مساعدة ضرورى سيراتو ولا فلوينس

**daoor** · 27-01-2014 11:39 PM

السلام عليكم و رحمة الله و بركاته
انا متابع قديم للمنتدى و جديد الى حد ما فى القسم
انا إن شاء الله خلاص ناوى اجيب حاجة من الاتنين فلوينس فيس لفت e2 او سيراتو ex f/o خليجى
و هتبقى اول عربية زيرو ليا و محتار مع انى عارف ان لا وجه للمقارنة بين الكورى و الاوروبى
و كنت مقرر خلاص الفلوينس بس ناس قالولى ان سحبها مش مرضى قوى و فى نتشة بين الاول و التانى و الفتيس مش كويس اوى .. مش عارق بقى ده هرى ولا ايه عشان احنا منحبش نقول منعرفش خالص و اللى منعرفوش اكيد وحش فا قولت اسأل الخبراء
و كنت عايز اعرف ايه نظام قطع غيارها

و لو كنت الكام شهر اللى فاتو بسوق نيسان جوك 2014 ايه الأقرب ليها فى الأتنين كفتيس و نقلات .. اسلوب سواقة بالمختصر ؟؟

معلش طولت عليكو

**amed2** · 28-01-2014 12:14 AM

الفلوانس الجديدة موتورها و فتيسها موتور نيسان فموضوع النتشة ده إنساه مبدئيا

السيراتو كقطع غيار و سحب و موتور شديد و شبابية أحسن من الفلوانس
الأمان و الثبات على الطريق و الصالون الأوسع يبقى فلوانس تكسب

**Hany Saad** · 28-01-2014 12:17 AM

المشاركة الأصلية كتبت بواسطة daoor

السلام عليكم و رحمة الله و بركاته
انا متابع قديم للمنتدى و جديد الى حد ما فى القسم
انا إن شاء الله خلاص ناوى اجيب حاجة من الاتنين فلوينس فيس لفت e2 او سيراتو ex f/o خليجى
و هتبقى اول عربية زيرو ليا و محتار مع انى عارف ان لا وجه للمقارنة بين الكورى و الاوروبى
و كنت مقرر خلاص الفلوينس بس ناس قالولى ان سحبها مش مرضى قوى و فى نتشة بين الاول و التانى و الفتيس مش كويس اوى .. مش عارق بقى ده هرى ولا ايه عشان احنا منحبش نقول منعرفش خالص و اللى منعرفوش اكيد وحش فا قولت اسأل الخبراء
و كنت عايز اعرف ايه نظام قطع غيارها

و لو كنت الكام شهر اللى فاتو بسوق نيسان جوك 2014 ايه الأقرب ليها فى الأتنين كفتيس و نقلات .. اسلوب سواقة بالمختصر ؟؟

معلش طولت عليكو

حضرتك قصرت علينا الطريق جداً.....
الفلوانس فيها نفس موتور و فتيس الجوك بالمللى.....لو استمتعت بقيادة الجوك كسحب موتور و تجميع فتيس يبقى نفس التجربة بالمللى هتلاقيها فى الفلوانس و العكس صحيح.......

**mostafa magdy** · 28-01-2014 01:38 AM

إعاده البيع .. أعتقد هي الفرق في نظري .. لصالح السيراتو طبعا
النتشه زي ما زمايلي قالي لحضرتك مبقتش موجوده الفلوينس عربيه ياباني فرنسي حاليا نتيجه شراكه ناجحه جدا بين نيسان و فلوينس و موفره للبنزين جدا و ساقتها مريحه أوي و عفشتها مرنه و لذيذه
السيراتو لما ركبتها شويه حسيت كالعاده بنشفان في العفشه
السحب طبعا الكوري يكسب .. لو أنت بتحب السواقه الشبابي هاتها مباشره بدون نقاش
الفلوينس عربيه فخمه جدا و شيك أوي و وقوره أوي مش بتاعت شد و جري ..
السيراتو عربيه تقليديه .. الفيس ليفت مش تقليديه تماما في رايي المتواضع برده
كشكل في رايي الفلوينس تكسب
قطع الغيار مفيش فرق كله بقي غالي اتحفك و اقولك ان بعض قطع غيار الفلوينس ارخص
يعني تمن الفانوس الامامي ف السيراتو 5560 تقريبا ..
الخلاصه و النصيحه لو هتقعد العربيه معاك هات الفلوينس و استمتع بيها اكتر من 5 سنين ساعتها لما تبيعها مش هتحس باللي نزل منها
بالتوفيق و ربنا يبارك ايان كان الاختيار

