-
تقرير تغيير وش السلندر
السلام عليكم ورحمة الله وبركاته
هتكلم النهارده عن رحلو تغيير وش السلندر لعربيتى الابيزا 94 موتور 1300 كاربراتير ،
اول الحكايه ابتدت معايا لما لاحظت ان العربيه بتسخن بسرعه جداً وبلاقى القربه فضيت ومفيش فيها ميه خالص ولما بحط ميه بتبقى مصديه ، فشكيت ان ممكن يكون فيه تسريب ، رحت لبتاع ريداتير قالى ان مفيش تسريب فى الخراطيم وعمل دورة غسيل ، بس قالى ان القربه بتجيب هوا ، تحس ان المياه بتاعة القربه بتغلى كده ، روح للميكانيكى وخليه يبص عليها ،
انا اول ماشفتها قلبى وقع فى رجلى وقلت يبقى اكيد جابت جوان وش السلندر
تانى يوم اخدتها ورحت لميكانيكى فولكس جنبى فى المنطقه وقلتله على الاعراض ، اكد كلامى فى انه كده جوان وش السلندر
بص على مقياس الزيت لقينا الزيت مطحن بطريقه فظيعه ، مع العلم ان اليوم الى قابليها كنت مشيك على الزيت ومكنش باين ان فيه حاجه مش طبيعيه ، اصلاً الزيت كنت لسه مغيره بزبت فالفولين ومكملش 30 كيلو
http://nileup.com/up/uploads/nilemotors_13906641581.jpg
المهم
فك غطاء سير الكاتينه والسير نغسه شاله
وابتدى يفك الوش الى فوق الى فيه مكان تزويد الزيت ، وبعد ماشال الوش بانت الطحينة اكتر فى ظهر الوش
http://nileup.com/up/uploads/nilemotors_13906643711.jpg
فك بعد كده 8 مسامير نجمة الى بيفكوا وش السلندر ، وفك خراطيم المياه الى داخله على الشجرة
http://nileup.com/up/uploads/nilemotors_13906687771.jpg
وشال وش السيلندر ، وهنا طهرت المفاجأه
الوش من تحت اتضح انه متاكل مش بس الجوان ، والصور هنا توضح اكتر
http://nileup.com/up/uploads/nilemotors_13906690502.jpg
http://nileup.com/up/uploads/nilemotors_13906690501.jpg
http://nileup.com/up/uploads/nilemotors_13906696861.jpg
http://nileup.com/up/uploads/nilemotors_13906696862.jpg
وده الجوان القديم
http://nileup.com/up/uploads/nilemotors_13906698334.jpg
http://nileup.com/up/uploads/nilemotors_13906698331.jpg
http://nileup.com/up/uploads/nilemotors_13906698332.jpg
http://nileup.com/up/uploads/nilemotors_13906698333.jpg
وده شكل البلوك من فوق ، طبعأ واضح بقايا المياه الى داخل غرفة الاحتراق على الشميز والسلندر
http://nileup.com/up/uploads/nilemotors_13906701971.jpg
http://nileup.com/up/uploads/nilemotors_13906701982.jpg
http://nileup.com/up/uploads/nilemotors_13906701983.jpg
المهم قالى كده لازم تغير الوش كله لأنك لو حطيت جوان جديد على الوش ده هيرجع الموضوع زى الاول ومش هيقعد وهنلف نفس اللفه تانى
سألته عن الوش قالى ممكن اجيبلك واحد من مكنه قلتله وريهونى ، راح جابه لقيته ماشاء الله كويس
وده شكل الوش الجديد
http://nileup.com/up/uploads/nilemotors_13906704001.jpg
http://nileup.com/up/uploads/nilemotors_13906704002.jpg
عقلى قعد يودى ويجيب ، اغير الوش ولا اغير المكنه كلها
بس بينى وبينكم مكنش معايا فلوس انى ادخل فى مكنه جديده خاصه انى علشان اغير مكنه كنت هجيب مكنه 1400 انجيكشن مكان الكاربراتير الى عندى ودى هتعوز شغل كتير وتغيير طرمبة بنزين وتضبيط كهرباء وكنترولر والكلام الى بالكم فيه ده فقلت لا اغير الوش احسن خاصة ان العربيه مكانتش تاعبانى قبل الموضوع ده
واستنى لما يبقى يجيلى فلوس والمكنه تجيب اخرها وساعتها اجيب مكنه بحاجتها وتكييفها وباورها إن شاء الله
فقلتله اتكل على الله وركب الوش الجديد ، قالى طيب هنحتاج زيت وفلتر زيت جديد وجوان وش جديد ، وجوان مانافولد وجوان فرن ، رحت جبتله الحاجه ، وبالمره جبت فلتر بنزين علشان كان بقالى كتير مغيرتوش وكمان غيرت سير الكاتينه وسير الدينامو
بالنسبه للزيت مكنتش عايز اجيب فلفولين تانى علشان كان غالى ، وفى نفس الوقت قلت اجرب حاجه تانيه غير الشل الاصفر ، فسألته قالى هات كاسترول ، ده الزيت المعتمد من سيات ، فعلاً جيبته وهشوف بقى ايه ظروفه واقولكم ايه نظامه إن شاء الله بعد التجربه
