الى خبراء اللادا ممكن رايكم فى لادا سمارا 2004

**Sun Rise** · 31-01-2014 06:57 PM

الى خبراء اللادا برجاء المساعدة اريد شراء سمارة موديل 2004 بماذا تنصحونى من حيث اداء السيارة وهل يوجد قطع غيار خارج التوكيل ولكم جزيل الشكر...

**Sun Rise** · 07-02-2014 02:39 AM

up...

**Differential** · 07-02-2014 07:00 PM

السلام عليكم

لادا سمارا الجديدة او 2115 عربية ممتازة في الفئة السعرية بتاعتها واحسن بكتير من اللادا العادية .. مريحة جدا من جوا وعزل الصوت فيها كويس وشكل العربية عموما مقبول رغم انه مش عصري خالص .. بس احسن من شكل الصندوق بتاع ال2107

الدركسيون بتاع العربية خفيف لانها سكاترا .. متحسش انه تقيل الا في الركنة بس ومش بتقل ال2107 .. الموتور ناعم جدا والعفشة مناسبة للطرق عندنا واعتمادية بس جايز تكون ناشفة حبتين .. وبرضه مش نشفان ال2107 او النيفا خالص.

بالنسبة للتسارع والمناورات العربية كويسة بس بعد 120 العربية خفيفة على الطريق اوي .. انا سافرت بيها كذا مرة كنا بنطير على 140 والعربية زي الفل بس بنهدي شوية في الاماكن الزحمة .. السرعة القصوى اللي عرفت اوصلها 155 بعد كدا هديت عشان كان فيه اتوبيس سوبرجيت قاطع الشارع بالعرض وكنت هلبس فيه :d ومحاولتش اجيب سرعات اعلى

الاوبشنز اللي في العربية مش كتير بس الحاجات الضرورية موجودة زي ازاز كهرباء قدام وسنتر لوك بس بمفتاح .. وهيا بتنزل من غير كاسيت .. التكييف مش عارف 2004 كانت بتنزل بيه ولا لأ بس انا عندي 2007 ومن غير تكييف بس التجهيزة بتاعته موجودة في العربية

مشكلة العربية دي انها زيها زي اي عربية منزلتش كتير .. قطع الغيار والميكانيكية

قطع الغيار موجودة كلها بس عند اماكن معينة بس .. ومتعتبرش غالية سعرها مناسب وفيه موضوع عن اسعار قطع الغيار للادا سمارا متثبت.. التوكيل بتاعها مش خادمها كويس .. او مش خادمها اصلا! قطع الغيار غالية جدا عنده .. مثلا المراية برا الروسي الاصلي ب 85 جنيه في التوكيل ب 193 جنيه!! وفيه حاجات كتير مش موجودة عندهم رغم انها موجودة برا!

جايز متحتاجش التوكيل غير في كشف الكمبيوتر وشغل الكهرباء بس عشان عندهم الجهاز بتاعها .. والجهاز موجود برا بس اماكن محددة برضه وسعر اقل بس تروح للتوكيل لو فيه مشكلة صعبة عشان الكهربائية برا مبيفهموش فيها اوي رغم ان الاساسيات دايما واحدة!!

فيه ميكانيكية وكهربائية بيقولوا انهم مبيفهموش فيها ودا يعتبر كويس بالنسبة للي يعمل نفسه فاهم ويخربها -_- .. بس عموما الاساسيات واحدة برضه ولو الميكانيكي بيفهم هيتعامل بكل سهولة .. والعربية اعتمادية جدا فـ كدا كدا مش هتروحلهم كل شوية يعني

بالنسبة للشراء زيها زي اي عربية مستعملة في الدنيا .. لازم ميكانيكي وعفشجي وسمكري يكشفوا عليها كويس اوي عشان الحالة والتقييم .. وياريت يكونوا ناس ثقة.

سعر العربية بيكون ضعيف شوية بالمقارنة بامكانياتها عشان ندرتها .. بس هيا حلوة جدا عموما

واي استفسار تاني انا موجود :)

**Differential** · 07-02-2014 07:16 PM

فيه نقطة تانية بالنسبة لقطع الغيار هيا ان فيه حاجات متطابقة مع السمارا القديمة اللي نزلت لحد 97 ودا معناه ان لو ملقتش جديد هتلاقي مستعمل .. الحاجات دي زي نظام الفرامل والعفشة بالكامل .. الموتور نفس الشكل بس انجكشن فـ ليه كارتة وحدوتة حلوة بس كارتيرة الزيت والغطاء اللي فوق والكامات نفس القديمة بالظبط .. وتقريبا البلوك هوا هوا والفرق في مدخل الهواء والبنزين بس .. قواعد الموتور هيا هيا والرادياتير .. الفتيس والدبرياج واحد تقريبا..

يعني باختصار قطع الغيار موجودة .. بس من غير تجميل كتير للكلام جايز تلاقيها على طول وجايز تلف شوية عليها .. على حسب انت عايز ايه بالظبط

فيه حاجة بالنسبة للصالون بتاع العربية هيا ان الكراسي ورا مش مريحة .. قدام حلوة بس ورا لأ .. رغم ان الشنطة واسعة جدا والكرسي اللي ورا ممكن يتطبق وتوسع الشنطة اكتر .. بس المساحة ورا زي اللانوس شوية ولو حد طويل شوية سايق اللي وراه هيتبهدل :d