استفسار عن استهلاك بنزين الجين 2 اوتوماتيك

**M.sawy** · 05-02-2014 01:55 PM

ياجماعة محتاج اعرف استهلاك البنزين فى الجين 2 اوتو عالى ولا طبيعى زى العربيات التانية زى مثلا البيجو 301 او الافيو
وياريت لو تكملوا جميلكم علشان انا ياهجيب افيو او جين 2 موديل 2014 انشاء الله بس متردد جداااااااا فى الموضوع دة مع العلم ان ممكن اوقات اسرتى تسافر معايا 3 افراد غيرى فهل هيحسوا ان العربية ضيقة ولا لا
واخر حاجة يبقى كتر خيركم ياوحوش البروتون من حيث مصاريفها هتبقى اعلى بكتير من الافيو ولا لا لانى انا لسة عاوز اتجوز ومش عاوز اجيب عربية تكون مصاريفها كتيرررر
ولو الملاك عندهم مساحة انهم يردوا على كل الاسئلة ياريت الملاك بس يقولولى لو ليها فصلات تدايق ولا حاجة دة بالنسبة لمالكى الجين 2 ومتشكر جدااااااااا وبرجاء الافدة عن جميع الاسئلة ازادكم الله كرماً d:

**M.sawy** · 05-02-2014 02:21 PM

اية يا جماعة بقالى نص ساعة ومفيش اى رد محتاج رددودكم باسرع وقت

**abdoumahros** · 05-02-2014 03:25 PM

جين 2 معدل استهلاك البنزين بيتوقف علي طريقه سواقتك اذا كنت بتحرق علي الغيارات ولالا
لكن بصفه عامه معدل استهلاك البنزين معقول زي باقي الانواع في فئتها داخل المدينه اما في السفر علي سرعه 100 ممتاز
العربيه واسعه من جوه ومريحه وممكن تجرب بنفسك في اي معرض وهتلاحظ ان السواق حتي لو كان طويل ومرجع الكرسي اللي وراه موش بيتضايق وكمان الشنطه واسعه
اما بخصوص مقالبها فده والحمد لله موش موجود العربيه بجد اعتماديه وحماله اسيه
وعاليه عن الارض وموش بتحك في المطبات حتي لو 3 علي الكنبه الخلفيه
وطبعا ثباتها رائع حتي علي السرعات العاليه
وتحت امرك في اي استفسار اخر

**M.sawy** · 05-02-2014 06:18 PM

متشكر جدااا ليك ورايك محترم بس محتاج اسمع اراء تانية ياوحوش البروتون بس بدون انحيازية للجين 2 مع احترامى الكامل لمالكى السيارة

**S O P H O S** · 06-02-2014 03:47 PM

الجين طبعا احسن من الافيو حتي لو بستهلك بنزين اكتر
رأي بعيدا عن التقيم ..

**uniform** · 09-02-2014 06:22 PM

انا معايا اتوماتيك 2010 وال40 لتر (معرفش هما دول اللي بيتقال عليهم صفيحة ولااكتر من كده) بيعملوا معايا 300 ك
انا بصراحة مش عارف دا كنير ولا قليل وكان نفسي حد هنا يفيدني...بس عموما قولت اقولك يمكن دا يفيدك في حاجه
وللعلم ده جوا المدينة

**mahmoudysf** · 10-02-2014 03:02 AM

المشاركة الأصلية كتبت بواسطة uniform

انا معايا اتوماتيك 2010 وال40 لتر (معرفش هما دول اللي بيتقال عليهم صفيحة ولااكتر من كده) بيعملوا معايا 300 ك
انا بصراحة مش عارف دا كنير ولا قليل وكان نفسي حد هنا يفيدني...بس عموما قولت اقولك يمكن دا يفيدك في حاجه
وللعلم ده جوا المدينة

الصفيحة 20 لتر
واستهلاك 40 لتر لكل 300 ك استهلاك عالي جدا

**uniform** · 11-02-2014 02:26 AM

المشاركة الأصلية كتبت بواسطة mahmoudysf

الصفيحة 20 لتر
واستهلاك 40 لتر لكل 300 ك استهلاك عالي جدا

طب المفروض يبقي اد اية ياكبير في الاوتوماتيك...لاني فعلا حاسس الموضوع مش طبيعي...وايه الاسباب المحتملة..؟؟؟
وانا اسف لصاحب الموضوع الاصلي..اننا بنخرج بره الموضوع....فرجاء لو حد عنده معلومة مفيده يبعتهالي علي الخاص عشان منبوزش الموضوع هنا...

**D . a .\ AYMAN** · 18-02-2014 10:07 PM

المفروض الصفيحة في العربيات الـ 1600 بتعمل استهلاك في الصفيحة اللى هي 20 لتر ... حوالي 200 كيلو في المتوسط تزيد في الطوالي وتقل في الزحام الشديد

لو الطرق فيها شوية زحام وشوية طوالي بتعمل حوالي 210 - 220 كيلومتر / 20 لتر وقود

ده استهلاك عام لأي عربية 1600 ... طبعا في عربيات ممكن تعمل أكتر من كدة وعربيات تانية أقل حسب حالة العربية

يعني كان معايا مرة نوبيرا كانتب تعمل 140 كيلومتر / الصفيحة بالعافية ... وما كانش فيها أي مشاكل

الهوندا سيفيك 92 كانت بتعمل فوق الـ 240 / الصفيحة أيام مجدها

البيجو 505 (ودي كانت 2000 سي سي) ... أيام ما كانت حالتها كويسة بتعمل 200 كيلومتر / الصفيحة وده استهلاك رائع بالنسبة لعربية موديل 80 وموتور 2000 سي سي

**eng.m7md.ali** · 19-02-2014 01:16 PM

مقارنتك الجين2 مع الافيو تخليني حزين جداً

الجين استهلاكها اكتر في البنزين وده طبيعي لكن في السفر اقتصادية .. انا مشيت بالواجا حوالي 320-350 كيلو ب 17 لتر وسرعات وصلت لل 160 .. محدش يسألني ازاي بس هو ده اللي حصل