الموضوع: طريق السويس الي متي و الي اين؟

بحكم عملي في مدينه بدر, فأنا دايما رايح جاي علي طريق السويس, و عندي شويه ملاحظات عنه احب نتناقش فيها يمكن حد من اولي الامر يقرا الكلام و يتم النظر في السلبيات:
1- الطريق مخنوق قوي من تحت كوبري ال4.5 , تقاطع الاوتوستوراد مع طريق السويس
2- الملف اللي معمول علي الشمال و انت في اتجاه السويس اول واحد بعد ما تخلص الاوتوستوراد, بيخلي الطريق يتشل تماما و مفيش حاره ماشيه غير اقصي واحده يمين اللي سرعان اذكي اخواتهم سائقي الميكروباصات يروحو يلفو منها علشان يختصرو زحمه المنتصف و الشمال, المفروض عمل نفق قصير يعدي من تحت طريق السويس بدل البهدله دي
3-بلاعات متناثره قبل موقف اوتوبيسات بدر في ال4.5
4- مخارج الطرق بتاعت ال4.5 و الملفات القديمه اللي مازالت بيفتحوها, الملفات القديمه في وش مخارج ال4.5 يعني اللي عايز يطلع من ال 4.5 (عزبه الهجانه) بيقطع طريق السويس عموديا, و مع انهم عملو ملفات غريبه شويه لأنها واسعه و بتخنق عرض الطريق بطريقه مستفزه, الا ان الملفات القديمه رجعت الي الحيه و بتتقفل بطوب عادي و الناس بتشيله( سكان عزبه الهجانه يجب احكام السيطره عليهم)
5- طريق السويس دلوقتي بقي مبيخدمش اعداد قليله متجهه الي السويس فقط, ده بقي طريق اساسي لساكني الرحاب و مدينتي, و طريق ثانوي لسكان الشروق, ده غير مدينه بدر, يبقي انهو عقل يسيبو بالضيق اللي هو فيه ده, لازم يعاد تخطيطه و توسعته لاستيعاب كثافه المرور اللي اكيد هتتضاعف عليه كل ما المدن الجديده اللي عليه تسكن
6- اللجنه البايخه اللي بعد الرحاب بشويه, يعني هما سكان الرحاب يروحو بسرعه و الشروق و بدر و اللي رايح مدينتي زياره يتذنبو عالصبح عالفاضي؟؟؟ ده مبقاش طريق سفر فقط ده بقي طريق لبيوت ناس ساكنه و رايحه جايه عليه
7- كان في حفره علي اليمين عند شركه بترول كده بس سدوها بعد مالبستها كام مره باليل

اما بالنسبه للرجوع عليه من مدينه بدر فدي شويه حاجات:
1-الطريق كويس لغايه اللجنه الثابته, و دي بقي عذاب ما بعده عذاب و لازم يضيع منك وقت محترم فيها
2-الملفات الجديده اللي قرب ال4.5 الاسفلت هناك الجديد سايبين فيه حفر تقطم اجدعها عربيه, ده غير ان الطريق بيضيق بطريقه مستفزه للاعصاب
3-تاني و انت راجع عزبه الهجانه بترحب بيك بأسوء سائقي الميكروباص اللي خارجين من العزبه و بيقطعو الطريق عموديا( فاكر نقطه رقم 4 فوق؟ انت فاكرهم رايحين فين يعني!!) و العن من كده ان فيهم بيرمي اقصي اليمين علشان يقف يحمل
4- لما تقرب من تحت الكوبري 4.5 حرص من صف البلاعات اللي في النص و بعد كده خد بالك من الناحيه اليمين من بعد الكوبري لغايه الملف اللي بعد السينما
5-برضو الملف ده بيصاب بالشلل و بيشل الناحيتين و لازم يتم التخطيط لنفق يخدم القادم من طريق السويس الي الاوتوستوراد

اللي شايف حاجه تانيه بخصوص الطريق ده يشارك لأن المدن الجديده دي هي الامل المتوفر لسكان مدينه نصر, و المرواح و المجي عليه اكيد هتبقي مشكله اي حد هيسكن هناك, انا حاليا بعاني من الموضوع ده لدرجه التفكير في الابتعاد عن السكن هناك

و مستني ارائكم