معلش انا تعبتك معايا ٫٫ وان شاء الله هروح جزيره الجيفترن والف ليله وهسآل علي المطعم ده الف شكر
عرض للطباعة
أنا لسه راجع من هناك الجمعة الي فاتت. بص يا باشا. الغردقة مدينة جميلة جدا وأدمية لأبعد حدود. الجو الصبح ربيعي وممكن تلبس نص كم وشورت بس بليل بيسقع خفيف يعني مش لازم تاخد معاك جاكت تقيل قوي. جاكت خفيف هيكون مناسب (بس لازم يكون معاك جاكت :) ). بالنسبة للانتقالات, افضل وسيلة للتحرك هناك هي الميكروباص. أنا كنت بقولك مدينة أدمية بالذات بسبب الميكروباص. الميكروباصات هناك كلها تويوتا وحالتها نضيفة جدا. مش زي القاهرة هنا بتبقى منتهية الصلاحية. أبعد مشوار رحته من الدهار للممشى السياحي هناك دفعت فيه جنيه ونص. التاكسي مش عارف كام لأني مستعملتوش بس سمعت انو بيكون في المشاوير القصيرة في حدود 5 جنيه وفي المتوسطة 10 جنيه وفي الطويلة عشرين. أنا أول ما نزلت من السوبرجيت لقيت سواقين تاكسي في منتهى اللزاجة. عقبال ما كنت بنزل الشنط كان واحد فيهم لزق لصديق كان معايا قاله هوصلك عند الممشى السياحي (مكان ما كنا مقيمين هناك) ب 40 جنيه وصاحبي علشان كان مش عارف وكان فاكرها زي شرم الشيخ فقاله ماشي. بس على مين, حلقتله وخدت ميكروباص (كنا 3 أصدقاء) دفعت أجرة 4 افراد علشان كان معانا شنط (هاند باج مش كبيرة قوي) دفعت 6 جنيهات (الفرد بجنيه ونص) يعني ببلاش تقريبا بالنسبة للتاكسي :)ولو ركبت تاكسي فاصل معاه ومتخليهوش يشتغلك. افضل أماكن للخروج بليل هي في عند شارع الشيراتون عند منطقة السقالة مليان مطاعم وقهاوي وحيوي جدا بليل. أنا لما كنت هناك رحت مطعم سمك ستار فيش (star fish) خياااااااااال. أنا خدت وجبة اسمها "بورسعيدي" عبارة عن أرز بالجمبري والكليماري وشوربة سي فود وهمية وقطعة سمك فيليه محترمة وقطعتين جمبري وبتاع 4 او 5 قطع كليماري صغيرة وسلطة بابا غنوج وطحينة وكان تمنها 65 جنيه وبتشبع (من غير الخدمة والضريبة والتيبس) وشبعتني جدا :) وبقية أسعاره مناسبة جدا من وجهة نظري وممكن تاخد أي نوع سمك أنت عاوزه ويعملهولك بالطريقة الي انت عاوزها. أصدقائي اخدو سمك شعور وعملهلهم جزء صيادية وجزء مشوي على الفحم. الكيلو كان ب 75 تقريبا. برضه روح شارع شيري وده متفرع من شارع الشيراتون وده مليان مطاعم برضه وفيه محل مشويات هناك اسمه سي السيد شكله جامد بس للاسف ملحقتش أجربه. برضه الممشى السياحي بليل كله لذيذ المشي فيه. جميل وراقي وفيه مطاعم وكافيهات سياحية بس ده بالذات هيخليك تحس بالأسى على ما وصل اليه حال السياحة هناك. هتلاقيه عامل زي مدينة الاشباح واعداد الناس والسياح هناك ضعيفة جدا. ولما تكلم مع الناس بتو المحلات هناك هيقولولك تعالى من 3 سنين مكنتش هتلاقي مكان تقف فيه وللاسف هتلاحظ هناك ان فيه مطاعم كتير ومحلات مغلقة (جابت ضرفها). بالنسبة للأمان هناك فهي مدينة أمنة جدا. مش بقولك أدمية عن القاهرة! لدرجة اني خليتني أفكر انقل حياتي هناك. أسعار الشقق هناك أرخص من القاهرة وبتبقى في مكان أدمي ونضيف! بالنسبة للفسح هناك عندك رحلة سنوركلينج لجزيرة الجيفتون على يخت بتكون في حدود 80 جنيه للفرد شاملة وجبة لا تسمن ولا تغني من جوع بس الرحلة نفسها جميلة وبتبقى من 9 الصبح لحد الساعة 2 أو 3 العصر تقريبا. عندك برضه رحلة سفاري بتبقى في حدود من 120 ل 150 جنيه وبيجي مسؤول الرحلة ياخدك بعربية لاندكروزر من قدام باب القرية لمكان في الصحراء وهتركب هناك بيتش باجي بتاع نص ساعة أو ساعة ألا ربع بعد كده هتروحو عند مكان فيه بدو وتتفرجو على حياتهم وتركب جمل وبرضه بيبقى فيه وجبة لا تسمن ولا تغني من جوع :). بس رحلة ظريفة جدا وأنصحك تروحها. لو ليك في الأكوا بارك والكلام ده عندك هناك سندباد أكوا بارك. لو حجزت تذكرتها من عندهم هتبقى غالية (حوالي 350 جنيه للفرد) فأحسنلك تحجزها عن طريق شركة سياحة من الشركات الي هناك (هتلاقيها في حدود 170 جنيه) أعتقد بتبقى شاملة فطار وغداء تقريبا اوبن بوفيه والمشروبات (all inclusive) لحد الساعة 5 بالاضافة للدخول للأكوا بارك طبعا. فيه الف ليلة وليلة زي ما تفضل أحد الأعضاء وذكرها بس مجربتهاش برضه بصراحة. أسف أني طولت عليك بس حبيت أوصلك أكثر قدر ممكن من المعلومات ولو احتجت لأي استفسار فانا تحت أمرك. وأتمنالك رحلة سعيدة هناك
اينعم. ده أنا لسه دافعهم عدا ونقدا :) بس الغداء مكانش بوفيه مفتوح. هما يدوبك شوية رز على شوية مكرونة على حتتين سمك تشوفهم بالميكروسكوب وكوباية بيبسي بلاستيك وشكرا على كده :)
بالنسبة لموضوع قلة السياح, فالوضع هناك ميسرش نهائي للاسف وهما عندهم أمل هناك ان الدنيا هتظبط بعد لما المطار الجديد هناك يخلص بعد حوالي 4 شهور. ربنا يصلح الأحوال.
بالنسبة لكلام road_devil والشباب كلهم فهو تمام التمام وبالنسبة لسندباد اكوا مارين عندهم غواصة بتنزل تحت المياة بتشوف بيها الشعاب المرجانية والأسماك بس ممتعة جدا وفى شركة تانية اسمها aquarious برضه عندهم نفس الغواصة وسمعت ان aquarious احسن من سندباد فى الحكاية دى. خلاصة الكلام: فاصل فى أى أسعار تتعرض عليك ولو اتقال لك تتطلع سفارى ب200 جنيه الفرد قول لأ 100 وكدة يعنى والتاكسى فاصل معاه برضه
بالمناسبة بقى يا جماعة بالنسبة لجو شرم دلوقت يبقى عامل ايه؟! :)