الموضوع: صدق او لا تصدق التاريخ بيقول امتنا العربية لا تنتصر الا على ايد مسلمين غير اصول عربية

اشكر كل من رد و كل من انبهر و كل قرأ و فهم

و اعذرونى انا سوف ارد بمجمل لانى مش عارف اعمل اقتباس متعدد

اولا : رأى الشخصى ووجهة نظرى فى الموضوع ذكرته فى ردى , و اشكر عزيزى امحتب على رده فقد كان بمثابه الكلام اللى كنت عاوز اقوله

و لكنى لم اكن لاقوله مثله

ثانيا : موضوع اردوغان

لا اختلف مع احد انه من اسباب نهضه تركيا و انا معجب به و بكل من يساهم فى تقدم بلاده مثله مثل مهاتير محمد و لي كوان يو مؤسس نهضه سنغافوره

و ارجو الملاحظ هنا انى لم اعجب بهم للديانه ( و ان كنت اتمنى ذلك) و لكن المشكله التى اراها و اكرهها عند الحوار على اردوغان هى بكل بساطه

ان العايقه بتتعايق بشعر اختها و المصيبه ان اختها اساسا قرعه

تركيا وراء اردوغان ليس لانه المشروع الاسلامى و لكن لانه المشروع الاقتصادى بالبلدى اللى اذاقهم اللقمه الطريه ووقت ما هايقل و يقدم لهم عيش سن

هايقلبوا عليه و لا نسيتوا اخر مظاهرات كانت علشان ايه , يبقى ان نذكر ان اردوغان او مهاتير لم تكن بلادهم كما التى فى مخيلتنا من ناحيه تطبيق الاسلام و احكامه

فى كل شئ , فتركيا بها البغاء معترف به (على حد من زاروا من اصحابى ) و ماليزيا ولايات بها لبس الشورت ممنوع و اخرى الخمر مسموح

ما اعيبه على انفسنا هو النظر له حاليا على انه المخلص لنا و من سيعيد مجد بلادنا الضائع

ثالثا : موضوع الخليج و اقتصادهم الفقاعه

لا اقول ان الخليج ملايكه و زى الفل فى كل حاجه و لكنهم بدأوا بمراحل كثيره احنا مستكبرين اننا نبتدى نفكر فيها اصلا

1- اعترفوا انهم مبيفهموش حاجه اولا و احضروا من يفهم و يرسم لهم الطريق (يعمل لهم السيستم ) و هم يمشوا عليه بعد ذلك

2- اشتغلوا على تنميه البشر و اتفرج كم المبتعثين خارجيا للدراسات العليا

اه هاتقولى بيروحوا يشربوا و يبوظوا , معاك و لكن لو خرج منهم على الاقل 10 % عندهم علم بتاع الدول المتقدمه فدوول هايكونوا سبب لتقدمهم بعد ذلك

و شخصيا محتك باكثر من مثال لهولاء الـ 10 %

و ممكن تشوف كده من اعلامهم من نوعيه الجزيره الوثائقيه و ناشينوال جيوجرافيك و برنامج مثل نجوم العلوم اللى للأسف ناس كتير متعرفش عنه حاجه

و احنا لسه بنابع البرايم بتاع ستار اكاديمى و نهى المصريه هاتروح فى فريق كاظم و لا شيرين

3- هل تعلم سيدى الفاضل ان كل علب اللبن و العصير الكارتون و الجبنه الفيتا تأتى رأسا من مصنع العبيكان بالسعوديه

هل تعلم اننا نستورد منتجات البان من الكويت , السعوديه

هل رأيت الفيلم الوثائقى عن مصانع المراعى

بالنسبه للبترول , هل تعلم ان شركه ارامكو مش مجرد بتطلع خام و تبيعه و انما بالسعوديه اكبر مصنع كيماويات بالشرق

و الشركه شريكه فى منصات انتاج و معامل فى الهند و هولندا و بلجيكا و لها شراكات مع شركات كبرى فى امريكا

يعنى مش مجرد بيحلبوا بقره و يشربوا لبنها

دا بيسمنوها و بيعملوا جبن و زبد و زبادى جنب اللبن اللى بيشربوه

------------------------

اعتذر على الاطاله و الخلاصه

تقدمك فى ايدك انت كفرد (كى لا تتحجج بالدوله البوليسيه و ما الى ذلك) و كل من استعان بنا ليبنى تقدمنا لم يكن ليفعل الا لو انه وجد البيئه الصالحه لمن سيستعين بهم

مشكلتنا اننا لا نعرف ان نعمل كفريق و نخشى ان ينجح احد فيبقى احنا فاشلين فبدل ما نساعده فبنهدمه علشان يبقى زينا

علشان كده محدش بينجح فى قيادتنا الا الاجانب و لكن ليس لانعدام القياده و الحكمه فينا

و فى الاخر كلامى هو وجهة نظرى الشخصيه , يعنى متزعلش منها :)