عشان تبقى صاحب عربية في مصر "مواصفاتك لازم تبقى ايه؟"
مساء الخير على اصحاب العربيات وعلى اللي بيفكروا يبقوا اصحاب عربيات وعلى اللي زهقوا وبطلوا يشتروا عربيات وعلى اللي بيحبوا الكلام في العربيات
بما ان انت مواطن مصري فا أكيد أكيد يعني لازم تختلف عن الاخرين خااااالص لان اي مواطن في اي دولة حمادة وفي مصر حمادة تاني خاااااااااااااااااااااااا ااالص خاصة فيما يختص بالعربيات وعشان كدا اوعى تفتكر انك بالساهل كدا هاتشتري عربية وتاخد لقب صاحب عربية كزا لا لا لا لا لا لا خالص دا انت لازم تتمتع بمجموعة من الصفات الاول عشان تبقى مؤهل لحمل هذا اللقب اومال هوا الموضوع لعبة ولا ايه !!
وعشان ماتتخدعش في نفسك وتفتكر انك ممكن تبقى صاحب عربية - في مصر - بالساهل كدا قلت اساعدك عشان ماتتصدمش وياعيني منعرفش نعالجكك واهلك يحتاسوا بيك عند الدكاترة شوية والميكانيكية شوية والكهربائية شويتين
خد الخلاصة مني بقى واقعد راجع نفسك كدا وشوف الصفات المذكورة ادناه دي تنطبق عليك واحد واحد ولا لأ ولو في حاجة منهم ناقصة او شاكك فيها ياريت تراجع نفسك كويس و قد اعذر من انذر
المواصفات المطلوبة :
اولا : الغناء الفاااااااااحش
اوعى تفتكر انك لو هاتشتري عربية صغيرة ولا على قد الايد وتشتريها بالتقسيط او حتى مستعملة دا هاينفعك نووووووووووووووووووو اطلاقا انت فاهم غلط لان الموضوع مش مجرد تمن العربية بس اللي هوا بطبيعة الحال في مصر اغلى من كللللللل الدول التانية وياريتها عربيات تستاهل انما في الاخر يدوب صفيحة على اربع عجلات بتقول بيب بيب وتكلفك الشىء الفلاني بقى ان كان بالقسط هاتدفع فوايد يا حلو 10% في السنة وحط عليها مبلغ التأمين السنوي اللي هوا مبلغ وقدره دا غير الصيانات الدورية عشان ضمان المحروسة ميضيعش من ايديك ولو فكرت تجيب مستعمل قال يعني عملت ناصح وبتوفر خد عندك بقى مصاريف تصليح بالهبل وكل شوية قطع غيار والحتة دي مش لاقيها والحتة دي مفيش منها صيني دا غير اشتغالات الصنايعية اللي هاتظبطك
ثانيا: ناصح وتفهمها وهي طايرة
مانت لو مش ناصح ومدقق كدا وتفهمها وهي طايرة هاتتظبط زي ما قلنا من الصنايعية واشتعغالاتهم وتدفع الطاق طاقين دا غير انك هاتلبس في تصليحات مالهاش اي لازمة اساسا ومش بعيد ياخدوا من العربية الحاجات السلمية ويحطولك حاجات بايظة دا غير اشتغالات التوكيلات اللي عينك عينك في المصنعيات واسعار قطع الغيار اللي مضروبة في اتنين بس انت لو ناااااصح هاتعرف تجيبها منين باسعارها الحقيقية ومايتضحكش عليك وتطلع مضروبة
ثالثا: الحنية و الكرم
ايوة متستغربش لازم تبقى حونين كدا مع العربية وحسيس وتدلعها ايش غطا وتر بروف وايشي فرش جلد وايشي جنوط على شماسات او فاميه وميضرش لو كاسيت جديد وسماعات بالشىء الفلاني يعني متبخلش عليها بحاجة دي شايلاك وصايناك من زحمة وبهدلة المواصلات بردو ولازم تخاف عليها وتحطها في عنيك او في جراج لزوم الامن والامان اومال الغالية هاتنام في الشارع كدا عرضة للي يسوى ومايسواش !! مايصحش
رابعا: الصبر و البرود "تلاجة مينفعش لازم ديب فريزر"
عشان بعد كل اللي انت بتدفعه دا وكل اللي الدلع اللي انت بتدلعه دا وكل اللف والدوران اللي دوخته على بال ما لقيتها لما هاتمشي في شوارع المحروسة خد عندك بقى نقر على حفر على مطبات على بلاعات بكل الاشكال والمساحات والاعماق والارتفاعات كوكتيل جامد اخر حاجة وتضرب انت والعربية في الخلاط دا كله طبعا غير سواق ميكروباص يخبطهالك ومتعرفش تعمل معاه حاجة عشان البيه بلطجي و انت ابن ناس ولا موتوسيك وانت في اشارة زاااااااااانق نفسه عشان يعدي بالعافية ويحكهالك ويجري ولا عيل محروم يجيبلك الجنب كله من اوله لاخر بمفتاح او حتى يرسملك عليها رسم سيريالي في الحلالات دي كلها لازم تبقى باااااااااااااااااااارد والا الانهيار العصبي قادم لا محالة
خامسا: مقاتل
بعد كل اللي انت عملته عشانها دا واستحملته لجل خاطر نور فوانيسها - انتو مش عارفين انكوا نور عنينا ولا ايه - وطبعا بتحسس عليها وتدلع فيها هايجي شريك او شريكة حياتك يقولك انت بتهتم بالعربية اكتر مني وبتجيبلها كزا وتعملها كزا وتتكلم معاها ومتتكلمش معايا وهاتك يا خناق فالازم تكون مستعد لمثل هذه المعارك دفاعا عن محبوبتك عربيتك الحب الحقيقي في حياتك
سادسا: مقامر
تعتبر نفسك داخل لعبة قمار والعياذ بالله بس للاسف هي دي الحقيقة المرة عشان انت بعد ما تعمل كل اللي عملته دا وتستحمل اللي انت استحملته دا كله وتدي حب واهتمام وحنية ومجهود وفلووووووووووووووووووس كتيييييييييييييير ممكن تصحى الصبح ماتلاقيهاش :o الغالية اتخطفت في عز شبابها لا طفشت بمزاجها ولا عملت خلع ولا طلبت طلاق ابدااااااااااااااا دي اصيلة وبنت اصول اتاخدت غصب ياعيني و الحرامي خدها وطااااااااااااااااااااار و انت وحظك بقى يا تدفع تااااااااااااااااااني وترجعلك الغالية يا تعيش بقية حياتك هائم على وجهك عايز ترلوب هاتولي ترلوب و الملاحة والملاحة وحبيبتي ملو الطراحة
يعني من الاخر و باختصار شديد عشان تقدم عالخطوة دي في مصر لازم تبقى مجنون رسمي
