البورصة .. خد فكرة واشتري بكرة

**Miss_Pharma** · 26-09-2008 01:23 AM

لاحظت اهتمام اعضاء كتير بالبورصة ..
وناس كتير متعرفش اي حاجة عنها ..
فبعد اذن الادارة طبعا ..حبيت افتح موضوع اشرح فيه بطريقة مبسطة معنى البورصة .. وبكل تأكيد هذه ليست دعوة للشراء او الدخول في المجال .. ولكن فقط من اجل العلم بالشيء .. وليكن ثقافة عامة ..

على فكرة انا مش خبيرة او متخصصة .. بس حبيت المجال وقريت ودرست فيه كتير ..
وان شاء الله احاول اوصلكم الفكرة على قد مقدر واجاوب على تساؤلاتكم ..

**Miss_Pharma** · 26-09-2008 01:24 AM

البورصة هي سوق بيتم فيه عمليات بيع وشرء ..وبيضم عدد من الشركات كبيرة وصغيرة في مختلف القطاعات ..
طب بنبيع ونشتري ايه .. نبيع ونششتري اسهم

طب يعني ايه سهم اصلا ؟؟
الشركة بيبقى ليها راس مال .. مظبوط ؟ راس المال ده قيمته بتتجزأ وبتتوزع ليصبح كل جزء اسمه سهم
مثال مبسط : لنفرض شركة ما رأس مالها 100 جنيه .. بتجزأ راس المال ده على اسهم قيمة السهم مثلا 5 جنيه .. يصبح مجمل عدد اسهمها 20 سهم اللي هما بيعبروا عن اجمالي راس المال ..
مجلس ادارة الشركة بيمتلك جزء من الاسهم وليكن مثلا 12 سهم .. يفضل 8 اسهم .. تطرحهم في البورصة اللي هي السوق عشان الناس تشتري .. لو انت اشتريت بتبقى انت كده مساهم في الشركة يعني شريك في راس المال
يعني كل شركة بيبقى ليها عدد اسهم معين بتمتلكه الشركة نفسها وعدد تاني موجود في السوق ده للافراد ..
ولو اشتريت سهم منهم بتعتبر مالك في الشركة دي بقيمة السهم اللي انت اشتريته ..
وطبعا بيبقى ليك الحق في حضور اجتماعات مجلس ادارة الشركات والتصويت على اتخاذ القرارت وكده ..
اللي اسمها الجمعية العمومية .. يعني لما حد يقولك الشركة الفلانية عاملة جمعية عمومية .. معناها انها عاملة اجتماع للمساهمين في الشركة عشان تناقش معاهم قرارات وليهم حق التصويت وكده ..
وسوق البورصة ده بيفتح كل يوم الساعة 10.30 الصبح .. لحد الساعة 2.30 وفي رمضان لحد الساعة 1
اللي هي الشاشة بقى اللي فيها ارقام دي بتقعد تتحرك ويجيبوا الناس في الاخبار عمالة تتفرج عليها وكده .. دي بقى بيبقى اسمها جلسة التداول
طيب انت بتستفيد ايه ؟؟؟
الاستفادة هنا بتتمثل في جزئين ..
اولا انت طبعا شريك في رأس المال وليك حق في الارباح اللي هتحققها الشركة .. وده اللي بيحصل عند اعلان الميزانيات وتحقيق الارباح .. بتقوم الشركة توزع حاجة اسمها اسهم مجانية او كوبون .. الكوبون ده عبارة عن نصيبك في ارباح الشركة .. بس ده طبعا مش بيتوزع كل يوم ..
عشان كده ثانيا بقى انت بتستفيد بارتفاع سعر السهم في السوق .. والارتفاع ده بيكون نتيجة عدة عوامل هنبقى نقولها بعدين ..
واكيد طبعا زي ما السهم ده ممكن سعره يعلى ويرتفع .. ممكن برضه سعره يقل ويهبط .. وده اللي بيبقى اسمه خسارة .. وبرضه بيبقى تحت عوامل معينة ..
تمام لحد كده اكمل ؟؟؟

**Miss_Pharma** · 26-09-2008 01:25 AM

طيب ..
انت ازاي ممكن تشتري السهم .. هتروح السوق تقوله يا عم والنبي بكام ده يقولك ب 3 جنيه .. خد .. هات ..
لا طبعا ..
التعامل بيبقى عن طريق شركة سمسرة ..
بتمثل دور الوسيط بينك وبين الشركة ..
بتحط فلوسك في شركة السمسرة .. بيبقى ليك حاجة اسمها محفظة .. كانك حاطط فلوس في حساب في البنك ..
وطريقة التعامل بتكون حاجة من اتنين :
1- اما عن طريق التليفون .. وده بيبقى بينك وبين السمسار بتاعك .. تقوله اشتري 10 اسهم شركة كذا على سعر كذا .. يروح هو ياخد من محفطتك ويشتري ..
ويبقى محفطتك فيها ال 10 اسهم دول بالاضافة طبعا للسيولة الموجودة .. ولما تحب تبيع تكلمه برضه تقوله بيعلي على سعر كذا ..
2- عن طريق النت .. وطبعا ده اسهل واسرع وافضل بكتييييييييييير ..عشان انت اللي بتبيع وتشتري لنفسك عن طريق النت .. بتعمل حاجة اسمها اوردر بيع او شراء على النت ..
مش هنتكلم في تفاصيل دلوقتي .. هنبقى نشرح كل حاجة بالتفصيل بعدين لو حبيتم ..

**AHMEDCAR** · 26-09-2008 01:31 AM

بجد موضوع ممتاز الف شكر

**Dream286** · 26-09-2008 01:54 AM

موضوع قيم وشرح مبسط وجميل جدا جدا
هل ممكن طرح الاسألة في الموضوع دا ولا حضرتك ممكن تعملي موضوع منفصل للاسألة ولا ايه ؟

**amir** · 26-09-2008 01:57 AM

ربنا يكرمك فعلا في ناس كتير و انا طبعا مش احسن منهم عايزين نعرف افضل الطرق للاستثمار و لو استثمار بسيط
و موضوعك ده مفيد جدا لأن البورصه مجال كويس ان الواحد يستثمر فيه بس طبعا اللي يفهمها كويس و يحسبها بعقله قبل طمعه
يا ريت تتابعي الموضوع و ربنا يجازيكي عنا كلنا كل خير