الموضوع: عايز رأيكم معايا ( مجال المحاسبه ولا مجال المبيعات )

المحاسب القانوني يا سيدي هوه اللي من حقه يفتح مكتب محاسبه

عارف شغل مكاتب المحاسبه ؟

اعتماد القوائم الماليه للشركات
انشاء الشركات المساهمه
تقديم الاقرار الضريبي للشركات
المراجعه على حسابات الشركه لاكتشاف الاخطاء
و حاجات تانيه كتيييييييييييييييييييير

طب باخدها ازاي دي ؟

هتدرب في مكتب محاسبه لفتره معينه و بعد ما تتثبت و يتأمن عليك هتشتغل فيه لمده 3 سنين ساعتها من حقك التسجيل في جمعيه المحاسيبن و المراجعين و بالتالي انت بقيت محاسب قانوني

من حقك انك تفتح مكتب زي اللي كنت بتدرب فيه و تبتدى الشغل الكبير بقى

المرتب بيبقى قليل شويه لحد اما تقدم شويه و لحد اما تتسجل في الجمعيه ساعتها بتبدى الشغل بجد

المحاسب العادي
اللي بيبقى شغال في شركه او اي منشأه في الحسابات و بيبقى مرتبه على حسب قيمه الشركه و مركزها في السوق و طبعا كل ما خبرته تزيد كل ما مرتبه يعلى
و المناصب اللي ممكن يمسكها المدير المالي و مدير الحسابات

المشاركة الأصلية كتبت بواسطة matrix_it

انامعروض عليا مكتب محاسبة ب 300 جنيه فى الشهر ! ادوس ولا ادور على شركة ؟

دوووووووووووووس يا ريس
و ان شاء الله تستفاد و تحب الموضوع

المشاركة الأصلية كتبت بواسطة mk3

المحاسبه مرتابتها ضعيفه
السيلز مرتبه اعلى
مصمم على المحاسبه تتجه لمكتب مراجعه (محاسب قانونى) واهم حاجه يعملك تأمينات وخبره تدريب مع جمعيه المحاسبين المصرية عشان بعد 10 سنوات تبقى محاسب قانونى اد الدنيا

3 سنين بس يا ريس

10 سنين ليه حرااااااااااااااام

المشاركة الأصلية كتبت بواسطة ACC.Eslam Arif

مهو انت ما اتبهدلتش 4 سنين عشان تبلها وتشرب ميتها فى الاخر
خليك فى مجالك ... وده الطريق لو تقدر عليه
خلاصة القاعدة بتقول
مكتب = خبرة كبيرة (محاسبة +ضرائب +تأسيس +مراجعة ) = مرتب قليل = ضغط كبير ----- شرط الخبرة الكبيرة انك تعلم نفسك وعلى الاقل مكتب متوسط ومن خلال الخبرة تقدر تدوس فى اى شركة كبيرة بمرتب كبير
.................................................. .............
الشركة = خبرة فى نشاط الشركة والمحاسبة المالية =مرتب معقول بنسبة لمبتداء ومرتب كبير للخبرة = ضغط الشغل اقل من المكتب
وكل وحد زى مابيحب
النصيحة
ان المحاسب يتبهدل فى المكاتب بعد التخرج وبعدين يدور على الشركات ويرتاح
وربنا يكرمك

انا ناوي فعلا على مكتب ان شاء الله و الصراحه مش مستريح لحوار السيلز ده
بس حبيت اتأكد انا كده طبيعي ولا بتحجج

المشاركة الأصلية كتبت بواسطة punisher

انا شايف لو المرتب مش فارق معاك فا خليك فى مجال المحاسبة

وحاول تدعم نفسك بكوسات زى ال cpa - cma - cfa

طبعا اغلاهم ال cpa بس هيكون ليك وضع مختف فى الشغل خالص وطبعا مرتب اعلى

دا اللى كنت ناوى اعمله لما اتخرجت من تجارة انجلش بس ربنا كان كاتبلى مجال شغل تانى بعيد عن المحاسبة

انا فعلا ناوي ان شاء الله لو دخلت المجال اشوف شهاده من الشهادات المحترمه دي
بس مش دلوقتي خالص يعني الخطه الخمسيه الجايه :)

طب ما تقولنا ( لو تحب ) ايه المجال التاني اللي دخلته و اكيد هنستفاد من تجربتك

المشاركة الأصلية كتبت بواسطة aboelsoud

3 سنين بس يا ريس

10 سنين ليه حرااااااااااااااام

على حسب معلوماتى
3 سنوات دى اول مرحله
استحاله تبقى مراجع معتمد ميزانيات بعد 3 سنوات ممكن تبقى مراجع عادى فى فريق يرأسه واحد معتمد لكن مش معتمد فى الجمعية

السلام عليكم ورحمة الله وبركاته،،،

تعالى نتكلم بصفة إنك إن شاء الله ناوي تبقى حاجه كويسه في أي المجالين سواء المحاسبه أو التجاره

الأول لازم تحط لنفسك هدف توصله:

لو إنت هاتشتغل في المبيعات: المبيعات دي تشمل من أول واحد واقف بيبيع أي حاجه ومشكر في وش الناس وكل وظيفته إنه يرد على قد السؤال ومش فارق معاه إذا كانت الحاجه إتباعت ولا لأ .... وبرضه تشمل البياع المحترف اللي يعرف يبيع الهوا ويقدرر يحسس اللي قدامه إنه يبقى أحمق لو ما إشتراش السلعه واللي بيعمل فلوس رهيبه كل شهر من العمولات.

كمان المحاسبه تشمل الشخص اللي طول عمره كل اللي بيعمله هو شوية قيود يوميه وتقفيل مزانيات ومش عاوز يتعلم أي حاجه جديده ... وتشمل المحاسب المجتهد اللي بيذاكر على طول وبياخد شهادات وبيوصل عضو مجل إداره وهو لسه شاب.


أنا رأيي الشخصي: المبيعات دي مش مجرد وظيفه ... المبيعات جزء كبير منها موهبه ومظهر شخصي وأسلوب تعامل ... ممكن تبقى معاك دكتوراه في علوم التسويق بس إنت بياع فاشل عشان ما عندكش موهبه.

شوف إذا كان عندك الموهبه الأول ولا لأ.

بالنسبه للمحاسبه: المحاسبه في الأول طريقها صعب أوي لكن لو صبرت وإجتهدت وحط تحت كلمة إجتهدت دي خمسن خط هاتوصل وهاتبقى متظبط جداً كامرتب أوي كاوضع في الشركه نفسها.

أنصحك تدور على مكتب مراجعه كبير تشتغل فيه في ألأول وما تبصش للمرتب. بس هاتتعلم فيه في سنه اللي المحاسب العادي بيتعلمه في 10 سنين. وطبعاً زي ما قلتلك أهم حاجه الإجتهاد في الشغل وما تنساش نفسك ولازم طول مانت شغال تدرس برضه شهادات عالميه

أنصحك بشده تدور على شغلانه في حازم حسن ... حازم حسن ده مدرسة المراجعه في مصر واللي بيشتغل فيها سنتين بينط منها على أماكن نضيفه جداً جوه مصر وبره مصر

شكراً