الباجيرو .. و رحلة مفاجآت مع دايموند و الرواس و مصرية ..
السلام عليكم
اشتريت من اسبوعين تلاتة عربية باجيرو 2006 بفضل الله
اللي عجبنى في العربية دي بالذات ان صاحبها بيعمل صيانات في الرواس من الزيرو بالفواتير
المهم قررت اكشف عليها و استبعدت الرواس كنوع من الضمان و قررت اروح التوكيل الجديد دايموند و رحت فرع المعادي..
الفرع فاااااااااااااااضي تماما .. نضيف جدا .. كانه اتفتح امبارح
طلبو مبلغ خزعبلى للكشف .. بالتفاوض نزل ل 480
الناس فلو العربية بمعنى الكلمة 4 ساعات و 5 اختبار طريق و كانو كل ما يشوفو حاجة يندهولى
الخلاصة في شوية مفاجآت:
اولا .. الرواس بيركب قطع غيار غير اصلية و بيحاسب على انها اصلى
ثانيا .. الكشوفات بتاعة الرواس في الفواتير اهملت جوانب مهمة جدا في العربية
ثالثا .. جداول الصيانات غير مطابقة لتعليمات ميتسوبيشي
المهم كلمت كريم قلتله الحقني ادانى نمرة المهندس طارق زويل اللي هو زميلنا هنا و شغال في مصرية
كلمته قاللي الرواس فعلا بيستخدموا حاجات غير اصلي و تعالالى مصرية و الاسعار عندي ارخص و انا بتحدى
قلت ماشي..
رحتله مصريه اللي في قليوب
المهم
المكان زحمة .. ملعبك .. و وريتلو بتوع دياموند طلبو ايه و وعدنى ان الاسعار عنده احسن
بعد 4 ساعات طلعولى مقايسة
و المفاجأة .. 80% من قطع الغيار اغلى من دياموند و الباقى مش موجود و المصنعيات متقاربة جدا
كلمت طارق قلتله قاللي ما معناه .. دي الاسعار اللي عندي
قلتله ده غير اتفاقنا و مش هصلح عندكم
قالولي يبقى تدفع 300 ج كشف ..
خناقة و حكاية .. و بعدين بالزعيق بقو 200 .. دفعتهم غير راضي و العربية حكوها .. و مشيت بادعى على المهندس طارق .. انه جابنى على الفاضي و القصة كانت بس انى اعمل الشغل عندهم .. و كلمت كريم قاللى حقك تحكي اللى حصل على نايل موتورز
رجعت دايموند .. و هناك عرفت ان في موزع قطع غيار معتمد من التوكيل .. اسمه الهدي فيالمعادي
رحت اشتريت منه القطع بخصم 10% عن التوكيل و ركبتها و الحمد لله
الخلاصة
مصرية تستحق سحب التوكيل منها .. عدم اهتمام و لا مبالاه و مغالاه .. قرف
دايموند بيحاولوا يثبتوا نفسهم .. مهندسين مؤدبين و خدمة عملاء جيدة
ملحوظة انا معايا المقايسات بالفواتير علشان المصداقية للى يحب ابعتهمله