اه اه يا رقبتي يانا :( عاوز حل مش قادر

**MRBEBO** · 19-01-2014 06:24 PM

بقالي اسبوعين رقبتي وجعاني قوي

المشكلة من المخده او من اني بحط ايدي تحت المخده أنا ونايم

انا عاوز حل لاني متعكنن اخر حاجه والموضوع ده مخليني مش مركز

انا جبت ميلوجين وبعد شريط كامل لولا ما رقبتي فكت سنه

عاوز ترشحولي مخده طبيه كويسه

انا شفت دي

https://www.jumia.com.eg/Water-Pillow-111305.html

على امازون

Mediflow Original Waterbase Pillow:Amazon:Home & Kitchen

ايه رايكم فيها ولا فيه حاجة تاني احسن

**Imhotep** · 19-01-2014 11:28 PM

انا تقريبا عندى نفس مشكلتك لانى بنام و وضع رقبتى غلط رغم انى بستخدم المخدة الطبية من سنين بس برضه بصحى رقبتى هتموتنى من الجنب اليمين العضلات بتبقى متيبسة...... المهم سيبك من ميولجين ملوش لازمة انا بستخدم نورجيسك و ده باسط للعضلات+ بارسيتامول للالم...... تاخد اتنين و تشرب وراهم كباية شاى او نسكافيه لتحسين تأثير الباراسيتامول و هتبقى تمام خلال ساعة

**mr_vampire** · 20-01-2014 12:27 AM

الف سلامة ياشباب الحل ده جربته مره وجاب من الاخر
غسلتها بمية دافية ونشفتها ودهنتها مرهم هيموكلار مش عارف لسة موجود ولا ايه وهو باسط للعضلات وتلفها كويس بكوفية او شال صوف ونمت

صحيت الصبح بحرك يمين وشمال لقيتها عمالة تطرقع في كل اتجاه وفكت وبقت تمام الحمد لله

اعتقد الحل كان فالتدفية والمرهم

جربو كدة يمكن يساعدكو والف سلامة كمان مرة لاني عارف الوجع ده بيقريف الواحد وبيخلي الروح فالمنخير

**canner** · 20-01-2014 08:39 AM

جرب تدهن فولتارين و بالنسبة للمخده فيه مخده على ما اتذكر جبتها من يانسن نص قطن و نص فايبر كويسة بعد ما كانت رقبتى بتوجعنى

**أحمد كمال** · 20-01-2014 09:10 AM

مخدة قطن ناشفة تنجيد من ام 20 و لا 30 جنيه من المنجد و يكون ارتفاعها مساوي للمسافة بين طرف كتفك و بداية رأسك و ادعي لي

**محمد يوسف** · 20-01-2014 09:22 AM

طبيا أنصحك بأقراص نورجيسك (2 قرص مع كوباية شاى أو نسكافيه) زى ماقال أخونا قال وأزود عليهم رأى الأستاذ فامباير بس بدل المرهم الهيموكلار استخدم مرهم اسمه (ايفابوراب) هو عبارة عن فكس بتاع زمان وده برطمان ب 40 جنيه بس بيعيش

المخدة رأى الأستاذ أحمد كمال جاب من الأخر

وشفاك الله وعافاك

**salodas** · 20-01-2014 11:55 AM

أنا بأه الموضوع ده لسه حاصلى أمبارح .
نزلت للدكتور قالى دى حاجة اسمها freezing shoulder وسببها تيبس عضلات الرقبة + البرد .
الحل أى كريم من الى الشباب قالو عليه فوق + تدليك ومساج صح الصح + دش سخن + التدفئة .

طبعا انا لا أنصحك بأدوية مسكنه طالما أنت تتحمل الألم ... وكمان بلاش الأدوية الباسطة للعضلات طالما انت تتحمل الألم
ربنا يشفيك والمسلمين جميعا .