرار لغلق ال Traction Control
--- لو حابب تعمل دريفتات ---

زرار تاني مش فاكره
--- :) ---



مصابيح للقراءة امامية و خلفية

فتحة سقف كهربائية

تظليل اوتوماتبكي للمراة الوسطية



Navigation Screen مقاس 8 بوصة مع توجيه صوتي و كتابة باللغة العربية


شاشة تعمل باللمس للتحكم بالنظام الصوتي و وظائف السيارة

--- العربية فيها شاشتين واحدة نافيجيشن و التانية كاسيت ---

Mouse للتحكم بوظائف السيارة

Bluetooth

تكييف اتوماتيكي ذكي مع تحكم منفصل للسائق و الراكب الأمامي

تحكم نشط بالضجيج

--- مش فاهم ياريت حد يشرح :) ---

نظام صوتي فاخر مع 6 سماعات و مضخم صوت

مدخل AUX - USB



ناقل حركة اوتوماتيك 6 سرعات مكسو بالجلد

حامل اكواب



فتحات تكييف خلفية



مسند خلفي مع حامل اكواب



ستائر جانبية و ستارة خلفية اوتوماتيكية
--- الستارة اللي ورا بتنزل لما تكون راجع لورا ---

----------------

المواصفات الفنية

الموتور 6 سلندر .. 3.5 ليتر 276 حصان و عزم 339 نيوتن.متر مع خاصية VCM
--- ايقاف عمل 3 سلندرات من ال 6 في حين القيادة الهادئة .. علشان توفير الوقود يا جمارك .. افهموا و ارحمونا بقى ---

الموتور التاني 4 سلندر .. 2.4 ليتر 173 حصان و عزم 225 نيوتن.متر

ناقل الحركة 6 سرعات اتوماتيك

او 5 سرعات اتوماتيك للموتور الأصغر

الدفع أمامي طبعا

التعليق أمامي مكفرسون

و خلفي Multi-Link

----------------

أنظمة الأمان

6 وسائد هوائية

فرامل مانعة للانغلاق ABS

نظام التوزيع الالكتروني لقوة الفرامل EBD

نظام تعزيز ثبات السيارة VSA

نظام التحكم بالسحب TSC

نظام المساعدة في الانطلاق على المنحدرات HSA

نظام Lane Watch

Immobilizer

----------------

الانطباع و تجربة القيادة

انا هقيم العربية بناء على الفرق بينها و بين عربيتي .. مازدا 6 الترا .. موتور 2.5 و 180 حصان

الشكل الخارجي من قدام ما اتغيرش قوي عن الموديل اللي فات .. بس شكلها حلو اوي

من ورا .. تحس انها عربية كئيبة

الصالون طبعا ممتاز بامتياز .. الخامات كلها تحفة و زي ما قولت العربية تقريبا كلها متغطية بالجلد و الخشب .. بس الفئات التانية الأقل خاماتها مش قد كده .. حتى الفئة السبورت اللي صالونها اسود مع كاربون فايبر بدل الخشب ما عجبتنيش مع انها اغلى

قعدة الكرسي مريحة جدا

الكونسول الوسطي كان محتاج يترفع شوية .. تحسه نازل لتحت سيكا

العربية كبيرة .. وان كانت في نفس حجم عربيتي فمحستش بفرق في الابعاد

الدركسيون خفيف اوي و انت واقف وبيتقل لما تتحرك .. طبعا رايق في الركن .. في عربيتي بيبقى اتقل

العربية عملتلها تست درايف لمدة تلت ساعة تقريبا

اهم حاجة .. الموتور .. جامد جدا .. مش محتاج تعمل كيك داون .. بيعمل تسارع غريب من اقل دوسة بنزين و خصوصا على الغيار التاني اللي بيبقى تقيل في كتير من العربيات اللي حجمها كبير شوية .. ده التاني بتاعه زي الاول زي التالت ..

