اول تجربة مع مركز اوتو ماستر .. طنانى باشا
السلام عليكم يا اجدع رجالة اتاخرت شوية فى الموضوع ده بس عشان كان عندى شوية قصص كده والحمد لله على كل شيئ
كنت كتبت موضوعين عن تظبيط العفشة عندى وكان فاضل مشكلة مهمة جدا محدش عرف يحلها ابدا ولا يعرف سببها وهى ان العربية مايلة شمال على طول وبالتالى متعبة جدا فى السواقة وملهاش اى طعم
وكنت عقدت النية انى اروح لاخونا الكريم طنانى باشا فى المركز وقلت اكيد هو اللى هيعرفلى سبب المشكلة واتفقت معاه وتوكلت على الله ورحت يوم السبت اللى فات
وهناك قابلنى طنانى وكانت اول مرة نتقابل قابلنا الراجل بكل ترحاب وحفاوة جدا والله وهناك قابلت اخونا الكريم د هلالى وهو شخصية محترمة وجميلة جدا
وكلنا اخونا عمرو جمال جالنا على هناك هو واخوه احمد وهما بردو ناس محترمين وولاد ناس وجدعان جدا
المهم بقى
قلتله غير موضوع الميل فى مشكلة وهى عمود الدركسيون فيه بوش شوية وبيبان اوى على السرعة
رفعنا العربية على الكوريك العالى وبدا الناس الكشف كان الاخ اسمه ( ابو كف ) هو اللى بيكشف فلقينا القنطرة الامامية واخدة كدمة فى الناحية اليمين اللى جنب السواق من ادام اثرت على القنطرة وخليتها مايلة ناحية الشمال
وبانت اوى والعربية مرفوعة كانت اوطى من ناحية واعلى من ناحية والفرق بين القنطرة والمصفحة فى الناحية المايلة اقل 2 او 3 سم من الناحية التانية
انا كنت متوقع ان القنطرة هى السبب لانى تقريبا مغير عفشة كاملة ادام ومفيش فايدة وقلت لاخونا عمرو جمال على شكى ده وخصوصا ان كان سبب الكدمة دى ان مرة والدى كان سايقها وخبط فى طبان محترمة من المربعين هى اللى كدمت القنطرة ولوحتها كده .. والحمد لله الكشف من الناس الخبرة المحترمين هناك جاب الفائدة
كمان كشفنا على عمود الدركسيون والقطمة والصليبة وكان رايهم انى لازم اغير الجزء ده واجيب قطمة بالصليبة عشان البوش ده خلاص لازم يتغير
وقام اخونا طنانى كلملى حد فى الحرفيين ووصاه على قنطرة ليا وبسعر هايل الصراحة :Oc_sun1[1]:
وكنت جبت تيل امامى وركبته هناك كمان
الراى القانونى بقى :)))))
والله يا جماعة من الاخر اخونا طنانى ده راجل قمة فى الادب والذوق والاحترام وكمان الناس اللى شغالة معاه نفس الموضوع
والراجل استقبلنا كاننا اصحاب مكان ووالله فعلا كنا كاننا قاعدين فى مكانا بالظبط وروح جميلة وناس محترمة وكان بقى موجود الجميل دكتور هلالى وجه اخونا عمرو جمال واخوه احمد وبقت قعدة اخوية جدا
وفى الاخر طنانى عمل معايا واجب الصراحة ويستحق عليه كل الشكر وبعد خناق وكام ياعم طنانى ولازم وحلفان يادوب اخد منى تمن تركيب التيل بالعافية
والله يا جماعة ده اللى حصل وبكل امانة وانا سعيد جدا ان ربنا كرمنا بشخصية محترمة زى طنانى ومركز محترم وبيحس بالناس وبيتعامل معانا باخوية مش بس تجارة وخلاص زى اى حد
بدعى ربنا يبارك ليه ويكرمه زى ما بيقف معانا فى كل مرة