ده بقى شكل الوش بعد التركيب
http://nileup.com/up/uploads/nilemotors_13906706521.jpg
بعد ماركب بقى قفل الوش و ركب خراطيم المياه تانى والاسبراتير والخراطيم ، وضبط توقيت سير الكاتينه وغير فلتر الزيت والبنزين
وحط الزيت الجديد وقفل الدنيا
خليته بالمره ينضفلى قربة المياه لأن شكلها كان قذر جداً ، ومبتبينش المياه الى فيها
بعد ما خلص قالى دور يا باشمهندس ، هنا بقى كانت اللحظه المخيفه بالنسبه لى ، كنت مقلق لحسن بعد كل ده يطلع فيه مشكله ، خاصة انى كنت بسمع ان الوش لو اتلعب فيه العربيه عمرها ما هتتضبط زى الاول
المهم دورت الحمدلله العربيه دارت رحت شيكت على القربه ، الحمدللع لقيت مفيش الفوران الى كان موجود الاول
بس لاحظت حاجه غريبه ، العربيه كان فيها تقطيعه فى صوتها بتبان قوى وانت جوه العربيه او لو كنت قريب من الشكمان
فقلتله على الحكايه دى فقالى لسه هضبطلك الاسبراتير والكاربراتير . وفعلاً ضبط فيهم كده لحد لما الصوت راح الحمدلله
قالى بقى اطلع جرب ، والحمدلله كانت احسن ، بس ممتازه يعنى حاسس ان فيها خنقه بسيطه لما رجعتله قالى احنا مغيرناش البوجيهات ، جرب كده ولو الكتمه دى فضلت هنغير البوجيهات كمان
قلتله طيب على العموم هو جنب البيت عندى وبعدى عليه كل يوم ، فلو الموضوع استمر هرجعله إن شاء الله
الكلام ده كان اول امبارح ، خلصنا بالليل على الساعه 9 ونص كده
امبارح قلت اجرب العربيه بقى ، فكان عندى مشوار للمعادى وانا ساكن فى جسر السويس فأخدت الدائرى بقى وجربت
تقييمى للعربيه :
الحمد لله المياه تمام ومش بتنقص ومبقاش فيها الصداً الى بيظهر ولا فوران ( إن شاء الله بكره احط مياه حمرا او خضرا )
صوت العربيه فرق جدأ خاصة على السرعه العاليه ( ما بعد ال 80 ) لدرجه ان مراتى لاحظت الموضوع ده
تجميع العربيه الحمدلله تمام
نيجى بقى للتكلفه كانت كالاتى :
350 وش سلندر استيراد
100 جوان وش سلندر المانى ، كان فيه حاجه صينى ب 35 بس طبعاً مرضيتش استخسر خاصه انه مش سهل التغيير
45 فلتر زيت
15 فلتر بنزين
20 جوانات فرن ومانافولد
80 سير كاتينه
25 سير دينامو
100 زيت كاسترول
واخيراً 250 جنيه مصنعيه
يارب يجعله بفايده الهم امين
شكراً للمتابعه
اخوكم احمد عبد الرحمن
-
-
ألف مبروك على الجوان الجديد
وتقرير جميل
المهم تروحله بعد 500 كيلو تربط على الجوان
وشويه كده تغيرر الميه وتحط ميه خضراء
لأن الميه ساعات هتحس أنها أتوسخت مكان الشغل
ومبروك عليك
-
ياخبر وحضرتك كنت ماش بالعربية كدا ازاى!!!!!!!!!! ربنا يعينك والف مبروك وحمدالله على سلامة الاخت ابيزا**
عندى تقريبا نفس الموضوع بس انا باعمله بنفسى فى البيت وممكن تتابع على الموضوع اللى فى الرابط دا**
http://www.nilemotors.net/Nile/401108-a.html
-
الف مبروك يا أ/ حمد الصيانه وربنا يباركلك فى عربيتك
و تشكر على التقرير الجميل
الميكانيكى ده فاهم من خلال كلامك وأنتا عملت الصح بختيارك تغيير الوش الأن، و أعتقد سبب التاكل ده أستخدام مياه عادية او غير الموصى بها
أستخدم مياه هيبو ، +g12 الموصى بها من مجموعة vw
تحياتى
-
ماشاء الله شغل ممتاز وتقرير هايل .. وربنا يباركلك فيها و يجعلها اخر المصاريف
-
تقرير جميل و مبروك التصليح
-
الف مبروك والحمد لله على كل شئ ربنا يديك خيرها ويكفيك شرها
-
ألف مبروك و ربنا يبارك لك فيها و يحفظهالك.
أهم حاجه تكون اتأكدت ان الوش اللي هو ركبه متمسحش قبل كده .. عشان لو كان اتمسح و معوضش المساحه اللي اتمسحت بجوان تاني العربية هتسخن منك.
-
الصور بتاعت الوش القديم شايفها معقوله مش فى الدمار فى اعتقادى انك كنت نضفت الوش وبعدين تقرر اذا كان محتاج يتغير ولا لا (لاحظ ان الميكانيكى عنده وش ومن مصلحته يبيعهولك)
Content Relevant URLs by
vBSEO 3.6.0 PL2