الفرامل قوية جدا بردو .. اول ما اخدت العربية دوست فرامل زي ما متعود في عربيتي لدرجة العربية وقفت بسرعة اوي و واحد كان هيخبطني من ورا .. مع ان الفرامل في عربيتي كويسة جدا بس دي احسن كتير

الثبات كويس جدا بردو .. بس عربيتي حسيت ان ثباتها احسن و بردو اخدت كام غرزة كده محستش اني مطمن زي عربيتي .. وان كان بردو ثبات الاكورد ممتاز

العزل طبعا كويس جدا .. ما سمعتش ولا حسيت باي حاجة بره العربية

العربية اللي سوقتها كانت السبورت .. عفشتها كانت ناشفة بصراحة .. انشف من عربيتي اللي هي اساسا عفشتها رياضية و ناشفة

----------------

السعر

السعر الأساسي للفئة دي كان حوالي 9900 دينار كويتي

بعد الخصم حوالي 8800 دينار كويتي .. ما يعادل حوالي 215 الف جنيه مصري

وهي تعتبر الأغلى في الفئة دي كلها .. اغلى من الالتيما و الكامري و المازدا 6 و السوناتا الخ ..
----------------

طبعا العربية تحفة بمعنى الكلمة

و ان كنت بعد كل ده ما اشترتش .. بس مش مشكلة ادينا اتفرجنا و جربنا

ياريت يكون الموضوع نال اعجابكم

في أمان الله

:)

شكرا على التقرير المرتب ده...
أخويا في السعودية معاه الـ2.4 بس أول فئة وبيعتبرها اهانة لما بقوله هي ولا الكامري ولا السوناتا... بيقولي انه بيمشي بالأكورد 200 وكأنه ماشي 120 مثلا... ما شاء الله!!

المشاركة الأصلية كتبت بواسطة Ahmed TRAVCO

شكرا على التقرير المرتب ده...
أخويا في السعودية معاه الـ2.4 بس أول فئة وبيعتبرها اهانة لما بقوله هي ولا الكامري ولا السوناتا... بيقولي انه بيمشي بالأكورد 200 وكأنه ماشي 120 مثلا... ما شاء الله!!

هو عموما الخليج عامل زي مصر في تصنيفات العربيات

يعني في مصر الناس بتقيم العربية على حسب بلد المنشأ .. في الخليج على حسب الماركة

يعني الهوندا (الاكورد تحديدا) و التويوتا بكل انواعها افضل من النيسان و الهيونداي و المازدا و الكيا

وده مش حقيقي .. الفروقات طفيفة جدا .. كلهم Midsize Cars .. حتى كلهم تقريبا نفس المواتير

وده بردو خلى الأسعار في تويوتا بقت خزعبلية

حتى الاكورد اللي عملت عنها التقرير سعرها مبالغ فيه يمكن بحوالي 1000 دينار

موضوع 200 ده طبيعي جدا في السعودية .. طرق سريعة و طويلة و كاميرات سرعة قليلة مع عربية ثابتة .. تجيب اكتر كمان

تحاتي

المشاركة الأصلية كتبت بواسطة sameh_fouad

تسلم على القرير , والتعقيد كمان

بس احب اقولك ان الاكورد 2013 واخدة افضل سيارة فى فئتها متفوقة على كل منافسيها حتى الكامرى اللى تعتبر منافسها الاقرب جدااااااا

ويارب فعلا نشوف الحاجات دية فى مصر باسعار معقولة خصوصا ان استهلاك الاكورد بيزيد بحوالى 4 لتر فى التانك كلة عن السيفيك , بس مين يفهم بقى , ان خلاص مابقاش فية حاجة اسمها مواتير عالية والكلام دة , بقى فية حاجة اسمها تكنولوجيا بتستفاد , من كل ذرة بنزين فى التانك عشان تديك استهلاك مثالى لهذة الفئة

شكرا على مرورك

فعلا الاكورد بقت احسن كتير .. وهي حاليا الافضل و لكن يعيبها سعرها المبالغ فيه مقارنة بالمنافسين زي ما قولت في الرد على الزميل في المشاركة السابقة

موضوع الجمارك ده بقى عايز معجزة .. بس طالما في مستفيدين من الجمارك يبقى هتفضل موجودة

زي الحكومة اللي بتقلب الشعب في قرشين .. تسرق منه قرش و تحل مشكلة عندها بقرش

و الوكلاء اللي لو الجمارك اتشالت هتقل نسبة ارباحهم يمكن للنصف و يمكن اكتر

انا حتى اعتقد ان شركات العربيات نفسها مستفيدة من وضع الجمارك في مصر علشان تبيع عربيات بعينها

