للمتزوجين ياتري تختار ايه؟

**Moustafa.yonis** · 03-02-2014 11:13 AM

اولا محدش بياخد كل حاجه دي قاعدة لازم الواحد يقتنع بيها لان ده الواقع ولانه مش كامل وكل واحد فينا فيه عيوب سواء بيعترف بيها او لا

بالنسبة للزوجات هتلاقيها بتحقق حاجات وبتقصر في حاجات

1- يا تهتم بالبيت والترويق والمواعين
( تلاقي كل حاجه فله ومفيش تراب ومفيش حاجه مش في مكانها)
2- يا تعمل اكل حلو
( كل مرة تعمل لك مفاجاة واكلات حلوة وتجرب لك وصفات جديدة )
3- يا تهتم بنفسها
( تروح من الشغل تلاقيها لابسه لك حاجه نضيفه ومسرحة شعرها وريحتها حلوة)
4- يا تهتم بالعيال
( سواء لو لسه بيبي تقعد تعلمهم حاجات او لو اكبر شوية تذاكر لهم وتابع الواجب ومستواهم الدراسي)
5- يا تتابع العالم الخارجي
( يعني تعرف تتتكلم معاها في اللي بيحصل في الدنيا والبلد وكل ما يشغل بالك وتلاقي عندها فكرة او قدرة علي الاستيعاب والتفهم والمشاركة وخلافه)

دول خمس نقط اساسية من وجهة نظري ممكن يكون فيه اكتر
لكن خلينا نقول انهم خمس نقط وانت مش هتاخد الخمس نقط الا لو ربنا كرمك بملاك
لكن لو انت زينا طبيعي ومتجوز واحدة طبيعية تختار ايه اكتر من ايه
او تحب ترتبهم ازاي

**reda elgohary** · 03-02-2014 11:22 AM

يعنى حضرتك كتبت أهم نقاط ،، مش مهم الترتيب المهم أنها تكون موجودة وخلاص .
تحياتى .

**Moustafa.yonis** · 03-02-2014 11:28 AM

حضرتك مش هتلاقيها كلها
او انا بتكلم عن نفسي
الفكرة بقي ايه اللي الواحد يضحي بيه ويستغني عنه وايه مهم يبقي موجود

**محمد عز** · 03-02-2014 11:33 AM

الزوجة المصرية زوجة مظلومة

على كتفها مهام وواجبات تهد جبال

مطلوب منها تشتغل علشان تساعد فى البيت

وتجيب الاولاد من المدرسة وهى راجعة من الشغل وتوصلهم وهى رايحة

وتعمل الاكل

وتنضف البيت

وتغسل الهدوم

وتروح للدكتور بالعيال وتذاكرهم

وفى الاخر جوزها يقول مش بتهتم بيا وعايز يجوز عليها

رفقا بالنساء

انا اسف ان كانت المداخلة مش فى محلها وملهاش علاقة بالموضوع

**Moustafa.yonis** · 03-02-2014 11:38 AM

المشاركة الأصلية كتبت بواسطة محمد عز

الزوجة المصرية زوجة مظلومة

على كتفها مهام وواجبات تهد جبال

مطلوب منها تشتغل علشان تساعد فى البيت

وتجيب الاولاد من المدرسة وهى راجعة من الشغل وتوصلهم وهى رايحة

وتعمل الاكل

وتنضف البيت

وتغسل الهدوم

وتروح للدكتور بالعيال وتذاكرهم

وفى الاخر جوزها يقول مش بتهتم بيا وعايز يجوز عليها

رفقا بالنساء

انا اسف ان كانت المداخلة مش فى محلها وملهاش علاقة بالموضوع

حضرتك معاك حق جدا
حضرتك ضفت نقطة مهمه وهي الشغل
والشغل مش اللي هو ترف بتاع تحقق ذاتها والكلام ده
فيه ستات شايله بيوت مع اجوزاها جمعيات او اقساط ومش بيتصرف علي الميكاب واللبس والكلام ده
ومن ناحية الظلم فهو واقع علي الرجالة والستات علي حد سواء

لكن بتكلم عن الرضا عن الزوجة تقدر تستغني عن ايه ومتقدرش تستغني عن ايه

**miceg** · 03-02-2014 11:50 AM

الحمد لله رب العالمين
فجمع الله هذه الخواص وأكثر في زوجتى
أضف عليهم موضوع حسن التدبير وعدم إلاصراف
سواء كان في لبس او ميكب او مشتريات ليست ضرورية
وبصراحة الواحد قبل مايشتري حاجة من أثاثات البيت بيشتريها وهو مستخبي هههههههه
ربنا يكرم الجميع ويحسن النوايا

**miceg** · 03-02-2014 02:01 PM

المشاركة الأصلية كتبت بواسطة fahdebnyonis

الحمد لله ربنا يبارك لك فيها ويحفظ عليك نعمته

لكن مفمهتش ليه بتستخبي وانت بتشتري حاجه من اثاثات البيت

بستخبي بصفتي بأفور فالشراء
يعني ممكن اشتري ثلاجة 18 قدم فوق ال 4 الاف مع ان احنا اسرة فردين وطفله
تلفزيون مثلا 47 بوصه في الصالة في حين ان المساحة الليفينج صغيره وهكذا
فهي بتقوم دائما بالمعادله الصعبه في الاحتياجات وفي المواصفات أيضا

**أبو آسر** · 03-02-2014 02:19 PM

أنا عن نفسي أختار إنها تجمع بين كل هذه الأمور بحيث مفيش جانب يطغى على التاني وطبعا دي معادلة صعبة ولذلك مهمة المرأة صعبة جدا والواحد بيشفق عليها وبيدعيلها ربنا يعينها لكن بالنسبة ليا أحيانا زوجتي بتغلب جانب التنظيف وكل يوم كنس ومسح وترتيب الشقة فبحاول أنبهها كفاية كده وشوفي باقي المهمات
أما مسألة الاهتمام بنفسها والتزين والكلام ده فمش الزوجة المصرية :) لأن الزوجة المصرية بمجرد ما بتجيب أول بيبي اعتبر نفسك كده خلاص وقتك انتهى واستعد لدرتك الجديدة في البيت
لذلك أنصح كل واحد مقدم على الجواز متستعجلش في الخلفة وحاول تقعدلك سنة على الأقل استمتع بحياتك الجديدة وقضيها فسح وخروجات علشان هتفتقد الحاجات دي بمجرد تشريف الباشا الجديد :)