المشاركة الأصلية كتبت بواسطة تامر.محمد
بالراحة طبعا :)
اولا : "قتلوا بعض"
استشهاد خاطيء برده
كلهم قضوا على بعض , جميل جدا , علما ان المعلومة خاطئة بالمناسبة و خطأها اسمه الاختزال
الله يحرق المستشرقين و تلاميذهم :(
بس اتمنى من حضرتك تقولي لي
مين قتل مين في الحرب العالمية التانية ؟
و الاولى ؟
امريكا قامت على ابادة شعب , ايه اخبار قتلوا بعض ؟
انجلترا و فرنسا و اسبانيا و البرتغال , تاريخهم الحديث كله سلسلة من الاستعمار و لم تخلو من حروبهم ضد بعض
امريكا في الحرب العالمية التانية مسحت مدينتين يابانيتين من على وجه الارض فقط عشان تجرب السلاح الجديد
ايه اخبار قتلوا بعض ؟
لو الاستشهاد القائل ان البشر قتلوا بعض = مافيش حضارة اذن مافيش على وجه الارض اي حضارة , لأن للأسف سمة البشر اللي ربنا خلقها فيهم : قتلوا بعض
و ده اصل الابتلاء لبني آدم و الطبيعي ان مش كلهم بينجحوا فيه , و عشان كده لازم يبقى فيه "قتلوا بعض" و عشان كده هي كنقطة مجردة لا تصلح للحكم على منهج او على تجربة , الا كانت طرف اصيل في التجربة , و هي هنا مجرد ناشيء عن الطمع البشري في السلطة
قريت مؤخرا ان روما فضلت 500 سنة تتحكم عن طريق مجلس شيوخ منتخب و مافيهاش حاجة خالص اسمها حكم فرد , لما يوليوس قيصر هزم الغال بعد حروب طويلة رجع دخل روما بالجيش الروماني و انقض على الحكم و نصب نفسه امبراطور , ادي روما كمان ما طلعتش حضارة :)
حتى تاريخيا اللي عملوه خلفاء يوليوس قيصر في بعض مشهور و معروف : قتلوا بعض
النقطة اللي بعدها
امريكا لم تتقدم الا لما نحت الدين , سامحيني على قصور معلوماتي , بس انا عمري ما سمعت ان امريكا مرت بمرحلة حكم الكنيسة من الاصل , اجمالا مسألة تنحية الدين لما حصلت في اوروبا كانت رد فعل متطرف على فساد الكنيسة هناك , و فساد الكنيسة هناك نشأ من مسألة الكهنوت
و احنا في الاسلام ما عندناش كهنوت اصلا , ولا عندنا ولاية فقيه كما عند الشيعة
بعيدا عن ده و ده , الاستشهاد نفسه كأنك بتقولي , اصل ناس تانيين اصحاب دين تاني في حتة تانية في ظروف مختلفة جربوا تجربة شبه دي فالنتيجة ما عجبتهمش
التجربة كلها مختلفة في الحقيقة :)
نقطة دولنا عمرها ما كانت علمانية , دي فكرتني بموقف ظريف , شهدت مرة نقاش دار بين اتنين معارف علمانيين , انتهى النقاش ان واحد وصف التاني بالتطرف و التاني وصفه بالدكتاتورية :)))
العلمانية مدارس فعلا , كل مدرسة فيهم بتصف نفسها بالعلمانية , من اقلها تطرفا اللي هي العلمانية الجزئية , لأكثرها تطرفا , و دي علمانية و دي علمانية , هي فقط صور مختلفة لتطبيق منهج معين , الخلاف في التفاصيل فقط
فعلى العكس , دولنا في العصر الحديث اغلبها علماني مع تفاوت الدرجات من المتساهل اللي باعد الدين عن السياسة فقط (مصر كمثال) , للمتشدد اللي باعده عن الحياة كلها (تونس بورقيبة و بن علي , و تركيا العسكر)
نقطة الدكتاتورية , الدكتاتورية مقياس منفصل بيلعب في حتة تانية غير الايديولوجيات , و هو خاص عادة بالتطبيق مش بالمنهج نفسه و قد يكون مناقض لنفس منهجه اصلا , فنلاقي دكتاتوري علماني و فيه دكتاتوري اسلامي و فيه دكتاتوري شيوعي و دكتاتوري يساري و دكتاتوري حرامي و هكذا
نقطة انهي احكام , فدي اسمها التفاصيل , و دي حجة بحتة , زي اللي قالوا له طيع اوامر ربنا قال لهم على المالكي ولا الشافعي , او بلغة اخرى , ده نفس المثال بتاع (ان البقر تشابه علينا) في تمثيل رائع و واضح سبحان الله , خلاصته , لو فيه نية فعلا اشتغل و هاتوصل , لو .....
نقطة الناس و الديمقراطية , هو فرق تطبيقي , في نظري انا فلسفي بحت
يعني اللي بيقولوا بحرمانية الديمقراطية مش بيقولوا بوجوب الاستبداد , هما بيقولوا ان مبدأ سيادة الشعب لا يجوز لأن السيادة لله , و مبدأ السيادة للشعب معناه جواز حاجة حرام لو اقرها الشعب (ده مبدأ علماني اصيل بالمناسبة)
في المقابل انا ليا رأي شخصي بحت , خلاصته ان الانسان عشان يختار يعبد ربنا او يعصيه لازم يكون صاحب ارادة حرة , كذلك الشعوب , و الكلام في النقطة دي يطول شرحه
اما بالنسبة للنموذج فهنا عندنا نقطتين مهمين
اولا : مافيش نموذج كامل , لأن الكمال لله وحده , لكن في المجال الفلاني هتلاقي التجربة التاريخية اللي طبقته صح , في مجال تاني هنلاقي حد تاني في مكان تاني و زمن تاني و هكذا
ثانيا : نقطة النموذج دي في الحقيقة مش صح في حساباتها هنا اوي , او خلينا نقول ان ده رأيي الشخصي , في الحقيقة انا مش مقتنع بشعار (الاسلام هو الحل) بتاع الاخوان , انا مقتنع ان (الاسلام هو الحق) , و الفرق كبير
شعار الاسلام هو الحل بيدي ايحاء ان تطبيق الاسلام في الحكم , و هو جزء لا يتجزأ منه , هو وسيلة لحل مشاكلنا الدنيوية و السياسية
في حين ان الحقيقة ان الاسلام مش وسيلة لكنه غاية , في الحقيقة هو امر من ربنا علينا اننا نطيعه للوصول للغاية اللي هي رضا ربنا سبحانه و تعالى , و الحقيقة في رأيي انه مش هايحل مشاكلنا الدنيوية لكنه هايخلق قدامنا مجموعة من التحديات و الصراعات , (و البهدلة دنيويا بالبلدي) , ناس كتيرة هاتشوفها مشاكل كبيرة جدا , لو الناس دي مش اولويتها رضا الله , مش هاتفهم هي بيحصل فيها كده ليه ولا يتعبوا اصلا عشان ايه
تحياتي :)