المشاركة الأصلية كتبت بواسطة saddam

صديقي المواطن
شكرا للتقرير الوطني الجميل المصروف عليه والمتعوب عليه لنفع إخوتك من أعضاء المنتدى الكرام ولا تحرمهم من كل جديد لك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

ملحوظة على جنب متدارية محدش يبص يا رجالة بص يا مواطن كل كلامك عجبني والتقرير جميل ولكن آخر حاجة معجبتنيش ﻷنها حرام شرعا يعني مينفعش تقول أنا مشتريتش بس أدينه ركبنا والسلام هذا لا يجوز إنك تجرب عربية ومفيش في نيتك الشراء سواء هي أو غيرها مش شرط هي ولكن اﻷساس توافر النية لكن إستغلال حسن ظن الشركات بأنك شاري محتمل وإنت رايح لحب الفضول واﻹطلاع فهذا لا يجوز شرعا وإن كان الشرع لا يشكل معيارا عندك فأيضا أدبيا غير مقبول ولكني أحسبك على خير وإنت فعلا معاك مازدا حديثة فممكن تبيع وتشتري أنا مش بوجه كلامي ليك أنا بوجه كلامي لكل مصري بيسافر بره يمثلنا والدليل على كلامي مفيش في مصر تيست درايف إلا ما ندر وعلى نطاق ضيق أوي ومدروس ﻷنهم هنا مننا وفينا وعارفين اللي فيها
ولذلك إقتضى التنويه

شكرا لمرورك يا سيد صدام

بالنسبة للموضوع اللي على جنب اللي كل الناس شافته .. في كام نقطة للتوضيح

لو كانت دي نصيحة .. فكان ممكن حضرتك تبعتهالي في رسالة خاصة مش على الملأ و كنت هتقبلها بصدر رحب .. حتى حضرتك اتذكر قبل كده واحد نصحك بشئ تقريبا يتعلق بمصروفاتك على السيارات وحضرتك قولتله نفس الكلام .. بل كمان زدت في ان حضرتك خريج للدراسات الاسلامية و لا تحتاج للنصح .. فكان الأولى تعمل بكلامك

الموضوع التاني اني كنت فعلا ناوي على الشراء زي ما ذكرت في بداية الموضوع
قولت اروح اتفرج على الأكورد الجديدة لأني بقالي فترة بفكر اغير عربيتي

اللي حصل بعد كده (مع اني مش ملزم بالتفاصيل) ان لاقيت العربية كفالتها 3 سنين مش 5 زي معظم الشركات .. ومفيش اي عروض صيانة زي معظم الشركات بردو .. وفي نفس الوقت ظهرت قدامي عربية BMW مستعملة بسعر مغري فقلبت لي كل حساباتي

حاجة اخيرة بالنسبة للتست درايف .. انا مختلف معاك في كده حتى لو مش هشتري مفيهاش حاجة اروح و اشوف العربية و اجربها سواء شرعا (اللي يشكلي اهم معيار) او ادبا .. لأن دي بالنسبة للشركة تعتبر Promotion زي اي اعلان مثلا الشركة بتصرف عليه و هي عارف ان كل الناس هتتفرج عليه ومش كلهم هيشتروا وزي ال Free Samples اللي بتتوزع على كل الناس مش اللي هيشتروا بس

في نقطة غايبة عنك ان في الخليج ال Cars Turnover عالي جدا .. المعدل الطبيعي لتغيير العربية بيبقى من سنتين لتلاتة .. يعني الشركة بتخلي الناس تجرب العربية حتى لو مش هيشتري دلوقتي لأنه في خلال سنة او اتنين هيفكر يشتري فممكن يفتكر العربية اللي جربها و يرجع ياخدها .. على عكس مصر اللي صاحب العربية بيخلي عربيته عنده بال 5 سنين و 10 كمان فناس كتيرة بتتفرج لأجل الفرجة ( اللي هو بردو مش غلط و لا حرام)

ما تقلقش يا سيد صدام .. معظم المصريين في الخارج سفراء مشرفين لبلادهم

تقبل ردي و شكرا لمرورك مرة اخرى

المشاركة الأصلية كتبت بواسطة hossam_elwani

عقدنا عقد

ليه بس ؟؟

فرج ربنا قريب ان شاء تعالى

المشاركة الأصلية كتبت بواسطة mahmoud_afifi

تقرير هايل وانا من عشاق الاكورد

منور يا زعيم