الحمد لله اخيرا استلمت الفلوانس 2014 اللون الفيرانى الفاتح, بعد معاناة اسبوع , طبعا بفضل ربنا والاستخارة وبعدهم كلام حضراتكوا وتشجيعكوا , انا دخلت قريت كل تعليقاتكم وخبراتكم وده خلانى احسم الامر واتوكل على الله , لانى كنت ناوى فى الاول على شارك , بس من ساعة ما عينى وقعت عليها وهى فى المعرض ماقدرتش اقاوم سحرها , فقلت ارجع للرجالة هنا واشوف تقييمهم ليها , وفضلت اتفرج فى صمت لمدة كام يوم كده على كل التعليقات عليها لحد ما الحمدلله استلمتها يوم الاثنين اللى فات , ولسه مارخصتش . العربية بسم الله ماشاء الله تحفة وانيقة , انا مامشيتش بيها غير لما روحت استلمتها من مدينة نصر للهرم , اول انطباع انى طبعا مش متعود على ابعادها ف لسه حاسس انها اكبر من الابعاد اللى متعود عليها ( كان معايا لانسر بومة ), وفعلا كنت ماشى بيها طول الطريق براحة و مش بادخل فى مواجهات مباشرة مع الاخرين , العربية واسعه اوى من جوة , وشيك , وناعمة وسلسة , بس طبعا لقيت العيب اللى الكل اتكلم عليه ( عيب بالنسبالى ) ان العربية طلعتها بطيئة او تقيلة نسبيا, بس اول ما تفتح او تعدى سرعة 50 هتلاقى وحش طاير , اداء موتور ممتاز لما بتفتح . عموما شكرا ليكوا اودعولى ربنا يدينى خيرها ويكفينى شرها , وانشاءالله اكون عضو مفيد معاكوا .
سؤال قصير كده ل ملاكها : اتعودتوا على ابعاد العربية بعد قد ايه وهل هى فعلا كبيرة ولا نفس ابعاد العربيات اللى فى فئاتها .
معلش طولت عليكم