الموضوع: البورصة .. خد فكرة واشتري بكرة

استنو التقييم الكلي للكورس ههههههههه
لا بجد هنعمل مشاركه ان شاء الله انا و ميزا و نحكي كل اللي حصل
بس تصبيره كده
الموضوع فوق الرائع
و اعداد جميل و رائع من استاذ احمد
يشكر عليه

المشاركة الأصلية كتبت بواسطة hanystar

عايز أعرف بعد إذنك ما مدى المخاطرة عند إستثمار فلوسى بالبورصة
وهل هى مربحة ؟؟؟

استاذ ميزا مشكور طبعا قام بالواجب ..وطبعا انا قلت قبل كده ان البورصة عايزة : وعي.. علم .. وصبر ..وكمان متابعة باستمرار ..
وطبعا احب انوه ان اي مشروع في الدنيا في مجال للربح والخسارة .. وده شيء طبيعي ..
والبورصة قدام ان ارباحها كتير .. خسارتها كبيرة جدا ..
وهشرح بالتفصيل ان شاء الله اسباب الخسارة ونحاول "نقلل" منها ازاي ..ومش هقول نتفاداها او منخسرش ابدا .. لانه مينفعش ..
ومفيش بني ادم في البورصة في اي مكان في العالم بيكسب على طول الخط ..
ممكن اكسب النهاردة واخسر بكرة .. بس الفكرة في قيمة المكسب والخسارة .. بحيث ان المحصلة تكون مكسب ان شاء الله ..
بس احب اضيف حاجة يا استاذ ميزا ..

المشاركة الأصلية كتبت بواسطة meza

-فى البورصة لو عاوز تكسب .. مفيش غير طريقة احدة .. إنك تشترى رخيص الأول و تبيع غالى ... لكن فى الفوركس سواء السهم طالع أو نازل ممكن تكسب..

في اوبشن جديد دلوقتي وتم تطبيقه في شركات كتير اسمه short selling وده بيديك امكانية البيع قبل الشراء ..بمعنى انك تبيع اسهم لا تمتلكها بتستلفها من الشركة بسعر عالى ثم معاودة شرائها بسعر اقل وترجعها للشركة .. وهنا انت بتكسب الفرق ..
ولو ان في شبهات شرعية في هذا النظام بسبب انك بتبيع شيء لا تمتلكه وده لا يجوز شرعا ..

المشاركة الأصلية كتبت بواسطة meza

-فى البورصة .. سهل جداً التحكم فى حركة الأسهم عن طريق ملاعبات يقوم بها كبار المستثمرين .. .

الكلام ده مظبوط في عدد من الاسهم اللي فوليومها ضعيفة او بمعنى اخر عدد الاسهم المتداول عليها لان ده فعلا بيدي فرصة لكبار المستثمرين في التحكم في السهم ..
ولكن فيه عدد كبير من الاسهم اللي فوليومها عالي جدا ..وبالتالي صعوبة التحكم فيها من شخص واحد ..

المشاركة الأصلية كتبت بواسطة meza

-فى البورصة عشان تاخد البيانات اللى تساعدك فى التحليل الفنى لازم تشترك فى شركات تمدك بالبيانات دى مقابل مبلغ تدفعه كل شهر .. .

تمام .. بس زي محضرتك اشرت ان فيه منتديات كتيرة جدا موجودة حاليا ممكن تاخد بياناتك منها مجانا ..

يا جماعة انا مش عايزة اقول كلام كبير ومصطلحات ضخمة كده في الاول عشان محدش يتوه مني ..
فأي كلام غريب او جديد في ردود محدش يتخض منه

انا ماشية تدريجيا بسيستم سلس وبسيط عشان بس اوصل الفكرة واشرح يعني ايه بورصة فقط .. ومش عشان اقول لحد استثمر ولا اشرح تحليل فني .. متفقين ؟؟
وبكرر اللي قلته في اول الموضوع
(وبكل تأكيد هذه ليست دعوة للشراء او الدخول في المجال .. ولكن فقط من اجل العلم بالشيء .. وليكن ثقافة عامة ..)

المشاركة الأصلية كتبت بواسطة walidadel

شكراً علي الموضوع و في انتظار المزيد

المشاركة الأصلية كتبت بواسطة hoko_mosha

منتظر بقية المشاركات

المشاركة الأصلية كتبت بواسطة AHMEDCAR

انا شايف اسمى فى الموضوع بجد انتى الموضوع بتاعك ده ممتاز و الف شكر ليكى عليه

والله دي حاجة بسيطة وبجد انا مبسوطة جدا ان الموضوع عجبكم .. الحمد لله ..

المشاركة الأصلية كتبت بواسطة AHMEDCAR

والحمد لله الكورس الاول ابتديت فيه مع بعض الاعضاء و منهم نايل استورم و ميزا

ممكن لينك الموضوع .. لاني بصراحة معنديش فكرة كبيرة في الفوركس ويشرفني انضملكم

وصلنا لحد فيين .. اه شركات السمسرة
طيب تمام ..
شركات البورصة بقى بتنقسم قسمين
شركات داخل المقصورة
وشركات خارج المقصورة ..
شركات داخل المقصورة عددها كتير ومعناها انها الشركات اللي بتلتزم بقرارات وتخضع لشروط ادارة البورصة وهيئة سوق المال ..
يعني ليها قوانين وظابط يربطها ..اللي هي الشفافية اللي بيقولوا عليها في برامج البورصة .. هنبقى نقولها بعدين ..
شركات خارج بقى دي ملهاش ظابط ولا رابط
ولا شفافية ولا حد ليه كلمة عليها .. وطبعا دي بتبقى خطورتها اكبر وبيبقى عددها قليل ..

هنتكلم بقى عن مؤشر البورصة المصرية اللي اسمه CASE 30
اللي بيعبر عن حالة السوق المصري بشكل عام ..
CASE = Cairo & Alexandria Stock Exchange
30 دي معناها انه بيتكون من 30 شركة قيادية ..
وال 30 شركة دول بيكونوا من شركات داخل المقصورة وبيتم اختيارها على اسس معينة .. وبيضاف ليه شركات ويتشال منه شركات من وقت لاخر ..
وبتمثل كل شركة فيهم وزن نسبي من المؤشر ده ..يعني مثلا شركة س بتمثل مثلا مثلا 30 % من المؤشر وشركة ص 15 % وبالتالي نقدر نفهم كده ان اسهم شركة س نزولها وطلوعها بيأثر بدرجة اكبر في قيمة المؤشر ..
وطبعا دي مشكلة كبيرة جدا وعيب لابد من اصلاحه ان اكتر من 100 شركة بتعبر عنهم 30 شركة وبشكل خاص شركتين اللي ليهم وزن نسبي كبير في المؤشر هما اوراسكوم تيليكوم واوراسكوم للانشاء ..
يعني بمعنى اخر الشركتين دول تقريبا اللي بيعبروا عن بورصة مصر ..