تجربة تغيير طقم شنبر للنوبيرا
السلام عليكم اعضاء المنتدى الحلوين
من فترة قصيرة فجأة العربية بقت بتطلع دخان مع دوسة البنزين واتطور الوضع لدخان على طووول سواء مع الدوسة او لا
اخويا خد العربية على مركز "افحص" وعمل اختبار كبس
طلعت القراية
100-110-75-60
فرق 48% بين اقل قراية واعلى قراية وواضح ان فيه تهريب من شنبرين (الاقل قراية)
نكلفة الاختبار كانت 50 جنيه
وحانت لحظة الاصلاح
الحمد لله مالقتش اى حاجة اصلية سواء الشنبر او فلتر الزيت او جوان وش السلندر
واضطريت اجيب المضروب
طقم الشنبر ال GM اللى الراجل بيقول عليه اصلى وانا متأكد انه مضروب ب 150 جنيه
ودا بتاع اللانوس لان عربيتى نوبيرا 1 مش 2
وحاجة كمان بتركب تحته مش فاكر كانت بكام بس رخيصة وسليكون بردو مش فاكر سعره
غراء اسمه جمالاكا او جالاماكا ب 8 جنيه
جوان وش سلندر شكله مضروب ب 25 جنيه
فلتر زيت 25 جنيه
على خرطوم مية كان مقطوع ب 25 جنيه
وجوان الفرن ب 5 جنيه
وزيت تعاون 1000 كيلو ب 65 جنيه ال 4 لتر
من الساعة 7 بالليل لغاية 4 الفجر الميكانيكى شغال فيها
وخليته بالمرة يركبلى 3 قواعد ماتور كانوا بايظين منهم قاعدة الزيت طالعة قطعتين :F_eyeb1[1]:
وبعد ماخلص ، سحب العربية بعربيته لغاية باب البيت 8 كيلو منهم ييجى كيلو طرق مكسرة وزبالة
وخد مصنعية كاملة (تركيب شنابر وقواعد ماتور) وبسحب العربية 500 جنيه
والحكاية كلها بحبشتكاناتها اتكلفت 950 جنيه تقريبا
سيبت العربية 10 ساعات شغالة وبعد كدة مشيت بيها مشوار 60 كيلو سخنت فيهم مرة وهى عاملة 40 كيلو والمية كانت مظبوطة بس مليانة صدا عالوش وبنزين من الغسيل وبلاوى متلتلة ..المهم ريحت العربية ومشيت بيها تانى بقت زى الفل
وحاليا فيه صوت تكتكة زى صوت التاكيهات كدة بيطلع والعربية عالسلانسيه بس
السلانسيه فيه رعشة كل ثانيتين وهابقى اروح للميكانيكى اشوفها من ايه
سحب العربية الى حد ما شكله بقى حلو بس مش عارف اجربه عشان فترة التليين
طلعة العربية بقت ناعمة ومريحة خصوصا بعد تغيير القواعد
وسنوافيكم بكل ماهو جديد ان شاء الله
واعذرونى لو نسيت حاجة بس اخوكم بيكتب الموضوع وهو نايم :majd(2):