أعضاء نايل موتورز..أشكال و ألوان
السلام عليكم و رحمة الله و بركاته
أنا مشترك في نايل موتورز من فترة وجيزة أقل من 3 شهور
لكن بفضل الله حاسس إني بين أسرتي
مجتمع جديد عليا لأني مكنتش بشترك فمنتديات..كنت شايفها مضيعة للوقت
لكن منتدى نايل موتورز شدني جدا بصراحة
في البداية أشتركت عشان أعرف إجابة كام سؤال بيدوروا فدماغي
لكن مع مرور الوقت و تفاعل الأعضاء و المنسقين و المشرفين و الإدارة
لقيت نفسي بتجرجر واحدة واحدة لحد مبقيت مقدرش مفتحش المنتدى كل يوم
المهم عشان مطولش عليكم
في خلال ال3 شهور دول قابلت أصناف كتير من الأعضاء
المعظم طبعا ناس محترمة و فاهمة و متعاونة و مبتبخلش على حد بمساعدة أو معلومة
لكن لقيت كام صنف كده مش و لا بد
خد عندك مثلا
الصنف الأول: العضو (تشكرات)
تدخل أي موضوع تلاقي لازق الديباجة (مشكووووووووور-شكرا-رائع-جميل-لذيذ-ظريف-....إلخ)
طبعا من حقه إنه يشكر واحد زميله عامل موضوع كويس
أو شارك مشاركة بناءة
لكن أخونا ده مبيعملش حاجة غير كده رغم إنه فالمنتدى من 3-4 سنين و ممكن يكون عضو فضي كمان
لكن عمرنا معرفنا هو راكب عربية ايه و لا رأيه ايه فيها
و لو معندوش عربية حتى معرفناش ايه إهتماماته في عالم السيارات و لا عمره حتى حود على المنتدى الإجتماعي و تفاعل مع الأعضاء هناك
الصنف التاني: العضو (معصرة)
يدخل على القسم المناسب لنوع عربيته
و تلاقيه نازل أسئلة
يعصر الأعضاء اللي فالقسم واحد واحد
جبت الفرش منين؟
أجيب قطعة الغيار منين؟
أسعار اللي مش عارف ايه كام؟
أحسن ميكانيكي شغال فالعربية دي فين؟
التوكيل أخباره ايه؟
عندي مشكلة فكذا أعمل ايه؟؟
و برضه أنا مش بلومه إنه بيسأل و يستفيد
كلنا هنا بنستفيد من بعض و بنكتسب خبرة من بعض
لكن أخونا ده شغلته عصر بس
عمره ميكتب أي معلومة
و لا يفيد أي عضو حتى لو يقدر
بيقولك و أنا مالي
هي مش عربيتي تمام و اللي محتاج أعرفه بلاقي اللي بيرد عليا
الصنف الثالث: العضو (تهريج)
يبقى الناس بتتكلم فموضوع مهم
مشكلة مع وكيل
أو مشكلة فعربية واحد من الأعضاء
أو لا قدر الله عيب تصنيع و صاحب العربية دايخ بيها بين لجنة هندسية و حماية مستهلك و وكيل
و أخونا ده و لا على باله
يدخل يرمي مشاركة ملهاش أي لزمة يستخف فيها دمه
و مستني الناس تموت على نفسها من الضحك و تبعتله شكر و إعجاب
الصنف الرابع: (المحقق كونان)
ده بقى بيبقى مقيم في قسم معين (في الغالب اللي عربيته بتنتمي إليه)
و قاعد يحقق في مشاركة اي عضو
لو واحد حظه العسر أجبره على الإختلاف في الرأي مع المحقق كونان
يبدأ كونان في إلقاء الإتهامات للعضو المسكين
أنا عارفك...مش إنت اللي من سنتين قلت على العربية الفلانية كذا
إنت شكلك بتشتغل تبع وكيل منافس
إنت إيش فهمك إنت فالعربيات
و يستمر في كيل الإتهامات و جمع عزوته من أعضاء القسم للذب عن شرف العربية المصونة
الصنف الخامس: العضو (المفتي)
ما شاء الله عليه بيفهم في الكفت
تسأل فميكانيكا... يجاوب
كهرباء... موجود
سمكرة ..شغال
عفشة... ميضرش
بس يا ريته بيجاوب صح
إلا كله فتي فتي فتي
بس عنده ثقه في نفسه....يعدمها
تلاقي بيجاوب بكل قوة
ده أكيد عيب حساس كذا
و هو أساسا ميعرفش الحساس ده بتاع ايه
الواحد ساعات بيتقمص شخصية صنف من الأصناف دي و هو مش واخد باله
لكن في النهاية المنتدى للإفادة و الإستفادة و التآخي و المشاركة و نقل الخبرات
و لازم كل واحد يشارك زمايله بأي معلومة أو نصيحة
و ميبخلش على إخواته بأي جديد
تحياتي لجميع أعضاء نايل موتورز المحترمين
تم نقلة للمنتدى الاجتماعى .