دجله بالمز ودجله جاردنز vs الشيخ زايد

**midoabdeen** · 18-01-2014 11:42 AM

السلام عليكم ورحمة الله وبركاته

متابعه لموضوع البحث عن الشقه

انا اتصلت بمعمار المرشدى اسال على اسعار الشقق فى مشروع دجله بالمز ودجله جاردنز

لاقيت الاسعار كويسه الى حد ما بالنسبه ليا ال80م 137 الف

وكمان كومباوند متكامل الخدمات

بس المشكله انه على اول طريق الواحات

المسافه بين الشغل والمكان دا تقريبا 35 كم

هل المكان دا كويس ولا لا

لانى كنت استقريت على زايد المسافه تقريبا لا تتعدى 20كم وكمان طريق سالك وكويس

الواحد خلاص دماغه انفجرت من كتر التفكير لان المبلغ المتاح مكتف الواحد وكمان عايز حاجه تكون مستوى كويس وفى نفس الوقت امان انتوا ايه رائيكوا فى المكان دا كويس والمسافه قريبه ولا زايد احسن

طبعا انا بقارن بالاتى
1- فرق مستوى اجتماعى طبعا علشان التربيه والاطفال مستقبلا وكده
2- راحه نفسيه للمكان
3- قرب من مكان شغلى (القريه الذكيه) وكمان لوسط البلد زيارات وكده (واحتمال انى ممكن يحصلى اى ظروف انى اسيب الشغل او اتنقل لمكان تانى )
4- مساحه الشقه والتقسيم مش هيفرق اووى معايا اهم حاجه ان المساحه تكون مناسبه مش اكتر لان دى حاجه الواحد هيبدا فيها حياته
5- امان ودا اهم حاجه طبعا امان الطريق والمكان اللى هسكن فيه

**Ahmed_Adham** · 18-01-2014 12:23 PM

زايد ونس وفيها كل حاجه وقريبه جدا من شغلك. اسأل نفسك لو انت مش في البيت والمدام خارجه تشتري حاجه هتلاقي مواصله قريبه ولا لاء؟ الاولاد لو رايحين درس هيكون قريب ولا بعيد؟ لو فيه ظرف طاريء وعايز ترجع البيت بسرعه هتلاقي الشيخ زايد أقرب الخ الخ.

**minicooper20** · 18-01-2014 12:26 PM

حدايق اكتوبر كلهاااا مسحتها نصب ال 80 متر دى ممكن تصفى 50
و ال 65 بتصفى40 و قيس بنفسك
خليك فى زايد ا و حدايق الاهرام

**midoabdeen** · 18-01-2014 02:39 PM

المشاركة الأصلية كتبت بواسطة ahmed_adham

زايد ونس وفيها كل حاجه وقريبه جدا من شغلك. اسأل نفسك لو انت مش في البيت والمدام خارجه تشتري حاجه هتلاقي مواصله قريبه ولا لاء؟ الاولاد لو رايحين درس هيكون قريب ولا بعيد؟ لو فيه ظرف طاريء وعايز ترجع البيت بسرعه هتلاقي الشيخ زايد أقرب الخ الخ.

انا لو هاخد فى زايد هاخد فى ال16 هو حوالى 7كم من هايبر
اللى كنت اقصده هل طريق الواحات ابعد من المسافه دى كلها ولا لا
ومعاك حق طبعا فى اللى بتقوله وانا معاك فيه

المشاركة الأصلية كتبت بواسطة minicooper20

حدايق اكتوبر كلهاااا مسحتها نصب ال 80 متر دى ممكن تصفى 50
و ال 65 بتصفى40 و قيس بنفسك
خليك فى زايد ا و حدايق الاهرام

لا والله ياعنى شركات كبيره زى دى ممكن تلعب اللعبه الزباله دى
ياعنى واخدين حقهم بما فيه الكفايه وكمان ينصبوا

حدايق الاهرام متهيئلى نفس مسافه المشروع اللى فات ولا ايه
وكمان اسمع ان الكهرباء مش موجوده انت بتاخد ممارسه باين ب بمبلغ شهرى
وكمان انا مش عايز مكان زحمه ولامم علشان مايبقاش شعبى مستقبلا
مش عارف بقى دا هيبقى متوافر فى حدايق الاهرام ولا ايه

**emicko88** · 19-01-2014 07:47 AM

طيب كنت عايز اسأل حضرتك
لما دورت في زايد .. الحي الـ16 كان قصدك بدر الدين ؟
اللي أعرفه انه كاش بس بـ130 ألف
ولا في مشاريع تاني هناك بالتقسيط ؟

سؤال كمان، بالنسبة لحدائق اكتوبر .. حضرتك شفت حي المنتزة ؟

شكرا

**A.Saad** · 19-01-2014 12:32 PM

طريق الواحات ابعد طبعا من زايد
شوف المنطقة هناك شكلها عامل ايه
مرتاح ليها ولا لا
المستوى العام
الخدمات

وياريت تقللى الاسعار عامله ايه فى دجلة دلوقت
جارك فى القرية برده

**r0xer** · 19-01-2014 07:58 PM

انا لو منك هشتري في حدائق الاهرام...عيوبها بسيطة وهتتحل مع الوقت والجهاز بتاعها نيلة اه لكن سكان المدينة مش ساكتين ودايما التطوير شغال في المدينة وكفاية المترو بيركب فيها والمتحف لما يخلص و4 بوابات وامن وصور قرب يتبني بالكامل..الخ.

عيوبها الزحمة المتوقعة مستقبلا ودا الله اعلم بيه هيبقى امتى وسنة كام وهيحصل ولالا...