**Ahmed TRAVCO** · 28-01-2014 02:24 AM

- مبدئيا مبقاش في حاجة اسمها لا وجه للمقارنة بين الكوري والأوروبي خصوصا اننا بنتكلم في عربيات C-Segment مش اكتر...
- ثانيا العربيتين ممتازتين وانا مش شايف ان الفلوانس -او اي عربية تانية في الفئة دي- ينفع نقول عليها "فخمة"... مش هجوم على العربية والله بس مش بحب المبالغة، فانا شايف ان لو الفلوانس فخمة يبقى السيراتو فخمة برضه... العربية دي انا قعدت فيها من جوة وفصصتها حتة حتة وللأمانة هي افضل من السيراتو القديمة بفرق كبير في كل حاجة + اني بشوفها اشيك بكتير من الفلوانس (داخليا وخارجيا)... واكيد دي اذواق تختلف من واحد للتاني...
- من الآخر، روح حضرتك اركب العربيتين واعرف كماليات كل واحدة فيهم بالتفصيل الممل وشوف هترتاح لإيه وان شاء الله ربنا يوفقك للحاجة الأحسن...
وانا شخصيا ممكن اميل شوية للسيراتو وخصوصا ان شكلها في التوبلاين بالذات حاجة رائعة بصراحة... غير كده بحس ان العربيتين متقاربتين جدا والاختيار زي ما قلت بيكون حسب الارتياح النفسي ليس إلا...

**daoor** · 28-01-2014 02:40 AM

المشاركة الأصلية كتبت بواسطة mostafa magdy

إعاده البيع .. أعتقد هي الفرق في نظري .. لصالح السيراتو طبعا
النتشه زي ما زمايلي قالي لحضرتك مبقتش موجوده الفلوينس عربيه ياباني فرنسي حاليا نتيجه شراكه ناجحه جدا بين نيسان و فلوينس و موفره للبنزين جدا و ساقتها مريحه أوي و عفشتها مرنه و لذيذه
السيراتو لما ركبتها شويه حسيت كالعاده بنشفان في العفشه
السحب طبعا الكوري يكسب .. لو أنت بتحب السواقه الشبابي هاتها مباشره بدون نقاش
الفلوينس عربيه فخمه جدا و شيك أوي و وقوره أوي مش بتاعت شد و جري ..
السيراتو عربيه تقليديه .. الفيس ليفت مش تقليديه تماما في رايي المتواضع برده
كشكل في رايي الفلوينس تكسب
قطع الغيار مفيش فرق كله بقي غالي اتحفك و اقولك ان بعض قطع غيار الفلوينس ارخص
يعني تمن الفانوس الامامي ف السيراتو 5560 تقريبا ..
الخلاصه و النصيحه لو هتقعد العربيه معاك هات الفلوينس و استمتع بيها اكتر من 5 سنين ساعتها لما تبيعها مش هتحس باللي نزل منها
بالتوفيق و ربنا يبارك ايان كان الاختيار

ربنا يخليك و يباركلك فيها ان شاء الله
انا كنت مستمتع بالجوك جدا الصراحة هى لو فعلا زيها يبقى إن شاء الله الفلوينس بس لو فيها مشاكل مهما كانت صغيرة ممكن اعرفها زى ايه مثلا

**شادى عبدالمنعم** · 28-01-2014 02:45 AM

لو انت من الناس اللى بتحب تركب عربيه وتخليها معاها خليك فى الفلوانس ﻻن لها اعتماديه اكثر .
وشبه قيادة الجوك تماما .

**saddam** · 28-01-2014 03:02 AM

صديقي المواطن
إجابة لكل مشاركتك الطويلة والعريضة فجوابها بكلمة واحدة
وهي
فلوانس
قولا واحدا

والسيراتو الشكل الجديد محترمة عكس الشكل القديم ولكنها تأتي بعد فلوانس في الشارع

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال