عرض للطباعة
بعد أحلى مسا على أحلى منتدى فى الدنيا
أخدت قرار بإذن ربنا إن عشنا وكان لينا عمر أطلع أنا والأسرة الكريمة على الخطاطبة يوم الجمعة الجاية
أولا أنا لسة جديد فى السواقة أصلا (بقالى شهر بس)
ثانيا مش عارف الطريق إلا من خلال خرائط جوجل
فاحبيت أسأل حضراتكم عن حال الطريق اليومين دول (اصلاحات - تحويلات - كمائن - ...إلخ)
شكرا لمساعدتكم مقدما
لو لسه جديد فى السواقه بلاش تطلع على طرق سفر فى الاول كده
لانك هتلاقى عربيات ماشيه بسرعه عاليه جداً
ولازم برضه يبقى عندك خبره بالميكانيكا او يكون معاك بعض قطع الغيار المستهلكه
بحيث لو لا قدر الله عطلت يبقى تعرف تتصرف
و بلاش الجمعة الجاية علشان قلق 25 يتاير المتوقع
هقولك كل اللى اعرفه:
فى تحويلات على الطريق .. وشوية تنزل تاخد الطريق الفرعى وترجع تانى
والتحويلات بتتغير .. وبيكون قبلها لمبات تحذير ودى بتنفع بالليل .. أما بالنهار مفيش أى لافتة بخصوص الموضوع دة
الطريق حالياً تحت الإصلاح وبقاله كدة زمن :d .. وكل شركة واخدة جزء وشغاله بمزاجها
حالة الطريق عموماً مختلفة .. لإن فى قطاعات خلصت وفى لسة مخلصش .. الجزء الأسوأ هو اللى قبل إسكندرية على طول .. دى أصلاً حارة إتجاة واحد وحالياً قسموها بطوب كدة وخلوها رايح جاى لمسافة مش بسيطة وقبل اسكندرية بتطلع تانى على الطريق بتاعك
الجزء من بعد بوابات القاهرة لحد حوالى 50 كيلو .. كويس جداً .. دة للإتجاهين وخصوصاً اللى راجع من اسكندرية
من بعد النوبارية الجديدة .. الكيلو 75 .. لحد إسكندرية .. معقول .. دة للإتجاهين برضو .. من معقول إلى سئ
لو فى أى سؤال إتفضل
الوصلة من الاسكندرية الصحراوى الى طريق الخطاطبة - الطريق كله مكسر بمعنى الكلمة ومطباته مطبات النقل التقيل
فى نفس الوصلة احتمال تركب معدية نيل انت والعربية :) علشان تعدوا الناحية التانية
اوعا ثم اوعا مرة تانية انت تاخد طريق الخطاطبة القناطر الخيرية لانى مرة تعرضت فيه لساعة وقوف بالعربية وكان معدى حوالى 1000 جمل عمالين يزقوا بعض بغباوة :) انا كنت مرعوب يا جمل منهم يتخض بس او يريح على السقف :)
الطريق بتاع الخطاطبة اتجاهين رايح جاى فى حارة واحدة خلى بالك كويس وياريت متروحش المشوار ده خالص وخصوصا 25 يناير كمان :)
ربك يستر
شكرا لنصيحتك ياباشااقتباس:
المشاركة الأصلية كتبت بواسطة amr011111
عموما أنا مش بمشى بسرعة كبيرة إلا فى الأماكن اللى حافظها
من ناحية الميكانيكا إن شاء الله هاشيك عليها قبل السفر وربنا يسترها فى الباقى
شكرا للنصيحة بس للأسف مش قدامى غير الجمعة دى وربنا يسترها من عندهاقتباس:
المشاركة الأصلية كتبت بواسطة cameeron
خلى بالك بردوا متاخدش طريق الخطاطبة برقاش - الا لو كان معاك بربيز ازاز مستغنى عنه
لان ده طريق النقل وبسسسسسسسسسسسسسس
نقل زلط - طوب - حجارة
انا والله مرة طارلى بربيز بسبب النقل ده عالطريق ده
كويس انى فتكرت وقلتلك
شكرا على الشرح الوافى دهاقتباس:
المشاركة الأصلية كتبت بواسطة shocky
أنا مش هاوصل لحد اسكندرية أنا لحد الخطاطبة بس يعنى حوالى 70 - 75 كم تقريبا على قد معرفتى من خرائط جوجل
اقتباس:
المشاركة الأصلية كتبت بواسطة look344
ألف مليون شكر لنصايحك الغالية دى يا باشااقتباس:
المشاركة الأصلية كتبت بواسطة look344
أنا مش ناوى على طريق برقاش
أنا بتكلم على طريق القاهرة اسكندرية الصحراوى لحد وصلة الخطاطبة يمين وبعدين الوصلة نفسها