الموضوع: سؤال محيرني في موقع دوبيزل

المشاركة الأصلية كتبت بواسطة Ahmed_Adham

مش شرط في مشروع موقع انترنت انه يجيب فلوس في الاول يعني ممكن تشتغل لفتره مجانا لحد ما توصل لمستوى شهره معين وبعدين تفكر في الفلوس وكمثال فيسبوك ويوتيوب قعدو فتره كبيره شغالين بدون اعلانات.

بالنسبه لطريقه المكسب من دوبيزل. هييجو في وقت معين يعملو premium listing يعني تدفع مقابل انك تنشر اعلانك ويبقى في بدايه الاعلانات اللي تظهر في القسم بتاعه يعني لو بتعلن عن بيع عربيه بي ام مثلا تبقى عربيتك أول عربيه تظهر لما حد يدخل قسم البي ام ده غير ان ممكن يبقى لإعلانك خلفيه بلون مميز Highlight وبالتالي اعلانك يتشاف أكتر وفرصه البيع تبقى أكتر.

الكلام ده أظنه أقرب للمنطق فعلا وهو اللي اطمأنيت ليه خاصة بعد حيرتي برده في البداية من الموضوع ده لكن بالفعل هما بيعملوا شهرة وبعدين يبدأوا ينزلوا إعلانات جوجل أدسنس مثلا وكمان هيعملوا إعلانات مميزة بفلوس بجانب المجانية
وبالفعل دوبيزل الإمارات بدأ ينزل إعلانات أدسنس في الموقع عنده زي ما قال أخونا Secret-Man وفتح كمان باب الإعلان على موقعه لمن يريد

المشاركة الأصلية كتبت بواسطة Ahmed_Adham

أنا بصراحه بعتبر استخدام ادسنس في موقع Listing أو اعلانات مبوبه "قصر نظر" من اداره الموقع لأكتر من سبب أهمها


1- ان عندي بديل اني أوفر الجزء اللي بيستقطعه أدسنس (تلت ما يدفعه المعلن تقريبا) واتعامل مع الزائر مباشره بدون وسيط لأني بالفعل مش محتاج شركه اعلانات أو تاجر في النص وأقدر أحصل الفلوس من الزائر مباشره عن طريق مثلا انه يبعت رساله لرقم معين (بسعر محدد مسبقا مع شركات الاتصالات التلاته وموضح للزائر) ويجيله كود يدخله وهوه بينشر الاعلان كدليل للدفع ويبقى اعلانه مميز أو اني ابيعله ميزه نشر اعلانه على صفحه الفيس بوك (في وجود أكتر من 2 مليون فان لصفحه الموقع على الفيس بوك).

2- ان الاعلانات هتبقى بشكل كبير مش متطابقه مع محتوى الصفحه لأن من ناحيه المحتوى قليل في كل صفحه ومن ناحيه تانيه الموقع مش متخصص في جانب معين ولكنه متفرع وفيه أقسام كتير وملهاش علاقه ببعضها وبالتالي الاعلانات مش هتبقى جذابه لكتير من زوار الموقع ومش مدره للربح وكمثال اعلان الشعر اللي واضح في الصوره في قسم العقارات.

بالعكس
شبكة جوجل أكبر شبكة إعلانية في العالم ويتعامل معها ملايين المعلنين وده بيدي تنوع في الإعلانات وده بيخلي الإعلانات متجددة وبيظهر فيها كل شيء وأكيد انت كزائر هتلاقي ما يشدك ويجذبك وبالتالي هيبقى في نقرات كتير جدا ثم أرباح على عكس ما تتعامل انت مع المعلنين بنفسك - فبغض النظر عن وجع الدماغ انت في أدسنس زي الباشا بتحط الكود وكل شهر بتروح تاخد فلوسك على الجاهز - ده غير إن الإعلانات نفسها هتكون محدودة وعدد المعلنين محدود برده مش بحجم معلني جوجل
وعلى فكرة هما ممكن يجمعوا بين الأمرين برده مفيش مشكلة خالص والدليل إن زي ما في الصورة اللي أرفقتها مكتوب تحت بخط صغير "اعلن هنا" وده معناه إنهم شغالين برده إعلانات شخصية لمعلنين بيتعاملوا معهم مباشرة مفيش مشكلة لكن أكيد هتكون التكلفة عالية علشان ينقوا ناس معينة وإعلانات معينة زي كبرى المواقع كده كاليوم السابع مثلا شغال أدسنس وفي نفس الوقت توجد إعلانات أخرى لمعلنين تانيين بيتعاملوا معهم مباشرة
بخصوص تطابق الإعلانات مع محتوى الصفحة فبالعكس جوجل بتعتمد على حاجتين في إظهار الإعلانات لكل زائر: محتوى الموقع واهتمامات الزائر نفسه ، يعني لو زائر بيدور على موبايل نوكيا يشتريه مثلا وفتح دوبيزل هتلاقي إعلان أدسنس ممكن يكون إعلان شركة نوكيا ، أو لو زائر فاتح صفحة سيارات مثلا هتلاقي الإعلان ممكن يكون إعلان لغبور مثلا بيعلن عن إمجراند وهكذا
وعلى فكرة إعلان الشعر مش في قسم العقارات :) ده في الصفحة الرئيسية بتاعة الأقسام
أخيرا الناس دي مش سهلة ومش بتلعب وأكيد دارسة الموضوع ده كويس جدا وعارفين إيه أفضل وسيلة يربحوا من خلالها وجوجل بيدي امتيازات خاصة للمعلنين الكبار اللي زي دول منها إن نسبتهم في الأرباح بتكون أكتر من التلتين وبيشاركوا جوجل نفسها في نسبتهم اللي هي التلت !
حسابات أدسنس المميزة - الخطة..أدسنس